ଭୁବନେଶ୍ୱର: ଭୁବନେଶ୍ୱର କ୍ଲବର କର୍ମକର୍ତ୍ତା ନିର୍ବାଚନ ଲାଗି ଆଜିଠାରୁ ମତଦାନ ଆରମ୍ଭ ହୋଇଛି । ରବିବାର ମଧ୍ୟ ମତଦାନ ଜାରି ରହିବ । କ୍ଲବର ସଭାପତି ପଦ ପାଇଁ ୨ ପୂର୍ବତନ ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ଓ ବିଜୟ ପଟ୍ଟନାୟକ ମଇଦାନରେ ରହିଛନ୍ତି । ତେଣୁ ଏହି ନିର୍ବାଚନର ଫଳାଫଳକୁ ନେଇ ବିଭିନ୍ନ ମହଲରେ ଉତ୍ସୁକତା ପ୍ରକାଶ ପାଇଛି । ଏହାସହ ଉପ-ସଭାପତି ପଦ ପାଇଁ ୫ଜଣ, ସମ୍ପାଦକ ପାଇଁ ୬ଜଣ, ଯୁଗ୍ମ ସମ୍ପାଦକ ପାଇଁ ୩ ଜଣ, କାର୍ଯ୍ୟନିର୍ବାହୀ କମିଟି ସଦସ୍ୟ ପାଇଁ ୨୨ଜଣ ସଭ୍ୟ ନାମାଙ୍କନପତ୍ର ଦାଖଲ କରିଛନ୍ତି । ଗତ ଏପ୍ରିଲ ମାସରେ ନାମାଙ୍କନପତ୍ର ଦାଖଲ ସରିଥିଲେ ହେଁ କୋଭିଡ ଦ୍ୱିତୀୟ ଲହର ପାଇଁ ନିର୍ବାଚନକୁ ଘୁଞ୍ଚାଇ ଦିଆଯାଇଥିଲା । ଶେଷରେ ଧାର୍ଯ୍ୟ ତାରିଖ ଅନୁଯାୟୀ ଆଜି ମତଦାନ ଆରମ୍ଭ ହୋଇଛି । ସୂଚନାଯୋଗ୍ୟ, ସଭାପତି ପଦ ପାଇଁ ଲଢ଼ୁଥିବା ପୂର୍ବତନ ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ଅବସର ନେବା ପରେ ଏବେ ପଶ୍ଚିମ ଓଡ଼ିଶା ବିକାଶ ପରିଷଦର ଅଧ୍ୟକ୍ଷ ଓ ମୁଖ୍ୟମନ୍ତ୍ରୀଙ୍କ ମୁଖ୍ୟ ପରାମର୍ଶଦାତା ଅଛନ୍ତି । ସେହିପରି ପ୍ରତିଦ୍ୱନ୍ଦ୍ୱୀ ବିଜୟ ପଟ୍ଟନାୟକ ତାଙ୍କ ଚାକିରି କାଳରେ ମୁଖ୍ୟମନ୍ତ୍ରୀଙ୍କ ସଚିବ ଓ ପରେ ମୁଖ୍ୟ ଶାସନ ସଚିବ ଭାବେ ଅବସର ନେଇଥିଲେ । ଅବସର ପରେ ସେ ବେଦାନ୍ତ ବିଶ୍ୱବିଦ୍ୟାଳୟର ଦାୟିତ୍ୱ ସମ୍ଭାଳିଥିଲେ । ଏବେ କ୍ଲବର ସଭାପତି ପଦ ପାଇଁ ଏହି ଦୁଇ ଅଫିସରଙ୍କ ମଧ୍ୟରେ ଲଢେ଼ଇ ଚର୍ଚ୍ଚାର ଖୋରାକ ଯୋଗାଇଛି । ଉଲ୍ଲେଖଯୋଗ୍ୟ ଯେ ପୂର୍ବତନ ଆଇଏଏସ ଅଧିକାରୀ ସ୍ୱର୍ଗତ ପ୍ରିୟବ୍ରତ ପଟ୍ଟନାୟକ ବହୁ ବର୍ଷ ଧରି କ୍ଲବର ପରିଚାଳନା ଦାୟିତ୍ୱରେ ରହିଥିଲେ । ଗତବର୍ଷ କର୍କଟ ରୋଗରେ ପ୍ରାଣ ହରାଇବା ପର୍ଯ୍ୟନ୍ତ ମଧ୍ୟ ସଭାପତି ଥିଲେ ।
୧୯୪୯ ମସିହାରେ ସରକାରୀ ସ୍ଥପତି ଜେ ଏଲ ଭାଜ୍ ଭୁବନେଶ୍ୱରରେ ଏକ କ୍ଲବ୍ ପାଇଁ ପ୍ରସ୍ତାବ ଦେଇଥିଲେ । ୧୯୪୯ରେ ପ୍ରତିଷ୍ଠିତ ଭୁବନେଶ୍ୱର କ୍ଲବର ପ୍ରଥମ ସଭାପତି ଖଲ୍ଲିକୋଟର ରାଜା ବାହାଦୁର ହୋଇଥିଲେ । ସେ ୧୯୫୦ରୁ ୧୯୫୨ ପର୍ଯ୍ୟନ୍ତ ଏହି ପଦରେ ରହିବା ପରେ ୧୯୫୩ ମସିହାରେ ଜଷ୍ଟସ ଏଲ. ପାଣିଗ୍ରାହୀ ଏହି ପଦ ଅଳଙ୍କୃତ କରିଥିଲେ । ପ୍ରଥମେ ୨୩ଜଣ ସଦସ୍ୟଙ୍କୁ ନେଇ ଆରମ୍ଭ ହୋଇଥିବା ଭୁବନେଶ୍ୱର କ୍ଲବରେ ଏବେ ୩ହଜାରରୁ ଅଧିକ ସଦସ୍ୟ ରହିଛନ୍ତି । ୧୯୫୪ରେ କ୍ଲବକୁ ଉଦ୍ୟାନ ମାର୍ଗକୁ ସ୍ଥାନାନ୍ତରିତ କରାଯାଇଥିଲା । ସେଠାରେ କ୍ଲବ ପରିଚାଳନାରେ ସମସ୍ୟା ହେବା କାରଣରୁ ୧୯୬୫ମସିହାରେ କ୍ଲବ ୟୁନିଟ-୬ସ୍ଥିତ ରାଜପଥ ମାର୍ଗକୁ ସ୍ଥାନାନ୍ତରିତ ହୋଇଥିଲା । ଏହି କ୍ଲବର ସଭାପତି ପଦରେ ବିଭିନ୍ନ ରାଜ ପରିବାରର ମୁଖ୍ୟଙ୍କଠାରୁ ଆରମ୍ଭ କରି ଡ. ହରେକୃଷ୍ଣ ମହତାବ ଓ ବିଜୁ ପଟ୍ଟନାୟଙ୍କ ପରି ମୁଖ୍ୟମନ୍ତ୍ରୀମାନେ ମଧ୍ୟ ରହି ଆସିଛନ୍ତି । କିନ୍ତୁ ୧୯୬୪ ମସିହା ପରେ କ୍ଲବରେ ଆଇଏଏସ ଅଫିସରମାନଙ୍କ ଦବଦବା ରହି ଆସିଛି । ଏବେ କ୍ଲବରେ ନୂତନ ଗୃହ ଘାଟିକିଆଠାରେ ନିର୍ମାଣାଧୀନ ରହିଛି ।

Powered by Froala Editor