ଦିଲ୍ଲୀ ସରକାରଙ୍କ ନିଷ୍ପତ୍ତି : ଅକ୍ଟୋବର ୧ରୁ ସମସ୍ତଙ୍କୁ ମିଳିବନି ବିଦ୍ୟୁତ୍ ସବ୍ସିଡି
ଏବେ ସମସ୍ତଙ୍କୁ ଆଉ ନିଶୁଳ୍କ ବିଦ୍ୟୁତ ଦିଆଯିବନାହିଁ। ଯେଉଁମାନେ ଚାହିଁବେ କେବଳ ସେହିମାନଙ୍କୁ ସୁବିଧା ଉପଲବ୍ଧ ହେବ। ଗୁରୁବାର ରାଜଧାନୀ ଦିଲ୍ଲୀରେ ମାଗଣା ବିଜୁଳିକୁ ନେଇ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏହି ବଡ଼ ଘୋଷଣା କରିଛନ୍ତି।
ଅକ୍ଟୋବର ୧ରୁ ଏଥିରେ ପରିବର୍ତ୍ତନ କରିବେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ। ଅକ୍ଟୋବର ୧ରୁ ଯେଉଁମାନଙ୍କୁ ଆବଶ୍ୟକ କେବଳ ସେହିମାନଙ୍କୁ ବିଦ୍ୟୁତ୍ ସବସିଡି ମିଳିବ। ୨୦୧୫ ମସିହାରେ ଅନୁଷ୍ଠିତ ଆନ୍ତର୍ଜାତୀୟ ଶକ୍ତି ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସବସିଡି ଛାଡ଼ ଅଭିଯାନ ଆରମ୍ଭ କରିଥିଲେ। ସେହି ଦିନଠାରୁ କିଛି ଲୋକ ନିଜଆଡୁ ସବସିଡି ନେବା ବନ୍ଦ କରିଦେଇଥିଲେ। ଏବେ ମୋଦୀଙ୍କ ଏହି ମଡେଲଙ୍କୁ କେଜ୍ରିୱାଲ ଆପଣାଇଥିବା କୁହାଯାଉଛି।
କେଜ୍ରିୱାଲ କହିଛନ୍ତି ଯେ, ଅକ୍ଟୋବର ୧ ପରଠାରୁ ଦିଲ୍ଲୀରେ ବିଦ୍ୟୁତ୍ ସବସିଡି ଇଚ୍ଛାଧୀନ ହେବ। ଯଦି କୌଣସି ଉପଭୋକ୍ତା ବିଦ୍ୟୁତ୍ ସବସିଡି ଚାହୁଁଛନ୍ତି, ତେବେ ସେମାନଙ୍କୁ ସବସିଡିଯୁକ୍ତ ମାଗଣା କିମ୍ବା ରିହାତି ଦରରେ ବିଦ୍ୟୁତ୍ ଯୋଗାଇ ଦିଆଯିବ। କିନ୍ତୁ ଯଦି କେହି ନିଜକୁ ଦକ୍ଷ ବୋଲି ଭାବନ୍ତି, ତେବେ ସେମାନେ ଦିଲ୍ଲୀ ସରକାରଙ୍କୁ ବିଦ୍ୟୁତ୍ ସବସିଡି ଚାହୁଁ ନଥିବା କହି ସାଧାରଣ ଦରରେ ବିଦ୍ୟୁତ୍ ବ୍ୟବହାର କରିପାରିବେ।
ଉଲ୍ଲେଖ ଯୋଗ୍ୟ ଯେ, ଦିଲ୍ଲୀରେ ଉପଭୋକ୍ତାଙ୍କୁ ପ୍ରଥମ ୨୦୦ ୟୁନିଟ୍ ବିଦ୍ୟୁତ ଲାଗି ଏପର୍ଯ୍ୟନ୍ତ ଶୁନ୍ୟ ବିଲ ପ୍ରଦାନ କରାଯାଉଛି। ୨୦୧ରୁ ପରବର୍ତ୍ତି ପ୍ରତି ୟୁନିଟ୍ ଲାଗି ବିଜୁଳି ଶୁଳ୍କ ଆଦାୟ ହେଉଛି। ୨୦୧ରୁ ୪୦୦ ୟୁନିଟ୍ ବିଦ୍ୟୁରେ ୮୦୦ ଟଙ୍କା ସବସିଡି ମିଳୁଛି।
ଏବେ ସରକାର ରାଜଧାନୀରେ ଲୋକେ ବିଦ୍ୟୁତ ସବସିଡି ଚାହାନ୍ତି କି ଏ ବାବଦେ ସେମାନଙ୍କ ରାୟ ନେବା ପରେ ପରବର୍ତ୍ତି ପଦକ୍ଷେପ ନିଆଯିବ। ଯେଉଁମାନେ ସବସିଡି ଛାଡିବେ ସେମାନଙ୍କ ସୁବିଧା ହଟାଇ ଦିଆଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଯୁବ ବର୍ଗଙ୍କୁ ଏଥିରୁ ବେଶ ଲାଭ ମିଳିପାରିବ ବୋଲି କେଜ୍ରିୱାଲ କହିଛନ୍ତି। କେଜ୍ରିୱାଲଙ୍କ କ୍ୟାବିନେଟ୍ ଅନୁମୋଦନ ଅନୁସାରେ ଏବେ ରାଜଧାନୀ ଦିଲ୍ଲୀରେ କେବଳ ଆବଶ୍ୟକ କରୁଥିବା ଲୋକଙ୍କୁ ସବସିଡି ପ୍ରଦାନ ଲାଗି ମଞ୍ଜୁର କରିଛନ୍ତି।
Powered by Froala Editor
