ସଫ୍ଟ ଲ୍ୟାଣ୍ଡିଂ ପରେ ଚନ୍ଦ୍ରପୃଷ୍ଠରେ ଚନ୍ଦ୍ରଯାନ-3କୁ ସାତ ଦିନ ପୂରିଥିବା ବେଳେ, ଇସ୍ରୋକୁ ଲଗାତର ବୈଜ୍ଞାନିକ ତଥ୍ୟ ପଠାଇ ଚାଲିଛନ୍ତି ବିକ୍ରମ ଓ ପ୍ରଜ୍ଞାନ। ଲ୍ୟାଣ୍ଡରଠାରୁ ଅଲଗା ହେବା ପରେ, ଚନ୍ଦ୍ରର ଦକ୍ଷିଣ ମେରୁରେ ଘୂରି ବୁଲୁଛି ରୋଭର। ଚନ୍ଦ୍ର ପୃଷ୍ଠର ଫଟୋ ପଠାଇବା ସହ ବୈଜ୍ଞାନିକ ପରୀକ୍ଷା ନିରୀକ୍ଷା ଜାରି ରହିଛି। 

ତେବେ ରୋଭରରେ ଲାଗିଥିବା LIBS ଜରିଆରେ ସଲଫରର ସନ୍ଧାନ ମିଳିଛି । ଏହାଛଡ଼ା ଆଲୁମିନିୟମ, କ୍ୟାଲସିୟମ, ଫେରମ, କ୍ରୋମିୟମ, ଟିଟାନିୟମ, ମ୍ୟାଗ୍ନେସିୟମ, ସିଲିକନ ଭଳି ଖଣିଜ ପଦାର୍ଥ ମଧ୍ୟ ରହିଛି ଚନ୍ଦ୍ରପୃଷ୍ଠରେ । ହାଇଡ୍ରୋଜେନ ରହିଛି କି ନାହିଁ, ତାର ସନ୍ଧାନ ଚଳାଇଛି ପ୍ରଜ୍ଞାନ।

ଚନ୍ଦ୍ରର ଦକ୍ଷିଣ ମେରୁରେ ପହଞ୍ଚି ଏଭଳି ସନ୍ଧାନ କରିବାରେ ଏହା ପ୍ରଥମ ଘଟଣା। କୌଣସି ଅର୍ବିଟର ସାହାଯ୍ୟରେ ଏଭଳି ପରୀକ୍ଷଣ ସମ୍ଭବ ନୁହେଁ ବୋଲି ଇସ୍ରୋ ପକ୍ଷରୁ କୁହାଯାଇଛି।

ଏହା ପୂର୍ବରୁ ରବିବାର ଲ୍ୟାଣ୍ଡର ବିକ୍ରମରେ ଲାଗିଥିବା ChaSTE ପେଲୋଡ୍ ଚନ୍ଦ୍ରପୃଷ୍ଠରୁ ଗୋଟିଏ ନୂଆ ସୂଚନା ପଠାଇଥିଲା। ଚନ୍ଦ୍ରରେ ମାଟିର ତାପମାତ୍ରା ୧୦ରୁ ୫୦ ଡିଗ୍ରୀ ମଧ୍ୟରେ ରହିଛି। ଇସ୍ରୋ କହିଥିଲା, "ଚନ୍ଦ୍ରର ଭୂପୃଷ୍ଠରୁ ୧୦ ସେମି ପର୍ଯ୍ୟନ୍ତ ତାପମାତ୍ରାରେ ପାର୍ଥକ୍ୟ ଥିବା ଜଣାପଡୁଛି। ପ୍ରଥମ କରି ମହାକାଶ ବିଜ୍ଞାନ ଇତିହାସରେ ଚନ୍ଦ୍ରୟାନ-୩ ଚନ୍ଦ୍ରର ଦକ୍ଷିଣ ମେରୁର ମୃତ୍ତିକା ପରୀକ୍ଷା କରି ଏହି ସୂଚନା ପଠାଇଛି।"

Powered by Froala Editor