ସାଧାରଣତନ୍ତ୍ର ଦିବସ ପରେଡରେ କେରଳ, ପଶ୍ଚିମବଙ୍ଗ ଏବଂ ତାମିଲନାଡୁର ପ୍ରଜ୍ଞାପନ ମେଢ଼ ଦେଖିବାକୁ ମିଳିବନି। ଗତବର୍ଷ କେରଳ ସରକାରଙ୍କ ପ୍ରସ୍ତାବ ଅଗ୍ରାହ୍ୟ ହୋଇଯାଇଥିବା ବେଳେ ଏଥର ବେଙ୍ଗଲ ମଧ୍ୟ ବାଦ ପଡିଛି। ଏଣୁ ଏହାକୁ ରାଜନୈତିକ ପୂର୍ବାଗ୍ରହ ପ୍ରେରିତ ବୋଲି ଉଭୟ ରାଜ୍ୟ ସରକାର ଅଭିଯୋଗ କରିଛନ୍ତି।

ଏଥର ପଶ୍ଚିମବଙ୍ଗ ସରକାର ସ୍ୱାଧୀନତାର ୭୫ତମ ବାର୍ଷିକ ପାଳନକୁ ନଜରରେ ରଖି ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଅଧାରିତ ପ୍ରଜ୍ଞାପନ ମେଢ଼ ଲାଗି ପ୍ରସ୍ତାବ ଦେଇଥିବା ବେଳେ କେରଳ ସରକାର ନାରାୟଣ ଗୁରୁ ପ୍ରଜ୍ଞାପନମେଢ ଲାଗି ପ୍ରସ୍ତାବ ଦେଇଥିଲେ। ତେବେ ଉଭୟ ରାଜ୍ୟଙ୍କ ପ୍ରସ୍ତାବ ଅସ୍ୱୀକୃତ ହୋଇଯାଇଛି। ୨୦୨୨ ସାଧରାଣତନ୍ତ୍ର ଦିବସ ପରେଡ ଲାଗି ବିଭିନ୍ନ ରାଜ୍ୟ ଓ କେନ୍ଦ୍ରୀୟ ମନ୍ତ୍ରାଳୟଙ୍କ ୫୬ଟି ପ୍ରସ୍ତାବ ମିଳିଥିଲା। ଏଥିରୁ ୨୧ଟିକୁ ଚୟନ କମିଟି ସର୍ଟଲିଷ୍ଟ କରିଛନ୍ତି।

ଚଳିତବର୍ଷ ଯେଉଁ ପ୍ରଜ୍ଞାପନ ମେଢ଼ ଗୁଡିକ ରାଜପଥରେ ଦେଖା ଯିବେ ସେଥିରେ ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶମାନଙ୍କର ୧୨ ଓ ସାମ୍ବିଧାନିକ ସଂସ୍ଥାଙ୍କର ୯ଟିକୁ ସ୍ୱୀକୃତି ମିଳିଛି। ଏଥର ଗଣତନ୍ତ୍ର ଦିବସ ସମାରୋହର ଥିମ ‘ଆଜାଦୀ କା ଅମୃତ ମହୋତ୍ସବ’ ରଖାଯାଇଛି। ଦେଶ ସ୍ୱୀଧୀନ ହେବାର ୭୫ତମ ବାର୍ଷିକ ଅବସରରେ ଏହି ଥିମ ପ୍ରସ୍ତୁତ କରାଯାଇଛି।

Powered by Froala Editor