ଭୁବନେଶ୍ୱର: ରାଜ୍ୟ ମନ୍ତ୍ରୀ ପରିଷଦ ବୈଠକରେ ୨୦୨୨-୨୩ ଆର୍ଥିକ ବର୍ଷ ପାଇଁ ପୂର୍ଣ୍ଣାଙ୍ଗ ବଜେଟକୁ ଅନୁମୋଦନ ମିଳିଛି । ଏଥର ବଜେଟର ଆକାର ପ୍ରାୟ ୨ ଲକ୍ଷ ୧୦ ହଜାର କୋଟି ଥିବା ଜଣାପଡ଼ିଛି । ବଜେଟରେ ସ୍ୱାସ୍ଥ୍ୟ, ପର୍ୟ୍ୟଟନ, ଭିତ୍ତିଭୂମି, ନିର୍ମାଣ କାର୍ୟ୍ୟ, ଶିକ୍ଷାକୁ ସର୍ବାଧିକ ଅର୍ଥ ବରାଦ କରାଯାଇଛି । ଶ୍ରୀକ୍ଷେତ୍ର ଓ ଏକାମ୍ରକ୍ଷେତ୍ର ସମେତ ବିଭିନ୍ନ ଐତିହ୍ୟ ଓ ପର୍ୟ୍ୟଟନ କ୍ଷେତ୍ରର ବିକାଶ ପ୍ରକଳ୍ପ ପାଇଁ ଅର୍ଥ ବରାଦ କରାଯାଇଛି ।

ଶୁକ୍ରବାର ସନ୍ଧ୍ୟା ସାଢ଼େ ୫ଟାବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ମନ୍ତ୍ରୀ ପରିଷଦ ବୈଠକ ଅନୁଷ୍ଠିତ ହୋଇଥିଲା । ନବଗଠିତ ମନ୍ତ୍ରିମଣ୍ଡଳର ଏହା ପ୍ରଥମ ବୈଠକ । 

ପୂର୍ଣ୍ଣାଙ୍ଗ ବଜେଟ ମନ୍ତ୍ରୀ ପରିଷଦର ଅନୁମୋଦନ ପାଇଥିବାବେଳେ ଖୁବଶୀଘ୍ର ଏହାକୁ କ୍ୟାବିନେଟରେ ଆଗତ କରି ପାରିତ କରାଯିବ । ଆସନ୍ତା ଜୁଲାଇ ୨ରୁ ବିଧାନସଭାର ମୌସୁମୀ ଅଧିବେଶନ ଅନୁଷ୍ଠିତ ହେବ । ଅଗଷ୍ଟ ୪ ମାସ ପର୍ୟ୍ୟନ୍ତ ଅଧିବେଶନ ଚାଲିବ । ପ୍ରଥମ ଦିନରେ ହିଁ ଅର୍ଥ ମନ୍ତ୍ରୀ ନିରଞ୍ଜନ ପୂଜାରୀ ୨୦୨୨-୨୩ ପାଇଁ ପୂର୍ଣ୍ଣାଙ୍ଗ ବଜେଟ ଆଗତ କରିବେ । ଜୁଲାଇ ୩୦ରେ ବ୍ୟୟମଞ୍ଜୁରୀ ବିଲ୍‌ ଉପସ୍ଥାପନ ହେବ । ପଞ୍ଚାୟତ ଓ ପୌର ନିର୍ବାଚନ ଯୋଗୁ ୨୦୨୨-୨୩ ପାଇଁ ଗତ ମାର୍ଚ୍ଚରେ ୪ ମାସିଆ କାମଚଳା ବଜେଟ ପାରିତ ହୋଇଥିଲା । ୪ ମାସ ପାଇଁ ୧ ଲକ୍ଷ ୬ ହଜାର କୋଟି ବ୍ୟୟବରାଦ କରାଯାଇଥିଲା ।

Powered by Froala Editor