ଭୁବନେଶ୍ୱର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭୁବନେଶ୍ୱରରେ ବାତ୍ୟା ‘ୟଶ’ ଜନିତ କ୍ଷୟକ୍ଷତି ସମ୍ପର୍କରେ ସମୀକ୍ଷା କରିଛନ୍ତି । ବୈଠକରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବାତ୍ୟା ମୁକାବିଲା ପାଇଁ ୨ଟି ଦୀର୍ଘସୂତ୍ରୀ ବ୍ୟବସ୍ଥା ବ୍ୟତୀତ ତୁରନ୍ତ  କୌଣସି ଆର୍ଥିକ ସହାୟତା ପ୍ରଦାନ ପାଇଁ  ଦାବି କରିନଥିଲେ ।  ତେବେ ବୈଠକ ପରେ ଆର୍ଥିକ ସହାୟତା ନମାଗିବାର କାରଣ ସମ୍ପର୍କରେ କହିଛନ୍ତି ନବୀନ ପଟ୍ଟନାୟକ ।  ଏନେଇ ଟ୍ୱିଟ କରି ନବୀନ କହିଛନ୍ତି ଯେ,  କରୋନା ମହାମାରୀ ଦୃଷ୍ଟିରୁ ରାଜ୍ୟ ସରକାର ବାତ୍ୟା ନେଇ ତୁରନ୍ତ ଆର୍ଥିକ ସହାୟତା ମାଗିନାହାନ୍ତି ।  କରୋନା ଭଳି ମହାଭାରୀ ସମୟରେ କେନ୍ଦ୍ର ଉପରେ ତୁରନ୍ତ ଆର୍ଥିକ ବୋଝ ଲଦିବାକୁ ଚାହିଁନୁ ।  ଯାହା ଏବେ ଦରକାର ତାହା ଆମେ ମ୍ୟାନେଜ କରିନେବୁ ବୋଲି ନବୀନ ଟ୍ୱିଟ ଯୋଗେ ଦର୍ଶାଇଛନ୍ତି ।

ପ୍ରକାଶ ଯେ, ମୋଦୀଙ୍କ ସମୀକ୍ଷା ବୈଠକରେ ଓଡ଼ିଶାର ଦାବି ସମ୍ପର୍କରେ ସ୍ୱତନ୍ତ୍ର ରିଲିଫ କମିଶନର ପ୍ରଦୀନ ଜେନା  ସୂଚନା ଦେଇ କହିଥିଲେ ଯେ, ବୈଠକରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବାତ୍ୟା ମୁକାବିଲା ପାଇଁ ୨ଟି ଦୀର୍ଘସୂତ୍ରୀ ବ୍ୟବସ୍ଥା ପାଇଁ ଦାବି କରିଛନ୍ତି । ବିଶେଷ କରି ବାତ୍ୟାକୁ ସମ୍ଭାଳି ପାରୁଥିବା ବିଦୁ୍ୟତ ବ୍ୟବସ୍ଥା ଦାବି  କରାଯାଇଛି । ଉନ୍ନତ ଟେକ୍ନୋଲୋଜି ଓ ଅଣ୍ଡର ଗ୍ରାଉଡ କେବୁଲିଂ ବ୍ୟବସ୍ଥା  ପାଇଁ ଦାବି କରାଯାଇଛି ।  ଉପକୂଳ ସୁରକ୍ଷା ପାଇଁ ଦୀର୍ଘକାଳୀନ ବ୍ୟବସ୍ଥା କରାଯିବାକୁ ଦାବି କରାଯାଇଛି ।  ୭/୮ ମିଟର ପର୍ଯ୍ୟନ୍ତ ଜୁଆର ଉଠୁଥିବାରୁ ତାର ବ୍ୟବସ୍ଥା କରାଯିବାକୁ କୁହାଯାଇଛି ।  ଏହି ଦୁଇ କାର୍ଯ୍ୟ ପାଇଁ ଭାରତ ସରକାରଙ୍କ ସହାୟତା ପାଇଁ ଦାବି କରାଯାଇଛି । ବର୍ତ୍ତମାନର ବାତ୍ୟା ନେଇ  କିଛି  ଆର୍ଥିକ ସହାୟତା ଦାବି କରାଯାଇନାହିଁ ।  ଯାହା ଏବେ ଦରକାର ଆମେ ତାକୁ ମ୍ୟାନେଜ କରିନେବୁ । ଆଗାମୀ ୭ ଦିନରେ କ୍ଷୟକ୍ଷତି ରିପୋର୍ଟ ଦେବୁ  ବୋଲି ଏସଆରସି ଶ୍ରୀ କହିଥିଲେ ।

ଅନ୍ୟପକ୍ଷରେ  ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭୁବନେଶ୍ୱରରେ ବାତ୍ୟା ‘ୟଶ’ ଜନିତ କ୍ଷୟକ୍ଷତି ସମ୍ପର୍କରେ ସମୀକ୍ଷା କରିବା ପରେ ବାତ୍ୟାଞ୍ଚଳ ପରିଦର୍ଶନ କରୁଛନ୍ତି ।  ବାୟୁସେନାର ଏକ ସ୍ୱତନ୍ତ୍ର ହେଲିକେପ୍ଟରରେ ମୋଦୀ ଆକାଶ ମାର୍ଗରୁ  ବାତ୍ୟାରେ ସର୍ବାଧିକ କ୍ଷତିଗ୍ରସ୍ତ ହୋଇଥିବା ଭଦ୍ରକ ଓ ବାଲେଶ୍ୱରର ସ୍ଥିତି ପରିଦର୍ଶନ କରୁଛନ୍ତି । ତେବେ ବାତ୍ୟାଞ୍ଚଳ ବୁଲି ଦେଖିବା ପରେ ମୋଦୀ ସନ୍ଧ୍ୟା ସୁଦ୍ଧା ଓଡ଼ିଶା ପାଇଁ ଆର୍ଥିକ ସହାୟତା ଘୋଷଣା କରିବେ ବୋଲି କେନ୍ଦ୍ରମନ୍ତ୍ରୀ ପ୍ରତାପ ଷଡ଼ଙ୍ଗୀ କହିଛନ୍ତି ।  ଏହାଛଡ଼ା ସମୀକ୍ଷା ବୈଠରେ  ରାଜ୍ୟ ସରକାର ବିପର୍ଯ୍ୟୟର ସ୍ଥାୟୀ ସମାଧାନ ସହ ସ୍ଥାୟୀ ଭିତ୍ତିଭୂମି ନିର୍ମାଣ ଦାବି କରିଥିଲେ । ତେବେ  ଓଡ଼ିଶା ସହ ପୂରା କେନ୍ଦ୍ର ସରକାର ଅଛନ୍ତି ବୋଲି ମୋଦୀ କହିଥିବା  କେନ୍ଦ୍ରମନ୍ତ୍ରୀ ଶ୍ରୀ ଷଡ଼ଙ୍ଗୀ କହିଛନ୍ତି । 

Powered by Froala Editor