ସୌରୀନଙ୍କ ବିରୋଧରେ ପ୍ରେମ ପତାରଣା ଓ ଟଙ୍କା ହଡ଼ପ ଅଭିଯୋଗ
କଣ୍ଠଶିଳ୍ପୀ ସୌରୀନ ଭଟ୍ଟଙ୍କ ବିରୁଦ୍ଧରେ ଜଣେ ଓଡ଼ିଆ ଗାୟିକା ମହିଳା ଥାନାରେ ଏତଲା ଦେଇଥିବା ଜଣାଯାଇଛି। ପ୍ରଲୋଭନ ଦେଖାଇ ବିବାହ ପ୍ରତିଶ୍ରୁତି, ପ୍ରତାରଣା, ନିର୍ଯାତନା ଓ ଶୋଷଣ କରିବା ନେଇ ସୌରୀନଙ୍କ ବିରୋଧରେ ଅଭିଯୋଗ କରିଛନ୍ତି ଗାୟିକା।
ଏପରିକି ତାଙ୍କ ବିରୋଧରେ ୧୦ ଲକ୍ଷ ଟଙ୍କା ହଡ଼ପ କରିଥିବା ଅଭିଯୋଗ ବି ହୋଇଛି । ଅଭିଯୋଗ ଆଣିଥିବା ଗାୟିକା ପେସାରେ ଜଣେ ବ୍ୟାଙ୍କ କର୍ମଚାରୀ । ସୌରୀନ ତାଙ୍କୁ ପ୍ରେମ ଜାଲରେ ଫସାଇ ଟଙ୍କା ନେଇଥିବା ଅଭିଯୋଗ କରିଛନ୍ତି । ସେ କୁଆଡେ ପୂର୍ବରୁ କଟକ ଜଗତପୁର ଥାନାରେ ବି ଅଭିଯୋଗ କରିଥିଲେ । ପୁଣି ମହିଳା ଥାନାରେ ଅଭିଯୋଗ ଆଣିଛନ୍ତି ।
ମହିଳା ଥାନାରେ ଓଲିଉଡ଼ କଣ୍ଠଶିଳ୍ପୀ ଜଣକ ଏତଲା ଦେବା ପରେ ଡିସିପି ପିନାକ ମିଶ୍ର କହିଛନ୍ତି, ଏତଲାରେ ଯାହା ଉଲ୍ଲେଖ ରହିଛି, ସେହି ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସୌରୀନ ଭଟ୍ଟଙ୍କୁ ଜେରା ପାଇଁ ଥାନାକୁ ଡକାଯିବ।
ଏହି ଘଟଣା ପୁଣି ଓଲିଉଡକୁ ବଦନାମ କରିଥିବା କୁହାଯାଉଛି। ଏଣେ କଣ୍ଠଶିଳ୍ପୀ ସୌରୀନ ଭଟ୍ଟଙ୍କ ନାଁରେ ଅଭିଯୋଗ ଆସିବା ପରେ ପୁଲିସ କି ପଦକ୍ଷେପ ନେଉଛି, ତା' ଉପରେ ସମସ୍ତଙ୍କ ନଜର ରହିଛି ।
Powered by Froala Editor
