ଚାଲିଛି ବର୍ଷା ଦିନ । ସାରା ରାଜ୍ୟ ଏବେ ବର୍ଷାରେ ଭିଜୁଛି । ଯାହା ଆମ ନିତିଦିନିଆ ଜୀବନଶୈଳୀ ଉପରେ ଗଭୀର ପ୍ରଭାବ ପକାଇଛି । କିନ୍ତୁ ଆମକୁ ଘରୁ ବାହାରିବାକୁ ପଡ଼ୁଛି । ଏକ ସାଧାରଣ ଲାଇଫରେ ପିଲାଙ୍କର ସ୍କୁଲ, ଅଫିସ ଯିବା, ମାର୍କେଟ ଯିବା ଇତ୍ୟାଦି ଅନ୍ତର୍ଭୁକ୍ତ । ତେବେ ବର୍ଷାରେ ଗାଡ଼ି ଚଲାଇ ଯିବା ବେଳେ ବିଭିନ୍ନ ସମସ୍ୟା ଉପୁଜିଥାଏ। ତେଣୁ ସୁରକ୍ଷା ଦୃଷ୍ଟିରୁ କେତେକ ଦିଗ ପ୍ରତି ସଜାଗ ରହିବା ଆବଶ୍ୟକ…

*ଗାଡ଼ି ଚଲାଉଥିଲେ ବର୍ଷାଦିନେ ପାଖରେ ରେନ୍‌କୋଟ୍‌ ନିହାତି ରଖନ୍ତୁ। ନଚେତ୍‌ ହଠାତ୍‌ ବର୍ଷା ହେଲେ ଭିଜିଯିବା ସହ ଥଣ୍ଡା, ଜ୍ୱର, କାଶ ଭଳି ବିଭିନ୍ନ ସମସ୍ୟା ଉପୁଜିପାରେ। ଯଦି ପାଖରେ ରେନ୍‌କୋଟ୍‌ ନାହିଁ, ତେବେ ତରବର ହୋଇ ସ୍ପିଡ୍‌ ଗାଡି ଚଲାଇ ଦୁର୍ଘଟଣାର ସମ୍ମୁଖୀନ ହେବା ବଦଳରେ ଧୀରେ ଧୀରେ ଚଲାଇ ନିକଟରେ ଥିବା କୌଣସି ସୁରକ୍ଷିତ ସ୍ଥାନ ଦେଖି ଠିଆ ହୋଇ ଯାଆନ୍ତୁ।

*ଅନେକ ସମୟରେ ଦେଖାଯାଏ ବର୍ଷାରେ ବଡ଼ ବଡ଼ ଗଛମୂଳେ ଯାତ୍ରୀ ଠିଆ ହୁଅନ୍ତି। ହେଲେ ଏହା ବିପଜ୍ଜନକ। କାରଣ ବେଳେବେଳେ ବର୍ଷାରେ ଗଛ ଡାଳ ଭାଙ୍ଗିବା କିମ୍ବା ଘଡ଼ଘଡ଼ି ପଡ଼ିବା ଦ୍ୱାରା ଗଛ ଜଳିଯାଇ ଅନେକ ଦୁର୍ଘଟଣା ଘଟିଥିବାର ନଜିର ରହିଛି।

*ଆଉ ଏକ ଗୁରୁତ୍ୱପୂର୍ଣ୍ଣ କଥା ମନେରଖନ୍ତୁ। ବର୍ଷାବେଳେ ଇଲେକ୍‌ଟ୍ରି ଖୁଣ୍ଟ ମୂଳରେ ଠିଆ ହେବା ବିପଦପୂର୍ଣ୍ଣ। ଏହାଦ୍ୱାରା ବିଜୁଳି ସଂସ୍ପର୍ଶରେ ଆସି ବିଭିନ୍ନ ଦୁର୍ଘଟଣା ଘଟିପାରେ।

*ଗାଡ଼ି ଚଲାଉଥିବା ବେଳେ ବର୍ଷା ହେଲେ କିମ୍ବା ବର୍ଷା ଛାଡ଼ିବା ପରେ ରାସ୍ତା ଖସଡ଼ା ହୋଇଥାଏ। ଏମିତିରେ ସ୍ପିଡ୍‌ ଚଲାନ୍ତୁ ନାହିଁ କିମ୍ବା ହଠାତ୍‌ ବ୍ରେକ୍‌ କରନ୍ତୁ ନାହିଁ, ନଚେତ୍‌ ଗାଡ଼ି ସ୍ଲିପ୍‌ ହୋଇପାରେ। ତା’ଛଡ଼ା ଖାଲ ସ୍ଥାନରେ ପାଣି ଜମାଥିବାରୁ ଦୁର୍ଘଟଣାର ଆଶଙ୍କା ଥାଏ। ତେଣୁ ବର୍ଷାରେ ଅଧିକ ସ୍ପିଡ୍‌ରେ ଗାଡ଼ି ନ ଚଲାଇ ଧୀରେ ଏବଂ ସତର୍କତାର ସହ ଚଲାଇବା ବୁଦ୍ଧିମତ୍ତାର କାର୍ଯ୍ୟ।

*ବର୍ଷା ସମୟରେ ହେଲ୍‌ମେଟ୍‌ ଗ୍ଲାସ୍‌ ଉପରେ ପାଣି ପଡ଼ି କୁହୁଡ଼ି ଭଳି ଦେଖାଯାଏ। ତେଣୁ ଅନେକେ ବିନା ହେଲ୍‌ମେଟ୍‌ରେ ଗାଡ଼ି ଚଲାଇଥା’ନ୍ତି। ହେଲେ ଏପରି କରିବା ଆଦୌ ନିରାପଦ ନୁହେଁ।

Powered by Froala Editor