କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ବୟାନକୁ ନେଇ ତୀବ୍ର ପ୍ରତିକ୍ରିୟାଶୀଳ ହୋଇପଡ଼ିଛନ୍ତି ଅଭିନେତା ପ୍ରକାଶ ରାଜ୍ । ହିନ୍ଦୀ ଭାଷାକୁ ନେଇ ସେ ରଖିଥିବା ମତକୁ ନେଇ କ୍ଷୋଭ ପ୍ରକାଶ କରିଛନ୍ତି ।

ନିକଟରେ ଗୃହମନ୍ତ୍ରୀ ଅମିତ ଶାହ ହିନ୍ଦୀ ଭାଷାକୁ ନେଇ ଏକ ବୟାନ ଦେଇଥିଲେ। ‘ହିନ୍ଦୀକୁ ଇଂରାଜୀର ବିକଳ୍ପ ଭାବେ ବ୍ୟବହାର କରାଯିବା ଉଚିତ ଏବଂ ଅଣ-ହିନ୍ଦୀ ଭାଷାଭାଷୀ ଲୋକମାନେ ଇଂରାଜୀ ବଦଳରେ ହିନ୍ଦୀ କହିବା ଉଚିତ ବୋଲି ଗୃହମନ୍ତ୍ରୀ କହିଥିଲେ।’ ଅମିତ ଶାହଙ୍କ ଏହି ବୟାନକୁ ନେଇ ଏବେ ବିବାଦ ଉପୁଜିଛି। ଅନେକ ଲୋକେ ଏହାକୁ ନେଇ ପ୍ରତିକ୍ରିୟା ଦେଇଛନ୍ତି। ସଙ୍ଗୀତ ନିର୍ଦ୍ଦେଶକ ଏଆର୍ ରେହମାନ୍ ପରେ ଏବେ ପ୍ରକାଶ ରାଜ ମଧ୍ୟ ଏହି ବୟାନକୁ ନେଇ ତୀବ୍ର ବିରୋଧ କରିଛନ୍ତି।

ଅମିତ ଶାହଙ୍କ ବୟାନର ଏକ କ୍ଲିପ୍ ସେୟାର କରି ପ୍ରକାଶ ରାଜ ଟ୍ୱିଟ୍‌ କରିଛନ୍ତି। ସେ ଏଥିରେ ଲେଖିଛନ୍ତି, ‘ଘର ଭାଙ୍ଗିବାକୁ ଚେଷ୍ଟା କରନ୍ତୁ ନାହିଁ ଗୃହମନ୍ତ୍ରୀ। ଆମେ ଆପଣଙ୍କୁ ଚେତାବନୀ ଦେଉଛୁ ଯେ ହିନ୍ଦୀକୁ ଆମ ଉପରେ ଲଦିବା ବନ୍ଦ କରନ୍ତୁ। ଆମେ ଆମର ବିବିଧତାକୁ ଭଲପାଉ। ଆମେ ଆମର ମାତୃଭାଷାକୁ ଭଲପାଉ। ଆମେ ଆମର ପରିଚୟକୁ ଭଲପାଉ।’

ପ୍ରକାଶ ରାଜଙ୍କ ମାତୃଭାଷା କନ୍ନଡ ହୋଇଥିଲେ ମଧ୍ୟ ସେ ଦକ୍ଷିଣରେ ତେଲୁଗୁ ଫିଲ୍ମ ବ୍ୟତୀତ ହିନ୍ଦୀ, ତାମିଲ ଭାଷାରେ ମଧ୍ୟ କାମ କରିଛନ୍ତି। ପ୍ରକାଶ ରାଜ ଇଂରାଜୀ ସମେତ ଅନେକ ଭାରତୀୟ ଭାଷାକୁ ଭଲ ଭାବେ କହିପାରନ୍ତି। ପ୍ରକାଶ ରାଜଙ୍କ ବ୍ୟତୀତ ଅମିତ ଶାହଙ୍କ ବୟାନକୁ ନେଇ ଅଣ-ହିନ୍ଦୀ ଭାଷାଭାଷୀ ରାଜ୍ୟର ଅନେକ ଲୋକ ମଧ୍ୟ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି।

Powered by Froala Editor