ପୁଣି‌ ଯୌତୁକ ନିଆଁରେ ଜଳିଲେ ଆଉ ଜଣେ ମହିଳା। ତାମିଲନାଡୁର ତିରୁପୁର ଜିଲାର ୨୭ ବର୍ଷୀୟ ରିତାନ୍ୟାଙ୍କ ଆତ୍ମହତ୍ୟା ଖବର ସମଗ୍ର ରାଜ୍ୟକୁ ଥରାଇ ଦେଇଛି। ମୃତ ମହିଳାଙ୍କ ବିବାହ ୨ ମାସ ପୂର୍ବେ ଅର୍ଥାତ୍‌ ଏପ୍ରିଲରେ କଭିନକୁମାର ନାମକ ଜଣେ ଯୁବକଙ୍କ ସହ ହୋଇଥିଲା। ସେ ଯୌତୁକ ଭାବରେ ପ୍ରାୟ ୨୪୦୦ଗ୍ରାମ ସୁନା ଏବଂ ୭୦ ଲକ୍ଷ ମୂଲ୍ୟର ଏକ ଭଲଭୋ କାର ନେଇଥିଲେ। କିନ୍ତୁ ଏହି ବିବାହ ତାଙ୍କ ପାଇଁ ଏକ ଦୁଃସ୍ବପ୍ନ ପାଲଟିଥିଲା।

ସୂଚନା ମୁତାବକ, ପୋଷାକ ବ୍ୟବସାୟର ମାଲିକ ଏବଂ ପୂର୍ବତନ ରାଜନୈତିକ ପ୍ରାର୍ଥୀ ଆନ୍ନାଦୁରାଇଙ୍କ ଝିଅ ରିତାନ୍ୟା, କେଭିନ କୁମାର (୨୮)ଙ୍କୁ ୧୧ ଏପ୍ରିଲ୍ ୨୦୨୫ରେ ଖୁବ ଆଡ଼ମ୍ବରରେ ବିବାହ କରିଥିଲେ। ପରିବାର ୨୪୦୦ଗ୍ରାମ ସୁନା, ୭୦ ଲକ୍ଷ ଟଙ୍କାର ଏକ ଭଲଭୋ କାର ଏବଂ ବିବାହ ଭୋଜିରେ ୨.୫ କୋଟି ଟଙ୍କା ଖର୍ଚ୍ଚ କରିଥିଲେ। ଏହା ସହ ବିବାହ ପରେ ଅତିରିକ୍ତ ୧୬୦୦ଗ୍ରାମ୍ ସୁନା ଦେବା ପାଇଁ ପ୍ରତିଶ୍ରୁତି ଦେଇଥିଲେ।

ବିବାହର ୧୦ଦିନ ପରେ ରିତାନ୍ୟାଙ୍କ ଉପରେ ୧୬୦୦ଗ୍ରାମ୍ ସୁନା ପାଇଁ ଅତ୍ୟାଚାର ଆରମ୍ଭ ହୋଇଥିଲା। ଛୋଟ ଛୋଟ କଥାରେ ତାଙ୍କୁ ମାଡ଼ ମରାଯାଉଥିବା ବେଳେ ଦିନ ତମାମ ଛିଡ଼ା ହେବାକୁ କୁହାଯାଉଥିଲା। ୨ମାସ ଧରି ଏଭଳି ଅତ୍ୟାଚାର ସହିବା ପରେ ଶନିବାର ରିତାନ୍ୟା ବିଷ ପିଇ ଜୀବନ ହାରିଥିଲେ। ମନ୍ଦିର ଯାଇଥିବା ବେଳେ ସେ ନିଜ କାର୍ ଭିତରେ ଆତ୍ମହତ୍ୟା କରିଥିଲେ। ଜୀବନ ହାରିବା ପୂର୍ବରୁ ସେ ନିଜ ବାପାଙ୍କୁ ହ୍ବାସଆପ୍ ଭଏସ୍ ମେସେଜ୍ ପଠାଇ ତାଙ୍କ ସହ ହେଉଥିବା ଅତ୍ୟାଚାର ବିଷୟରେ ଜଣାଇଥିବା ସାମ୍ନକୁ ଆସିଛି।

ସ୍ଥାନୀୟ ଲୋକମାନେ ଗାଡ଼ିଟି ଦୀର୍ଘ ସମୟ ଧରି ଠିଆ ହୋଇଥିବା ଦେଖି ପୋଲିସକୁ ଖବର ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚିଲା, ରିଧାନ୍ୟାଙ୍କ ମୁହଁରୁ ଫେଣ ବାହାରୁଥିଲା। ରିଧାନ୍ୟାଙ୍କ ମୃତ୍ୟୁ ପରେ, ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ତାଙ୍କ ସ୍ବାମୀ କଭିନକୁମାର, ଶ୍ୱଶୁର ଈଶ୍ୱରମୂର୍ତ୍ତି ଏବଂ ଶାଶୁ ଚିତ୍ରାଦେବୀଙ୍କୁ ଗିରଫ କରିଛି।

Powered by Froala Editor