ଟେଷ୍ଟ କ୍ରିକେଟ୍ରୁ ଅବସର ଘୋଷଣା କଲେ ମୋଇନ୍ ଅଲୀ
ଟେଷ୍ଟ କ୍ରିକେଟ୍ରୁ ଅବସର ଘୋଷଣା କରିଛନ୍ତି ଇଂଲଣ୍ଡ କ୍ରିକେଟ୍ ଦଳର ଅଲ୍ରାଉଣ୍ଡର ମୋଇନ୍ ଅଲୀ । ୬୪ଟି ଟେଷ୍ଟମ୍ୟାଚ୍ ଖେଳିଥିବା ୩୪ ବର୍ଷ ବୟସ୍କ ମୋଇନ୍ ଘୋଷଣା କରିଛନ୍ତି ଯେ ତାଙ୍କଠାରେ ଆଉ ଟେଷ୍ଟ କ୍ରିକେଟ୍ ଖେଳିବାର ସ୍ପୃହା ନାହିଁ । ପୁଣି ଏତେ ଦିନ ପରିବାର ଛାଡ଼ି ବାହାରେ ରହିବାକୁ ସେ ଚାହାନ୍ତି ନାହିଁ ବୋଲି କହିଛନ୍ତି । ଟେଷ୍ଟ କ୍ରିକେଟ୍ରୁ ଅବସର କଥା ମୋଇନ୍ ଇଂଲଣ୍ଡ ପ୍ରଶିକ୍ଷକ କ୍ରିସ୍ ସିଲ୍ଭରଉଡ୍ ଓ ଅଧିନାୟକ ଜୋ ରୁଟ୍ଙ୍କୁ ଜଣାଇ ଦେଇଛନ୍ତି ।
ଏବେ ମୋଇନ୍ ଅଲୀ ଚେନ୍ନଇ ସୁପର କିଙ୍ଗ୍ସ ପାଇଁ ଆଇପିଏଲ୍ ଖେଳୁଛନ୍ତି । ଟେଷ୍ଟ କ୍ରିକେଟ୍ରେ ୩୦୦୦ ରନ୍ ଓ ୨୦୦ ୱିକେଟ ନେବାର ନିକଟବର୍ତ୍ତୀ ଥିଲେ ହେଁ ମୋଇନ୍ ଅବସର ଘୋଷଣା କରିଛନ୍ତି। ଧଳା ବଲ୍ କ୍ରିକେଟ୍ ସହ ମୋଇନ୍ ପେସାଦାର ଟ୍ବେଣ୍ଟି୨୦ କ୍ରିକେଟ୍ ଖେଳିବା ଜାରିରଖିବେ ବୋଲି କହିଛନ୍ତି।
ଚଳିତବର୍ଷ ଅକ୍ଟୋବର-ନଭେମ୍ବରରେ ଟ୍ବେଣ୍ଟି-୨୦ ବିଶ୍ବକପ୍ରେ ମୋଇନ୍ ଖେଳିବାର ଅଛି । ଏହାପରେ ଆସେସ୍ ସିରିଜ୍ ଖେଳିବା ପାଇଁ ସଂଗରୋଧରେ ରହିବା ଏବଂ ଦୀର୍ଘଦିନ ଟେଷ୍ଟ ସିରିଜ୍ ଖେଳିବାକୁ ମୋଇନ୍ ପ୍ରସ୍ତୁତ ନୁହନ୍ତି । ମୋଇନ୍ କହିଛନ୍ତି, ମୋତେ ଏବେ ୩୪ ବର୍ଷ ଏବଂ ଯେପର୍ଯ୍ୟନ୍ତ କ୍ରିକେଟ୍କୁ ଉପଭୋଗ କରୁଥିବି ; ସେପର୍ଯ୍ୟନ୍ତ ଖେଳିଚାଲିବି ।
Powered by Froala Editor
