ଚନ୍ଦ୍ରଶେଖରପୁର: ପ୍ରେମ ହେଲା ସୋସିଆଲ ମିଡିଆ ଜରିଆରେ । ଠକ ପ୍ରେମିକ ଏମିତି ଜାଲ ବିଛାଇଲା ଯେ ଯୁବତୀ ଜଣକ ପୂରା ଅନ୍ଧ ହୋଇଗଲେ । ବିନା ଦେଖାଚାହାଁରେ ବି ନିବିଡ଼ି ପ୍ରେମ ହୋଇଗଲା । ଏହା ପରେ ଧୂର୍ତ୍ତ ଯୁବତୀଙ୍କୁ ଇମୋସନାଲ ବ୍ଲାକମେଲିଂ କରିବା ଆରମ୍ଭ କରିଦେଲା । ବୁଝି ପାରିଲେନି ଯୁବତୀ । ପ୍ରେମିକର ଦୁଃଖ ସହି ନ ପାରି ଆକାଉଣ୍ଟକୁ ଟଙ୍କା ପଠାଇ ଚାଲିଲେ । ହଜାର କି ପାଞ୍ଚ ହଜାର ନୁହେଁ, ପୂରା ୨୬ ଲକ୍ଷ ଟଙ୍କା ଦେଇଦେଲେ ଯୁବତୀ । ଏହା ପରେ ଧୂର୍ତ୍ତ ଗାଏବ ହୋଇଗଲା ସୋସିଆଲ ମିଡିଆରୁ । ଏବେ ଯୁବତୀ ଥାନାର ଦ୍ୱାରସ୍ଥ ହୋଇଛନ୍ତି । ଇନଫୋସିଟି ଥାନା ଅଞ୍ଚଳରେ ଏହି ଘଟଣାଟି ବେଶ ଚର୍ଚ୍ଚାର ବିଷୟ ହୋଇଛି । ଇନଫୋସିଟି ଥାନା ଅଧୀନ ମାରୁତିଭିଲ୍ଲା ଅଞ୍ଚଳରେ ରହୁଛନ୍ତି ଯୁବତୀ । ଗତ କିଛି ମାସ ପୂର୍ବେ ସାମାଜିକ ଗଣମାଧ୍ୟମରୁ ସେ ଉକ୍ତ ଯୁବକଙ୍କ ସଂସ୍ପର୍ଶରେ ଆସିଥିଲେ । ଯୁବକ ଜଣକ ମଧ୍ୟ ଭୁବନେଶ୍ୱରର । କଥାବାର୍ତ୍ତାରୁ ଆରମ୍ଭ ହେଲା ପ୍ରେମ । ସମୟ ଯେତିକି ଗଡ଼ି ଚାଲିଲା, ସେମାନଙ୍କ ପ୍ରେମ ସେତିକି ଦୃଢ଼ ହେଲା । ମାତ୍ର ଧୂର୍ତ୍ତ ମନର ଠକାମି ବାବଦରେ ସାମାନ୍ୟତମ ସୁରାକ ପାଇଲେନି ଯୁବତୀ । ଏହି ମଉକାରେ ଯୁବକ ଜଣକ ନିଜ ଦୁଃଖ ବଖାଣିଲା । ଯୁବତୀଙ୍କ ହୃତୟ ତରଳିବାକୁ ଲାଗିଲା । ଏକ ବଢ଼ିଆ ଲାଭ ଜନକ ବ୍ୟବସାୟ କରିବାକୁ ବାଟ ଥିଲେ ବି ଅର୍ଥାଭାବ ବାଧକ ବୋଲି ବୁଝାଇଦେଲା । ଦୁହେଁ ମିଶି ଉକ୍ତ ବ୍ୟବସାୟ କରିବେ ବୋଲି କହିଲେ । ପ୍ରେମରେ ଅନ୍ଧ ହୋଇ ଯାଇଥିବା ଯୁବତୀ ବି ବୁଝିଗଲେ । ବିଭିନ୍ନ ପର୍ଯ୍ୟାୟରେ ଯୁବକ ଦେଇଥିବା ଆକାଉଣ୍ଟ ନମ୍ବରରେ ୨୬ ଲକ୍ଷ ଟଙ୍କା ପଠାଇଦେଲେ । ଏହା ପରେ ଉଭାନ ହୋଇଗଲା ପ୍ରତାରକ । ସାମାଜିକ ଗଣମାଧ୍ୟମ ବାହାରରେ ବି ଶଠକୁ ଖୋଜିଲେ ଯୁବତୀ । ମାତ୍ର ସବୁ ଚେଷ୍ଟା ବିଫଳ ହେବା ପରେ ପୁଲିସର ଦ୍ୱାରସ୍ଥ ହୋଇଛନ୍ତି । ଇନ୍ଫୋସିଟି ଥାନା ପୁଲିସ ଯୁବତୀଙ୍କ ଅଭିଯୋଗ ଗ୍ରହଣ କରିବା ସହ ଯୁବକର ଆକାଉଣ୍ଟ ନମ୍ବର ଯାଞ୍ଚ କରି ଠକ ପ୍ରେମିକକୁ ଠାବ କରିବାକୁ ଛାନଭିନ ଆରମ୍ଭ କରିଛି ।