ରାଜଧାନୀ ଦିଲ୍ଲୀରେ ଜଣେ ଜାପାନୀ ଯୁବତୀ ଅସଦାଚରଣର ଶିକାର ହୋଇଥିଲେ । ଏହାର ଭିଡିଓ ଭାଇରାଲ ହେବା ପରେ ପୁଲିସ ୩ ଜଣଙ୍କୁ ଗିରଫ କରିଛି । ହେଲେ ଯୁବତୀ ଜଣଙ୍କ ତାଙ୍କ ଯନ୍ତ୍ରଣାକୁ ଟ୍ୱିଟ ମାଧ୍ୟମରେ ଜଣାଇଛନ୍ତି ।  ସେ ଟ୍ୱିଟ୍ କରି କହିଛନ୍ତି, ହୋଲି ମହୋତ୍ସବ ହେଉଛି ମଜାଦାର ପାରମ୍ପରିକ ପର୍ବ। ପରସ୍ପର ଉପରେ ଅବିର ଓ ରଙ୍ଗପାଣି ପକାଇ ବସନ୍ତର ଆଗମନକୁ ପାଳନ କରିବା ହେଉଛି ଏହାର ଉଦ୍ଦେଶ୍ୟ।

ହୋଲି ସମୟରେ ବାହାରକୁ ବାହାରିବା ଜଣେ ମହିଳାଙ୍କ ପକ୍ଷେ ବିପଜ୍ଜନକ ବୋଲି ସେ ଶୁଣିଥିଲେ। ଦଳେ ପୁରୁଷ ତାଙ୍କ ସହିତ ଅସଦାଚରଣ କରିବା ସହିତ ତାଙ୍କ ଦେହରେ ରଙ୍ଗ ବୋଳିଥିଲେ। ଏହି ସମୟରେ ସେ ତାଙ୍କର ୩୫ଜଣ ସାଥୀଙ୍କ ସହିତ ଥିଲେ। ବିନା କୌଣସି ଉଦ୍ଦେଶ୍ୟରେ ତାଙ୍କର ଜଣେ ଜାପାନୀ ବନ୍ଧୁ ସେତେବେଳେ ଭିଡିଓ ଉତ୍ତୋଳନ କରି ପକାଇଥିଲେ। ହୋଲି ବିଷୟରେ କୌଣସି ନକାରାତ୍ମକ ବାର୍ତ୍ତା ଦେବା ତାଙ୍କର ଉଦ୍ଦେଶ୍ୟ ନ ଥିଲା। ମୂଳ ଭିଡିଓଟି ସେ ପୋଷ୍ଟ୍ କରିଥିଲେ, କିନ୍ତୁ ତାହା ଭାଇରାଲ୍ ହୋଇଯିବାରୁ ଭୟଭୀତ ହୋଇ ଡିଲିଟ୍ କରି ଦେଇଥିଲେ ।

ସେ ଆହୁରି କହିଛନ୍ତି, ସେଦିନର ଭିଡିଓ ‌‌ଯୋଗୁଁ ଅପମାନ ବୋଧ କରୁଥିବା ବ୍ୟକ୍ତିଙ୍କୁ ମୁଁ କ୍ଷମା ମାଗୁଛି । ପୁଲିସର କାର୍ଯ୍ୟାନୁଷ୍ଠାନ ଉପରେ ଭରସା ବ୍ୟକ୍ତ କରି ସେ କହିଛନ୍ତି, ଭାରତର ସବୁ କିଛି ତାଙ୍କୁ ଭଲ ଲାଗେ ଏବଂ ସେ ଅନେକ ଥର ଭାରତକୁ ଆସିଛନ୍ତି। ଏଭଳି ଏକ ଘଟଣା ଘଟିଲେ ବି ଆପଣ ଭାରତକୁ ଘୃଣା କରିପାରିବେ ନାହିଁ।’

Powered by Froala Editor