ବୈତରଣୀରେ ଜଳସ୍ତର ଧୀରେ ଧୀରେ କମିବାରେ ଲାଗିଛି । ଶନିବାର ରାତି ସୁଦ୍ଧା କେନ୍ଦୁଝର ଜିଲ୍ଲା ଆନନ୍ଦପୁର ଠାରେ ଜଳସ୍ତର ବିପଦ ସଙ୍କେତ ଟପିଥିବାବେଳେ ରବିବାର ଅପରାହ୍ନ ବେଳକୁ ଜଳସ୍ତର ଖସିଛି । ତଥାପି କେନ୍ଦୁଝର ଜିଲ୍ଲା ହାଟଡିହି ବ୍ଲକ୍‌ର ୫ ପଞ୍ଚାୟତର ଅବସ୍ଥା ସଙ୍ଗୀନ ରହିଛି । ଏହି ପଞ୍ଚାୟତ ଗୁଡିକର ୧୫ଟି ଗାଁରେ ପାଣି ପଶିଯାଇଛି ।

ହାଟଡିହି ବ୍ଲକର ଆଇତିପୁର ପଞ୍ଚାୟତର ରାଘବପୁର ଗାଁ ନିକଟରେ ବନ୍ୟାଜଳ ରାସ୍ତା ଉପରେ ୪ଫୁଟ ଉଚ୍ଚରେ ପ୍ରବାହିତ ହେଉଥିବାରୁ ରାଘବପୁର ଗ୍ରାମକୁ ଯୋଗାଯୋଗ ସମ୍ପୁର୍ଣ୍ଣ ବିଛେଦ କରିପକାଇଛି । ଗାଁରେ ୫ଶହରୁ ଉର୍ଦ୍ଧ ଲୋକ ବସବାସ କରୁଥିବାବେଳେ ଲୋକମାନେ ବାହାରକୁ ବାହାରି ପାରି ନାହାନ୍ତି । ସେହିପରି ଏହି ପଞ୍ଚାୟତର ନୁଆଗଁ ଗ୍ରାମଟି ବାହ୍ୟ ଜଗତରୁ ବିଛିନ୍ନ ହୋଇ ପଡିଛି । ଗାଁ ରାସ୍ତା ଉପରେ ୩ଫୁଟ ଉଚ୍ଚର ପାଣି ଚାଲୁଥିବାରୁ ବାଇକ, କିମ୍ବା ସାଇକେଲ ମଧ୍ୟ ବାହାରକୁ ବାହାରି ପାରୁ ନାହିଁ । ଗାଁ ଲୋକମାନେ ଗାଁ ଭିତରେ ଜଳବନ୍ଦୀ ଜୀବନ ବିତାଉଛନ୍ତି ।

ସେହିପରି ଏହି ପଞ୍ଚାୟତର ଆଇତିପୁର, ମଦରଙ୍ଗା, ଅମୃତପୁର, ମଧୁପୁର ଆଦି ଗ୍ରାମ ଗୁଡିକ ପାଣି ଘେର ଭିତରେ ରହିଛି । ଆମ୍ବୋ ନିକଟରେ ଅସମ୍ପୁର୍ଣ୍ଣ ହୋଇ ପଡିଥିବା ନଦୀବନ୍ଧ ଯୋଗୁଁ ସେହିବାଟେ ବନ୍ୟାଜଳ ପ୍ରବେଶ କରି ସମଣା, ଆମ୍ବୋ ପଞ୍ଚାୟତର ଅନେକ ଗାଁକୁ ଘେରି ଯାଇଛି । ତେଲସିଙ୍ଗା- କରଗୋଳା ରାସ୍ତା ବୁଡି ଯିବାରୁ କରଗୋଳା ଗାଁକୁ ଯାତାୟତ ବନ୍ଦ ହୋଇ ଯାଇଥିବାବେଳେ ବାହାରିପୁର ନିକଟରେ ରାସ୍ତା ବୁଡିଯିବାରୁ ସମଣା, ଆଗିରିଆ, ଚାପୁଣ୍ଡିଆ, କଦମ୍ବଡିହି ଗ୍ରାମ ପାଣିଘେରରେ ରହିଛି ।

ହାବଳେଶ୍ୱର ପଞ୍ଚାୟତର ବାଲିପଦା ଗାଁ ପାଣି ଘେରରେ ଥିବା ସୁଚନା ମିଳିଛି । ଆମ୍ବୋ ପଞ୍ଚାୟତର ଅଣତିରା ନିକଟରେ ଟୁକୁଣା-ଆମ୍ବୋ ରାସ୍ତାରେ ପାଣି ଚାଲୁଥିବାରୁ ଗମନାଗମନ ବିଛେଦ ହୋଇ ପଡିଛି । ଏହି ସବୁ ଅଞ୍ଚଳରେ କ୍ଷୟକ୍ଷତିର କୌଣସି ସୁଚନା ମିଳିନଥିବାବେଳେ କେବଳ ପନିପରିବା ଓ ଧାନ ଚାଷରେ ବ୍ୟାପକ କ୍ଷୟକ୍ଷତି ହୋଇଥିବା ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି । ଅନେକ ଲୋକଙ୍କ ପୋଖରୀ ଗୁଡିକରେ ବନ୍ୟାଜଳ ପ୍ରବେଶ କରି ଉଛୁଳି ଉଠିବାରୁ ମାଛଚାଷୀମାନେ କ୍ଷତିଗ୍ରସ୍ଥ ହୋଇଛନ୍ତି ।

Powered by Froala Editor