ଚଳିତ ବର୍ଷ କର୍ଣ୍ଣାଟକ ବିଧାନସଭା ନିର୍ବାଚନ ହେବାକୁ ଥିବାବେଳେ ବିଜେପି-କଂଗ୍ରେସ ପ୍ରସ୍ତୁତିରେ ଲାଗିପଡ଼ିଲେଣି । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ନେତୃତ୍ୱରେ ଆମ୍ ଆଦମୀ ପାର୍ଟି (ଆପ) ମଧ୍ୟ ନିଜ ପ୍ରସ୍ତୁତିକୁ ତ୍ୱରାନ୍ୱିତ କରିଛି। ଏହି ପରିପ୍ରେକ୍ଷୀରେ କେଜ୍ରିୱାଲ ଆଜି ଦାବନଗେରରେ କର୍ମୀଙ୍କୁ ସମ୍ବୋଧିତ କରିଥିଲେ ।

ଦଳ ପକ୍ଷରୁ ଆୟୋଜିତ ପ୍ରଥମ ସମାବେଶରେ କେଜ୍ରିୱାଲ ବିଜେପି ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଛନ୍ତି। ଦିଲ୍ଲୀ ଅବକାରୀ ନୀତି ଦୁର୍ନୀତି ଘଟଣାରେ ମନୀଷ ସିସୋଦିଆଙ୍କୁ ସିବିଆଇ ଗିରଫ କରିଛି। ଏହି ପ୍ରସଙ୍ଗରେ କେଜ୍ରିୱାଲ ବର୍ଷିଛନ୍ତି। ଏଥିସହ ଲୋକାୟୁକ୍ତ କର୍ଣ୍ଣାଟକା ବିଜେପି ବିଧାୟକ ମଦାଲ ବିରୁପାକ୍ଷପ୍ପାଙ୍କ ଘରୁ କୋଟି କୋଟି ଟଙ୍କା ଠାବ କରିଥିଲେ ମଧ୍ୟ ତାଙ୍କୁ କାହିଁକି ଗିରଫ କରାଯାଇ ନାହିଁ ବୋଲି କେଜ୍ରିୱାଲ ପ୍ରଶ୍ନ କରିଛନ୍ତି।

କେଜ୍ରିୱାଲ କହିଛନ୍ତି, “କର୍ଣ୍ଣାଟକାରେ ୪୦% କମିସିନ ନେଉଥିବା ସରକାର ଅଛନ୍ତି।” “ନିକଟରେ କେନ୍ଦ୍ରମନ୍ତ୍ରୀ ଅମିତ ଶାହ କର୍ଣ୍ଣାଟକା ଆସିଥିଲେ ଓ ଲୋକଙ୍କୁ ପୂର୍ଣ୍ଣସଂଖ୍ୟା ଗରିଷ୍ଠତା ଦେବାକୁ ଆହ୍ୱାନ ଦେଇଥିଲେ। ଏହାଦ୍ୱାରା ଗୋଟିଏ ସ୍ଥାୟୀ ଦୁର୍ନୀତି ମୁକ୍ତ ସରକାର ଗଠନ ହୋଇପାରିବ ବୋଲି ସେ ଦାବି କରିଥିଲେ। ଏହି ସମୟରେ ତାଙ୍କୁ କେହି ମନେ ପକାଇ ଦେଇଥିଲେ ଯେ ରାଜ୍ୟରେ ଏବେ ବି ବିଜେପି ସରକାର ରହିଛି। ମୁଁ ତାଙ୍କୁ ପଚାରିବାକୁ ଚାହୁଁଛି ଯେ ୪ ବର୍ଷ ମଧ୍ୟରେ ତାଙ୍କ ସରକାର କାହିଁକି ଦୁର୍ନୀତିକୁ ହଟାଇ ପାରିଲା ନାହିଁ।

ଏଥିସହ ବିଜେପିକୁ କଟାକ୍ଷ କରି କେଜ୍ରିୱାଲ୍ କହିଛନ୍ତି, ‘‘ଯେଉଁ ବିଧାୟକଙ୍କ ଘରୁ ୮ କୋଟି ଟଙ୍କା ଜବତ ହୋଇଥିଲା, ଆସନ୍ତାବର୍ଷ ତାଙ୍କୁ ପଦ୍ମ ଭୂଷଣ ଦିଆଯିବ’’ । ସେ ଆହୁରି ମଧ୍ୟ କହିଛନ୍ତି ଯେ ‘ଡବଲ୍ ଇଞ୍ଜିନ’ ସରକାରରେ ଦୁର୍ନୀତି ଦ୍ୱିଗୁଣିତ ହୋଇଛି। ଆମକୁ ଏକ ‘ନୂତନ ଇଞ୍ଜିନ୍’ ସରକାର ଦରକାର।

Powered by Froala Editor