ଭୁବନେଶ୍ୱର : ଡିସେମ୍ବର ୩ତାରିଖରେ ପୁଣି ଓଡ଼ିଶା ଆସିପାରନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ରାଷ୍ଟ୍ରପତି ରମାଦେବୀ ମହିଳା ବିଶ୍ୱବିଦ୍ୟାଳୟର ପ୍ରତିଷ୍ଠା ଦିବସରେ ମୁଖ୍ୟଅତିଥି ଭାବେ ଯୋଗ ଦେଇପାରନ୍ତି । ରାଷ୍ଟ୍ରପତିଙ୍କ ଭୁବନେଶ୍ୱର ଗସ୍ତ ଅବସରରେ ଶୁକ୍ରବାର ରାଜଭବନରେ ଭେଟି ଏ ନେଇ ଅନୁରୋଧ କରିଛନ୍ତି ରମାଦେବୀ ମହିଳା ବିଶ୍ୱବିଦ୍ୟାଳୟର କୁଳପତି ପ୍ରଫେସର ଅପରାଜିତା ଚୌଧୁରୀ ଓ ପୂର୍ବତନ ଛାତ୍ରୀସଂଘ(ଆଲୁମ୍ନି)ର ସଦସ୍ୟାମାନେ । ସାକ୍ଷାତ ସମୟରେ ରାଷ୍ଟ୍ରପତି ରମାଦେବୀ ମହିଳା ବିଶ୍ୱବିଦ୍ୟାଳୟ ଆସିବେ ବୋଲି ମୌଖିକ ଭାବେ କହିଥିବା ସୂଚନା ମିଳିଛି । ତେବେ ରାଷ୍ଟ୍ରପତି ଭବନ ପକ୍ଷରୁ କୌଣସି ଚୂଡ଼ାନ୍ତ ସୂଚନା ଦିଆଯାଇନାହିଁ । ଡିସେମ୍ବର ୩ରେ ରମାଦେବୀ ମହିଳା ବିଶ୍ୱବିଦ୍ୟାଳୟ ଅଷ୍ଟମ ପ୍ରତିଷ୍ଠା ଦିବସ ପାଳନ କରିବ । ସେହିଦିନ ମା’ ରମାଦେବୀଙ୍କ ୧୨୩ତମ ଜନ୍ମ ଦିବସ ବି ପାଳନ କରାଯିବ ।   

ତେଣୁ ଏହି ଅବସରରେ ରାଷ୍ଟ୍ରପତି ମୁଖ୍ୟଅତିଥି ଭାବେ ଯୋଗ ଦେବା ପାଇଁ ରମାଦେବୀ ମହିଳା ମହାବିଦ୍ୟାଳୟର ପୂର୍ବତନ ଛାତ୍ରୀମାନେ ଓ କର୍ତ୍ତୃପକ୍ଷ ଅନୁରୋଧ କରିବା ସହିତ ଆଶା ବାନ୍ଧି ବସିଛନ୍ତି ।  ଉଲ୍ଲେଖଯୋଗ୍ୟ, ୧୯୭୫ ମସିହାରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ରମାଦେବୀ ମହିଳା ମହାବିଦ୍ୟାଳୟରେ ପଢ଼ିବା ସହ ଛାତ୍ରୀନିବାସରେ ମଧ୍ୟ ରହୁଥିଲେ । ତେଣୁ ତାଙ୍କର ବହୁ ସ୍ମୃତି ଏହି ଶିକ୍ଷାନୁଷ୍ଠାନ ସହ ଜଡ଼ିତ ।

Powered by Froala Editor