କେନ୍ଦୁଝର ଜିଲ୍ଲା ତେଲକୋଇ ଥାନା ଭିମକାଣ୍ଡ ପଂଚାୟତ ଗୋଳା ଗାଡିଆ ଗ୍ରାମରେ ଟ୍ରକ୍ ଚପାଇ ଜଣଙ୍କୁ ହତ୍ୟା କରାଯାଇ ଥିବା ଅଭିଯୋଗ ହୋଇଛି । ମୃତକ ହେଲେ ସନାତନ ମହାକୁଡ (୫୫) । ପୂର୍ବ ଶତ୍ରୁତାକୁ ନେଇ ଏହି ଅମାନୁଷିକ କାଣ୍ଡ ଘଟିଥିବା ବେଳେ ଅଭିଯୁକ୍ତ ଚାଳକ ଅରୁଣ ମହାନ୍ତ (୩୪) ତେଲକୋଇ ଥାନାରେ ଆତ୍ମ ସମର୍ପଣ କରିଛି ।

ଅଭିଯୋଗ ଅନୁଯାୟୀ ,ଗୋଳା ଗାଡିଆ ଗ୍ରାମର ସନାତନ ମହାକୁଡ ବୁଧବାର ରାତିରେ ନିକଟସ୍ଥ ଉଦୟଗିରି ଗ୍ରାମରୁ ମୋଟର ସାଇକେଲ (ଓଆର ୧୯ ଏଲ ୪୮୩୯) ଯୋଗେ ନିଜ ଘରକୁ ଫେରୁଥିଲେ । ଉକ୍ତ ସମୟରେ ବିପରୀତ ଦିଗରୁ ସେହି ଗ୍ରାମର ଟ୍ରକ୍ ଚାଳକ (ଓଆର୍ ୦୯ ଏଲ ୨୯୩୧) ନମ୍ୱର ବିଶିଷ୍ଟ ଦଶ ଚକିଆ ଟ୍ରକକୁ ନେଇ ପଞ୍ଚୁ ସାହି ନିକଟରେ ସନାତନ ଙ୍କୁ ଧକ୍କା ଦେଇଥିଲା । ସନାତନ ରାସ୍ତା କଡକୁ ଛିଟିକି ପଡ଼ିଥିବା ବେଳେ ଚାଳକ ଅରୁଣ ପୁନର୍ବାର ଟ୍ରକ୍ କୁ ରାସ୍ତା ତଳକୁ ଊହ୍ଲାଇ ସନାତନ ଉପରକୁ ଚଢାଇ ଥିଲା । ଏହା ପରେ ଚାଳକ ଟ୍ରକ୍ କୁ ନେଇ ଫେରାର ହେବାକୁ ଉଦ୍ୟମ କରିଥିବା ବେଳେ ଗାଡ଼ିଟି ଏକ ଗର୍ତରେ ଫସି ରହିଥିବାରୁ ଫେରାର ଉଦ୍ୟମ ଫେଲ ମରିଥିଲା । ଏବଂ ପରବର୍ତ୍ତୀ ମୁହୁର୍ତରେ ଅଭିଯୁକ୍ତ ଅରୁଣ ତେଲକୋଇ ଥାନାରେ ଆସି ଆତ୍ମ ସମର୍ପଣ କରିଥିଲା ।

ଖବର ପାଇ ତେଲକୋଇ ପୁଲିସ୍ ଘଟଣା ସ୍ଥଳରେ ପହଞ୍ଚି ଥିଲା । ପୂର୍ବ ଶତ୍ରୁତାକୁ ନେଇ ଟ୍ରକ୍ ଚାଳକ ଅରୁଣ କିଛି ଦିନ ପୂର୍ବେ ସନାତନ ଙ୍କୁ ହତ୍ୟା କରିବାକୁ ଧମକ ଦେଇଥିଲା । ରଜ ସୁଯୋଗ ନେଇ ଅରୁଣ ସନାତନ ଉପରେ ଗାଡ଼ି ଚଢାଇ ହତ୍ୟା କରିଛି ।