ସବୁବେଳେ ଲୋକଙ୍କ ପାଖରେ ରହିଛି ସରକାର । ଆଉ ସରକାରୀ ସୁବିଧା ହାତ ପାହାନ୍ତାରେ । ଏଭଳି କିଛି ନାରା ଦେଇ ଆଗେଇ ଚାଲିଛି ବିକାଶ । ହେଲେ କେନ୍ଦୁଝର ଜିଲ୍ଲା ତେଲକୋଇ ବ୍ଲକ୍ ତାଳପବ୍ର ମୁଣ୍ଡାସାହିରେ ଯେଉଁ ଦୃଶ୍ୟ ଦେଖିବାକୁ ମିଳିଛି ତାହା ଦେଖିଲେ ଆପଣ ବି ଭାବିବେ ଏ କିଭଳି ବିକାଶ?

ନଦୀରେ ଭରା ପାଣି । ମୁଣ୍ଡେ ମୁଣ୍ଡେ ପାଣି ଭିତରେ ଜଣେ ପ୍ରସୂତିିଙ୍କୁ କିଭଳି ହାତଗୋଡ ବାନ୍ଧି ନଦୀ ପାର କରାଯାଉଛି ତାହା ଦେଖିଲେ ଯେକେହି ବି ବିକାଶର ନାଁକୁ ତୁଚ୍ଛ ମନେ କରିବ । ଘଟଣାଟି ଏମିତି । ମୁଣ୍ଡା ସାହିରେ ଗତକାଲି ବିଳମ୍ବିତ ରାତିରୁ ମୁଣ୍ଡା ସାହିର କୁମର ମହାରଣାଙ୍କ ସ୍ତ୍ରୀ ବାସନ୍ତୀ ମହାରଣାଙ୍କର ଗର୍ଭ ଯନ୍ତ୍ରଣା ଆରମ୍ଭ ହୋଇଥିଲା ।

ଅନ୍ୟପଟେ ଗତକାଲି ଠାରୁ ପ୍ରବଳ ବର୍ଷା ଲାଗିରହିଥିବାରୁ କୌଣସି ଯୋଗାଯୋଗ ସୁବିଧା ହୋଇପାରିନଥିଲା । ଶନିବାର ସକାଳୁ ଗାଁରେ ନେଟୱାର୍କ ନଥିବାରୁ ନେଟୱାର୍କ ଥିବା ସ୍ଥାନକୁ ଯାଇ ଫୋନ ଯୋଗେ ଆମ୍ବୁଲାନ୍ସକୁ ଖବର ଦିଆଯାଇଥିଲା । ତେଲକୋଇରୁ ଆମ୍ବୁଲାନ୍ସ ଆସି ପହଞ୍ଚିଥିଲା । ହେଲେ ମୁଣ୍ଡା ସାହିକୁ ରାସ୍ତା ନଥିବାରୁ ଆମ୍ବୁଲାନ୍ସ ଯାଇପାରିନଥିଲା।

ଫଳରେ ସାହିର କିଛି ଯୁବକ ଖଟିଆରେ ବୋହି ଗର୍ଭବତୀଙ୍କୁ ସମାକୋଇ ନଦୀ ପାର କରିବାକୁ ଚେଷ୍ଟା କରିଥିଲେ । ତେବେ ନଦୀର ପାଣି ଅଧିକା ଥିବାରୁ ଗର୍ଭବତୀଙ୍କୁ ନଦୀ ପାର କରାଇ ପାରିନଥିଲେ । ସେତେବେଳକୁ ବହୁତ ଡେରି ହୋଇଯାଇଥିଲା । ସ୍ବାସ୍ଥ୍ୟ ସେବା ନପାଇ ଗର୍ଭବତୀ ମହିଳା ଜଣଙ୍କ ମୃତ ଶିଶୁକୁ ଜନ୍ମ ଦେଇ ବେହୋସ ହୋଇଯାଇଥିଲେ । ଗର୍ଭବତୀଙ୍କୁ ନଦୀ ପାର କରାଇବାରେ ବିଫଳ ହେବା ପରେ ଆମ୍ବୁଲାନ୍ସ ଫେରିଯାଇଥିଲା । ଗର୍ଭବତୀଙ୍କ ଅବସ୍ଥା ଗୁରୁତର ଥିବାରୁ ଅଗ୍ନିଶ୍ରମ ବିଭାଗକୁ ଖବର ଦିଆଯାଇଥିଲା । ଘଟଣା ସ୍ଥଳରେ ଅଗ୍ନିଶ୍ରମ ବାହିନୀ ପହଞ୍ଚି ଦଉଡି ଓ ଲାଇଫ ଜ୍ୟାକେଟ ସାହାଯ୍ୟରେ ଗର୍ଭବତୀଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଛନ୍ତି।

ତେବେ ସାହିକୁ ରାସ୍ତା ନଥିବାରୁ ଲୋକେ ବହୁ ପ୍ରତିବାଦ କରିଥିଲେ । ଏପରିକି ନିର୍ବାଚନ ବି ବର୍ଜନ କରିଥିଲେ । ତାସତ୍ତ୍ୱେ ପ୍ରଶାସନ ଶୁଣିଲାନି । ଯାହାର ପରିଣାମ ଏଭଳି ନିରୀହ ପ୍ରସୂତିଙ୍କୁ ଦେବାକୁ ପଡିଲା । ମୃତ ଶିଶୁକୁ ଜନ୍ମ ଦେବା ପରେ ବି ଯନ୍ତ୍ରଣାରେ ଛଟପଟ ହୋଇ ଭରା ନଦୀ ପାର ହେବାକୁ ପଡିଲା ।

Powered by Froala Editor