ପ୍ରେମରୁ ଗଢିଉଠିଥିଲା ଶାରୀରିକ ସମ୍ପର୍କ । ହେଲେ ନବମ ଶ୍ରେଣୀରେ ଗର୍ଭବତୀ ହୋଇଯାଇଥିଲେ ନାବାଳିକା । ଲୋକଲଜ୍ଜାରେ କିଛି ଉପାୟ ନପାଇ ୟୁଟ୍ୟୁବ ଦେଖି ପ୍ରସବ କରାଇଦେଲେ । ଏପରିକି ପଡୋଶୀଙ୍କ ଭୟରେ ନବଜାତକୁ ତଣ୍ଟି ଚିପି ହତ୍ୟା କରିଦେଲେ । ଏଭଳି ଚାଞ୍ଚଲ୍ୟକର ଘଟଣା ଘଟିଛି ନାଗପୁରରେ ।

ଇନ୍‌ଷ୍ଟାଗ୍ରାମ ଜରିଆରେ ଠାକୁର ନାମକ ଜଣେ ଯୁବକଙ୍କ ସଂସ୍ପର୍ଶରେ ନବମ ଶ୍ରେଣୀ ଛାତ୍ରୀ ଆସିଥିଲେ। ସେମାନଙ୍କ ମଧ୍ୟରେ ଶରୀରିକ ସମ୍ପର୍କ ଗଢ଼ିଉଠିବା ପରେ ନାବାଳିକା ଗର୍ଭଧାରଣ କରିଥିବା ଜଣାପଡ଼ିଛି। ନାବାଳିକାଙ୍କ ମା' ଏକ ମଲ୍‌ରେ କାମ କରୁଥିବାବେଳେ ଶୁକ୍ରବାର ଘରେ ରକ୍ତ ଦାଗ ଦେଖିବାକୁ ପାଇଥିଲେ। ନାବାଳିକା ତାଙ୍କ ମା'ଙ୍କୁ ବାଟବଣା କରିବାକୁ ଯାଇ ସେ ସବୁ ମାସିକ ଋତସ୍ରାବର ରକ୍ତ ଦାଗ ବୋଲି କହିଥିଲେ। କିନ୍ତୁ ବହୁ ପଚାରାପଚରି କରିବା ପରେ ନାବାଳିକା ଶେଷରେ ସବୁ ସତ କହିଦେଇଥିଲେ। ମା' ତୁରନ୍ତ ନାବାଳିକାଙ୍କୁ ମାୟୋ ଡାକ୍ତରଖାନା ଚିକିତ୍ସା ପାଇଁ ନେଇଥିଲେ। ସେଠାରେ ଡାକ୍ତରଖାନା କର୍ତ୍ତୃପକ୍ଷ ଏହାର ସୂଚନା ସ୍ଥାନୀୟ ପୋଲିସକୁ ଦେଇଥିଲେ।

ନବଜାତକର ମୃତଦେହକୁ ଏକ ବ୍ୟାଗ୍‌ରେ ଭର୍ତ୍ତି କରି ଘରଛାତ ଉପରେ ରଖିଥିବାବେଳେ ପୋଲିସ ମୃତଦେହକୁ ପୋଷ୍ଟମର୍ଟମ୍‌ ପାଇଁ ପଠାଇଦେଇଛି। ନାବାଳିକା ଘଣ୍ଟା ଘଣ୍ଟା ଫୋନ୍‌ରେ ଚାଟିଂ କରୁଥିବା ନେଇ ମା' ତାଙ୍କ ଫୋନ୍‌ଟିକୁ କିଛିଦିନ ପୂର୍ବେ ଭାଙ୍ଗି ଦେଇଥିଲେ। ତେବେ ନାବାଳିକା ଜଣକ ଉକ୍ତ ଯୁବକଙ୍କ ବିଷୟରେ ବେଶି କିଛି ଜାଣି ନ ଥିବା ପୋଲିସକୁ କହିଛନ୍ତି।

Powered by Froala Editor