ଗୋଚାଲାଣକାରୀଙ୍କ ସହ ପୁଲିସର ଦୌଡା ଦୌଡି ଭିଡିଓ ଏବେ ଭାଇରାଲ ହୋଇଛି । କାରଣ ଗୋଚାଲାଣକାରୀଙ୍କ ଗାଡି ବିନା ଚକରେ ୨୨ କି.ମି ଦୌଡିଥିଲା । ଯାହା ରାସ୍ତାରେ ଯାଉଥିବା ଲୋକଙ୍କ ଭିତରେ ଆତଙ୍କ ସୃଷ୍ଟି କରିଥିଲା । ଦିଲ୍ଲୀ ନିକଟସ୍ଥ ସାଇବର ସିଟି ଗୁରୁଗ୍ରାମରୁ ସାମ୍ନାକୁ ଆସିଛି ଏଭଳି କିଛି ଭିଡିଓ ।

ସୂଚନା ମୁତାବକ, ଗୋରୁ ଭର୍ତ୍ତି ଏକ ମିନି ଭ୍ୟାନ୍‌ ଦିଲ୍ଲୀ ସୀମାରୁ ଗୁରୁଗ୍ରାମରେ ପ୍ରବେଶ କରିଥିଲା, ସଙ୍ଗେ ସଙ୍ଗେ ଗା-ରାକ୍ଷୀମାନେ ସେହି ଗାଡିର ପିଛା କରିଥିଲେ। ଏଥିସହ ଯେଉଁ ଗାଡିରେ ଗୋରୁ ଚାଲାଣ ହେଉଥିଲା ତାକୁ ମଧ୍ୟ ପଂଚର କରିଦେଇଥିଲେ। ତଥାପି ଦୁର୍ବୃତ୍ତମାନେ ବେପରୁଆ ଭାବେ ବିନା ଟାୟାରରେ ୨୨ କିଲୋମିଟର ଯାଏଁ ମିନି ଭ୍ୟାନ୍‌ଟିକୁ ଦୌଡାଇଥିଲେ। ଏଥିସହ ଚଳନ୍ତା ଗାଡିରୁ ଗାଈମାନଙ୍କୁ ରାସ୍ତା ଉପରକୁ ଫିଙ୍ଗିବା ଆରମ୍ଭ କରିଥିଲେ। ପ୍ରାୟ ୨୨ କିଲୋମିଟର ଗାଡିକୁ ବିନା ଟାୟାର୍‌ରେ ଦୌଡାଇବା ପରେ ପୁଲିସ ସେମାନଙ୍କୁ ଧରିଛି। ସୋହନା ରାସ୍ତାରେ ଥିବା ଧାମଡୋଜ୍‌ ଟୋଲ ପ୍ଲାଜା ନିକଟରେ ୫ ଜଣ ଗୋଚାଲାଣକାରୀ ଧରାପଡିଛନ୍ତି ଏବଂ ଅନ୍ୟମାନେ ଖସି ପଳାଇଛନ୍ତି । ଏହି ଗୋରୁ ଚୋରା ଚାଲାଣକାରୀଙ୍କ ଗାଡିରୁ ବେଆଇନ୍‌ ଅସ୍ତ୍ରଶସ୍ତ୍ର ଓ ଗୁଳି ମଧ୍ୟ ଜବତ କରିଛି ପୁଲିସ। ଏକ ମାମଲା ରୁଜୁ କରି ଏମାନଙ୍କ ବିରୋଧରେ ପୁଲିସ ତଦନ୍ତ ଆରମ୍ଭ କରିଛି।

Powered by Froala Editor