ନୂଆଦିଲ୍ଲୀ: ଆଜି ସମଗ୍ର ବିଶ୍ବରେ ‘ଆନ୍ତର୍ଜାତିକ ଆଣବିକ ପରୀକ୍ଷଣ ବିରୋଧୀ ଦିବସ’ ପାଳନ କରାଯାଉଛି। ବିଶେଷ କରି ଆଣବିକ ପରୀକ୍ଷଣ ଜନିତ ବିସ୍ଫୋରଣକୁ ରୋକିବା ଉପରେ ଗୁରୁତ୍ବାରୋପ କରାଯାଉଛି। କାରଣ ଏପରି ପରୀକ୍ଷଣ ଦ୍ବାରା କେବଳ ମାନବ ସମାଜ ନୁହେଁ, ପରିବେଶ, ଉଦ୍ଭିଦ ଓ ଜୀବଜଗତର ମଧ୍ୟ ବ୍ୟାପକ କ୍ଷତି ହୋଇଥାଏ। ଉଲ୍ଲେଖଯୋଗ୍ୟ, ଆମେରିକା ସେନା ଦ୍ବାରା ୧୯୪୫ ଜୁଲାଇ ୧୬ରେ ପ୍ରଥମ ଆଣବିକ ପରୀକ୍ଷା କରାଯାଇଥିଲା। ଆମେରିକା ଅଗଷ୍ଟ ୬ ଓ ୯ ତାରିଖରେ ଜାପାନର ହିରୋସୀମା ଓ ନାଗାସାକି ସହର ଉପରେ ପରମାଣୁ ବୋମା ନିକ୍ଷେପ କରିଥିଲା। ପରେ ସୋଭିଏତ ସଂଘ ଓ ଆମେରିକା ମଧ୍ୟରେ ଆଣବିକ ଅସ୍ତ୍ରଶସ୍ତ ନିର୍ମାଣର ପ୍ରତିଯୋଗିତା ଆରମ୍ଭ ହୋଇଯାଇଥିଲା। 

ସୋଭିଏତ ସଂଘ ଏହାର ସେମିପାଲାତିଂସ୍କ ପରୀକ୍ଷଣ କେନ୍ଦ୍ରରେ ୧୯୪୯ରୁ ୧୯୮୯ ମଧ୍ୟରେ ୪୫୬ ଥର ଆଣବିକ ପରୀକ୍ଷଣ କରିଥିଲା। ତେବେ ୧୯୯୧ ଅଗଷ୍ଟ ୨୯ ତାରିଖରେ ଉକ୍ତ କେନ୍ଦ୍ରକୁ ବନ୍ଦ କରାଯିବା ସହ ଆଣବିକ ଅସ୍ତ୍ରମୁକ୍ତ ଭବିଷ୍ୟତ ସୁନିଶ୍ଚିତ କରିବା ଲାଗି ବିଶ୍ବର ଅନ୍ୟ ରାଷ୍ଟ୍ରମାନେ ଅନୁରୂପ ପଦକ୍ଷେପ ନେବା ଉପରେ ଗୁରୁତ୍ବାରୋପ କରାଯାଇଥିଲା। ୨୦୦୯ରେ ମିଳିତ ଜାତିସଂଘ ସାଧାରଣ ପରିଷଦର ୬୪ତମ ଅଧିବେଶନରେ ସେମିପାଲାତିଂସ୍କ କେନ୍ଦ୍ରର ବନ୍ଦ ଦିବସକୁ ସ୍ମରଣୀୟ କରିବା ଲାଗି ଅଗଷ୍ଟ ୨୯ ତାରିଖକୁ ‘ଆନ୍ତର୍ଜାତିକ ଆଣବିକ ପରୀକ୍ଷଣ ବିରୋଧୀ ଦିବସ’ ଭାବେ ପାଳନ କରିବାକୁ ଘୋଷଣା କରାଯାଇଥିଲା। ଏହା ବିଶ୍ବବ୍ୟାପୀ ଶାନ୍ତି ଓ ସୁରକ୍ଷାକୁ ପ୍ରୋତ୍ସାହିତ କରିବା ସହ ପରମାଣୁ ଅସ୍ତ୍ର ମୁକ୍ତ ବିଶ୍ବର ଲକ୍ଷ୍ୟ ହାସଲର ଆବଶ୍ୟକତା ଉପରେ ଗୁରୁତ୍ବାରୋପ କରାଯାଉଛି। 

Powered by Froala Editor