ରବିବାର ବେତନଟୀ ପୁଲିସ ପୁରିନ୍ଦା ଗାଁ ନିକଟରେ ଚଢ଼ାଉ କରି ୬ ଗୋଟି ଗୋରୁ ବୋଝେଇ ପିକଅପ ଭ୍ୟାନକୁ ଜବତ କରି ଥାନାକୁ ଆଣିବା ସହିତ ଘଟଣାରେ ଜଡିତ ୪ ଜଣଙ୍କୁ ଅଟକ ରଖିଛି l

ସୂଚନା ମୁତାବକ ମୟୁରଭଞ୍ଜ ଏବଂ ବାଲେଶ୍ୱରରୁ ବେଆଇନ ଭାବେ ଗୋ ଚାଲାଣ ନେଇ ଖବର ପାଇବା ପରେ ବେତନଟୀ ଥାନା ଆଇଆଇସି ରେଣୁବାଳା ସାହୁ ଚଢାଉ କରିଥିଲେ l ଚଢାଉ ସମୟରେ ଗୋରୁ ବୋଝେଇ ପିକଅପ ଭ୍ୟାନ ଗୁଡିକ ପୁଲିସକୁ ଚକମା ଦେଖାଇ ବେତନଟୀ ବଙ୍ଗଳାଛକରୁ ଦହିକୋଟି ଅଭିମୁଖେ ଫେରାର ହେବାକୁ ଚେଷ୍ଟା କରିଥିଲେ l ତେବେ ଆଇଆଇସିଗାଡି ଗୁଡିକର ପିଛାକରି ରାତି ୩ଟା ପାଖାପାଖି ସମୟରେ ପୁରିନ୍ଦା - ସଂସା ରାସ୍ତାରେ ଅଟକାଇ କାବୁକରିବାରେ ସକ୍ଷମ ହୋଇଥିଲେ l ଜବତ ଗାଡି ମଧ୍ୟରେ ଓଆର-୦୧ୟୁ-୨୨୩୯,ଓଡି-୦୧ ଏଜେ-୫୨୭୦, ଓଡି -୦୧ଏ-୦୨୯୬, ଓଡି-୦୧ଇ-୧୫୨୫, ଓଡି-୧୧ପି- ୬୩୧୫, ଓଡି -୦୧ଏମ-୫୯୭୪ ଏବଂ ଓଆର-୦୧ୟୁ-୨୨୩୯ ନମ୍ବର ବିଶିଷ୍ଟ ଗାଡି ରହିଛି l ଏନେଇ ବେତନଟୀ ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି l

ଜବତ ୬ଗୋଟି ପିକଅପ ଭ୍ୟାନରୁ ପ୍ରାୟ ଦୁଇଶହରୁ ଉର୍ଦ୍ଧ୍ୱ ଗୋରୁ, ଗାଈ, ବାଛୁରୀ ଗୁଡିକୁ ଉଦ୍ଧାର କରାଯାଇଛି l ଏପଟେ ଦୀର୍ଘ ସମୟ ଧରି ପିକଅପ ଭିତରେ ଟଙ୍ଗା ହୋଇ ରହିବାରୁ ଅଣନିଶ୍ୱାସୀ ପରେ ଅସୁସ୍ଥ ହୋଇପଡିଥିବା ବଳଦ,ଗାଈ ଏବଂ ବାଛୁରୀ ମାନଙ୍କର ଚିକିତ୍ସା ପାଇଁ ଭ୍ରାମ୍ୟମାଣ ପ୍ରାଣୀ ଚିକିତ୍ସାସେବା ଟିମ ସମେତ ବେତନଟୀ ପଶୁଡାକ୍ତରଖାନର ଟିମ ଘଟଣାସ୍ଥଳରେ ପହଞ୍ଚିଛନ୍ତି l ୬ଗୋଟି ଗାଡ଼ିରୁ ମୋଟ ୧୯୮ଟି ବଳଦ, ଗାଈ ଏବଂ ବାଛୁରୀଛୁଆ ଉଦ୍ଧାର କରାଯାଇଥିବା ବେଳେ ୧୮ଟିର ମୃତ୍ୟୁ ହୋଇଯାଇଛି l ଅନ୍ୟ ଗୋରୁ ଗାଈ ଗୁଡିକୁ ବାଲେଶ୍ୱର ଜିଲ୍ଲାସ୍ଥିତ ଗୋଶାଳାକୁ ସ୍ଥାନାନ୍ତରିତ କରାଯାଇଛି l

ତେବେ ଏଭଳି ଅମାନବୀୟ ଢଙ୍ଗରେ ପଶ୍ଚିମବଙ୍ଗକୁ ବେଆଇଆନ ଗୋ ଚାଲାଣ ଘଟଣାକୁ ନେଇ ସ୍ଥାନୀୟ ଜନସାଧାରଣଙ୍କ ମଧ୍ୟରେ ଚାପା ଉତ୍ତେଜନା ଦେଖାଦେଇଥିବା ବେଳେ ପରିସ୍ଥିତିକୁ ଦୃଷ୍ଟିରେ ରଖି ବେତନଟୀ ଥାନା ଅଧିକାରୀ ଅଧିକ ପୁଲିସଫୋର୍ସ ମଗାଇଛନ୍ତି l

Powered by Froala Editor