ନୂଆଦିଲ୍ଲୀ : ଆଜି ବିଜୟ ଦିବସ। ୧୯୭୧ ବାଂଲାଦେଶ ମୁକ୍ତି ଯୁଦ୍ଧ ବିଜୟର ସ୍ମୃତି ଦିବସ ପାଳନ କରାଯାଉଛି । ଏହି ଅବସରରେ ପ୍ରତିରକ୍ଷାମନ୍ତ୍ରୀ ରାଜନାଥ ସିଂହ, ସିଡିଏସ ବା ସେନା ପ୍ରମୁଖ ଜେନେରାଲ ଅନୀଲ ଚୌହାନ ଏବଂ ତିନି ବାହିନୀର ମୁଖ୍ୟ ଜାତୀୟ ଯୁଦ୍ଧ ସ୍ମାରକରେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ଉଭୟ ଭାରତ ଓ ବାଂଲାଦେଶ ବିଜୟ ଦିବସ ପାଳନ କରିବା ସହ ୧୯୭୧ ଯୁଦ୍ଧ ବିଜୟର ଗୌରବ ଗାଥାକୁ ମନେ ପକାଉଛନ୍ତି।
୧୯୭୧ ବାଂଲାଦେଶ ମୁକ୍ତି ଯୁଦ୍ଧରେ ପାକିସ୍ତାନ ଉପରେ ଭାରତର ବିଜୟକୁ ସ୍ମରଣ କରିବା ପାଇଁ ଆଜି ଦେଶ ଏହି ବିଜୟ ଦିବସ ପାଳନ କରୁଛି। ଯୁଦ୍ଧ ବୀରମାନଙ୍କ ତ୍ୟାଗ ଓ ବଳିଦାନକୁ ସ୍ମରଣ କରାଯାଇ ସେମାନଙ୍କୁ  ଶ୍ରଦ୍ଧାଞ୍ଜଳି ଅର୍ପଣ କରାଯାଉଛି । ୧୬ ଡିସେମ୍ବର ୧୯୭୧ରେ, ପାକିସ୍ତାନ ସେନା ବାହିନୀର ମୁଖ୍ୟ ଜେନେରାଲ ଆମୀର ଅବଦୁଲ୍ଲା ଖାନ ନିଆଜୀ ଭାରତ ନିକଟରେ ପରାସ୍ତ ହେବା ପରେ ୯୩ ହଜାର ସୈନ୍ୟଙ୍କ ସହିତ ଢାକାରେ ଲେଫ୍ଟନାଣ୍ଟ ଜେନେରାଲ ଜଗଜିତ ସିଂହ ଅରୋରାଙ୍କ ପାଖରେ ବିନା ସର୍ତ୍ତରେ ଆତ୍ମସମର୍ପଣ କରିଥିଲେ। ଏହି ଯୁଦ୍ଧର  ପରିସମାପ୍ତି ସହ ବାଂଲାଦେଶ ଏକ ସ୍ୱାଧୀନ ରାଷ୍ଟ୍ର ଭାବେ ଜନ୍ମ ନେଇ ଥିଲା।
ବିଜୟ ଦିବସ ପୂର୍ବରୁ ଆର୍ମି ହାଉସରେ ଆୟୋଜିତ ଆଟ୍ ହେମ୍ ରିସେପସନରେ ରାଷ୍ଟ୍ରପତି ଦୌପଦୀ ମୁର୍ମୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏବଂ ସେନା ମୁଖ୍ୟ ଜେନେରାଲ ମନୋଜ ପାଣ୍ଡେ ଯୋଗ ଦେଇଥିଲେ।ପ୍ରଧାନମନ୍ତ୍ରୀ ମୋଦୀ ରାଜନାଥ ସିଂଙ୍କ ସହ ଦିଲ୍ଲୀରେ ବିଜୟ ଦିବସ ଅବସରରେ ଏକ ପ୍ରଦର୍ଶନୀ ପରିଦର୍ଶନ କରିଛନ୍ତି ।

Powered by Froala Editor