କୋଲକାତା: ମଙ୍ଗଳବାର ପଶ୍ଚିମବଙ୍ଗରେ ବିଧାନସଭା ନିର୍ବାଚନର ତୃତୀୟ ପର୍ଯ୍ୟାୟ ଭୋଟ ଗ୍ରହଣ କରିବାକୁ ଥିବା ବେଳେ ହାଇପ୍ରୋଫାଇଲ ଟାଲିଗଞ୍ଜ ଆସନରେ ତୃଣମୂଳ ପ୍ରାର୍ଥୀ ଅରୂପ ବିଶ୍ୱାସଙ୍କ ପାଇଁ ପ୍ରଚାର କରିବାକୁ ପହଞ୍ଚିଛନ୍ତି ସମାଜବାଦୀ ପାର୍ଟି ସାଂସଦ ଜୟା ବଚ୍ଚନ । ଜୟା କହିଛନ୍ତି, ଆମ ଦଳର ନେତା ଅଖିଳେଶ ଯାଦବ ତୃଣମୂଳ ସପକ୍ଷରେ ପ୍ରଚାର କରିବାକୁ ନିର୍ଦ୍ଦେଶ ଦେଇଛନ୍ତି । ମମତାଙ୍କ ପ୍ରତି ମୋ ମନରେ ଅତ୍ୟନ୍ତ ପ୍ରେମଭାବ ଓ ସମ୍ମାନ ରହିଛି । ସବୁ ପ୍ରକାର ଅତ୍ୟାଚାର ବିରୋଧରେ ଲଢ଼େଇ କରୁଥିବା ଏକମାତ୍ର ମହିଳା । ପଶ୍ଚିମବଙ୍ଗରେ ରୋଡ ସୋ କରୁଥିବା ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡା ଜୟାଙ୍କୁ ଟାର୍ଗେଟ କରିଛନ୍ତି । ନଡ୍ଡା କହିଛନ୍ତି, ଜୟା ଉତ୍ତର ପ୍ରଦେଶରୁ ଏଠାକୁ ଆସିଛନ୍ତି ପ୍ରଚାର କରିବାକୁ । ଅବଶ୍ୟ ଗଣତନ୍ତ୍ରରେ ସମସ୍ତଙ୍କ ଏ ଅଧିକାର ଅଛି । ୟୁପି ନିର୍ବାଚନରେ ଜୟାଙ୍କ ଦର୍ଶନ ମିଳିଲା ନାହିଁ । ଅଥଚ ପଶ୍ଚିମବଙ୍ଗକୁ ଆସିଛନ୍ତି । ଏଠାରେ ଆମେ ତାଙ୍କ ସ୍ୱାଗତ ଜଣାଉଛି । ବିଧାନସଭା ନିର୍ବାଚନ ଲଢ଼ୁଥିବା ବିଜେପି ପ୍ରାର୍ଥୀ କେନ୍ଦ୍ରମନ୍ତ୍ରୀ ବାବୁଲ ସୁପ୍ରିୟ ମଧ୍ୟ ଜୟାଙ୍କ ନିର୍ବାଚନ ପ୍ରଚାରକୁ ନେଇ ଟିପ୍ପଣୀ ଦେଇଛନ୍ତି ।