ପର୍ଣ୍ଣ ଫିଲ୍ମ ନିର୍ମାଣ ଅଭିଯୋଗରେ ଫସିଥିବା ବ୍ୟବସାୟୀ ତଥା ଶିଳ୍ପା ସେଟ୍ଟିଙ୍କ ସ୍ୱାମୀ ରାଜ କୁନ୍ଦ୍ରାଙ୍କୁ ଜାମିନ ମିଳିଛି। ୨ ମାସ ହେବ ଜେଲରେ ରହିବା ପରେ କୁନ୍ଦ୍ରାଙ୍କୁ ଜାମିନ ପ୍ରଦାନ କରିବା ସହ ୫୦,୦୦୦ ଟଙ୍କାର ବଣ୍ଡ ଦେବାକୁ କହିଛନ୍ତି ମୁମ୍ବାଇ ହାଇକୋର୍ଟ । ସେହିପରି ରାଜ କୁନ୍ଦ୍ରାଙ୍କ ଆଇଟି ହେଡ୍‌ ରିୟାନ୍‌ ଥୋରପେଙ୍କୁ ମଧ୍ୟ ଜାମିନ ମିଳିଛି। ଜାମିନ ପ୍ରଦାନ କରିବା ସହ କୋର୍ଟ ତାଙ୍କୁ ବିନା ଅନୁମତିରେ ସହର ନ ଛାଡିବା ପାଇଁ ନିର୍ଦ୍ଦେଶ ଦେଇଛି । 

ଉଭୟଙ୍କ ପାଇଁ ଓକିଲ ପ୍ରଶାନ୍ତ ପାଟିଲ କୋର୍ଟରେ ଯୁକ୍ତି ସ୍ଥାପନ କରିଥିଲେ। ସେ କହିଥିଲେ ଯେ, ପ୍ଲାଟଫର୍ମରେ କେଉଁ କଣ୍ଟେଣ୍ଟ ଅପଲୋଡ଼ ହେବ ତାହା ସେଲିବ୍ରେଟି ଓ କଣ୍ଟେଣ୍ଟ ପ୍ରଡ୍ୟୁସର ନିଷ୍ପତ୍ତି ନିଅନ୍ତି। ତାହା ରାଜ କୁନ୍ଦ୍ରା ଓ ରିୟାନ୍‌ ନିଷ୍ପତ୍ତି ନିଅନ୍ତି ନାହିଁ ବୋଲି ତାଙ୍କ ଓକିଲ ଯୁକ୍ତି ରଖିଥିଲେ । ୧୪୦୦ ପୃଷ୍ଟା ସମ୍ବଳିତ ଦାଖଲ ହୋଇଥିବା ଚାର୍ଜସିଟ୍‌ରେ କେଉଁଠି ବି ରାଜ କୁନ୍ଦ୍ରା କଣ୍ଟେଣ୍ଟ ଅପଲୋଡ଼ କରୁଥିବା ପ୍ରମାଣ ନାହିଁ ବୋଲି ଓକିଲ ପ୍ରଶାନ୍ତ କହିଛନ୍ତି ।  ଅପରପକ୍ଷରେ  ସରକାରୀ ଓକିଲଙ୍କ ପକ୍ଷରୁ ଜାମିନ ପ୍ରଦାନକୁ ବିରୋଧ କରାଯାଇଥିଲା। ଉଭୟଙ୍କୁ ଜାମିନ ମିଳିଲେ ପ୍ରମାଣ ଟ୍ୟାମ୍ପରିଂ ହେବାର ଆଶଙ୍କା ରହିଛି ବୋଲି କୁହାଯାଇଥିଲା। ତଥାପି କୋର୍ଟ ଉଭୟଙ୍କ ଜାମିନ ମଞ୍ଜୁର କରିଥିଲେ।

ସୂଚନାଯୋଗ୍ୟ ଯେ, ମୁମ୍ବାଇର ମଡ ଅଂଚଳରେ ଥିବା ଏକ ବଙ୍ଗଳା ଉପରେ ଚଢ଼ାଉ କରି ମୁମ୍ବାଇ ପୋଲିସ ରାଜଙ୍କ ବିରୋଧରେ ବଳିଷ୍ଠ ପ୍ରମାଣ ପାଇଥିଲେ । ଏଠାରେ ଅଶ୍ଲୀଳ ଫିଲ୍ମର ଶୁଟିଂ ଚାଲିଥିଲା । ରାଜ ଓ ତାଙ୍କ ସହଯୋଗୀ ରିଆନ ଥୋର୍ପେ ଏହି ମାମଲାରେ ଗିରଫ ହୋଇଥିଲେ ।  ସେମାନଙ୍କ ବିରୋଧରେ ୧୪୬୭ ପୃଷ୍ଠାର ସପ୍ଲିମେଂଟାରୀ ଚାର୍ଜଶିଟ ଦାଖଲ କରାଯାଇଥିଲା । 

Powered by Froala Editor