କ୍ରିକେଟକୁ ବାଏ ବାଏ କଲେ ଶ୍ରୀଲଙ୍କାର ଦ୍ରୁତ ବୋଲର୍ ଲାସିତ୍ ମାଲିଙ୍ଗା । ସେ ଟି-୨୦ କ୍ରିକେଟରୁ ସନ୍ନ୍ୟାସ ନେବା ସହ ଅର୍ନ୍ତଜାତୀୟ କ୍ରିକେଟକୁ ଅଲବିଦା କହିଛନ୍ତି । ଚଳିତବର୍ଷ ମୁମ୍ବାଇ ଇଣ୍ଡିଆନ୍ସ ଦଳରୁ ରିଲିଜ କରିବା ପରେ ଫ୍ରାଞ୍ଚାଇଜ୍ କ୍ରିକେଟରୁ ଅବସର ନେଇଥିଲେ ମାଲିଙ୍ଗା । ଆଉ ଟି-୨୦ କ୍ରିକେଟରୁ ଅବସର ନେବା ସହ ପୂରା କ୍ରିକେଟ କ୍ୟାରିୟରରେ ପୂର୍ଣ୍ଣଚ୍ଛେଦ ପକାଇଛନ୍ତି ମାଲିଙ୍ଗା । ମାଲିଙ୍ଗାଙ୍କ ଅନେକ ଫ୍ୟାନ, ଫୋଲର୍ସ ରହିଥିବାବେଳେ ତାଙ୍କ ଅବସର କ୍ରିକେଟପ୍ରେମୀଙ୍କୁ ନିରାଶ କରିଛି ।

୨୦୦୪ ମସିହାରେ ଶ୍ରୀଲଙ୍କା ପକ୍ଷରୁ କ୍ରିକେଟ କ୍ୟାରିୟର ଆରମ୍ଭ କରିଥିବା ମାଲିଙ୍ଗା ନିଜର ୟର୍କର ପାଇଁ ବେଶ ପରିଚିତ । ମାଲିଙ୍ଗାଙ୍କ ୟର୍କର ବ୍ୟାଟସମ୍ୟାନଙ୍କ ମନରେ ଆଉଟ ହେବାର ଭୟ ସୃଷ୍ଟି କରୁଥିଲା । ଆଉ ଏହି ୟର୍କରକୁ ସାଥୀ କରି ଏକଦା ଶ୍ରୀଲଙ୍କାର ଶ୍ରେଷ୍ଠ ତଥା ଘାତକ ବୋଲର ଭାବେ ଜଣାଶୁଣା ଥିଲେ ମାଲିଙ୍ଗା । ଏହାଛଡା ଆଇପିଏଲ ଓ ବିଗ୍ ବାସ ଲିଗରେ ମଧ୍ୟ ମାଲିଙ୍ଗାଙ୍କ ପ୍ରଦର୍ଶନ ବେଶ ଭଲ ରହିଥିଲା ।

ନିଜ ବୋଲିଂ ଶୈଳୀ ପାଇଁ ପ୍ରତିଟି କ୍ରିକେଟପ୍ରେମୀଙ୍କ ପାଖରେ ପରିଚିତ ହୋଇଥିଲେ। ଖାସକରି ଟି-୨୦ ଫର୍ମାଟରେ ମାଲିଙ୍ଗାଙ୍କ ଜବରଦସ୍ତ କ୍ରେଜ ରହିଥିଲା । ମାଲିଙ୍ଗା ନିଜ କ୍ରିକେଟ କ୍ୟାରିୟରରେ ମୋଟ ୨୯୫ଟି ଟି-୨୦ ମ୍ୟାଚ୍ ଖେଳି ମାଲିଙ୍ଗା ୩୯୦ଟି ୱିକେଟ ହାସଲ କରିଥିଲେ । ସେହିଭଳି ୨୧ ବର୍ଷର ଅର୍ନ୍ତଜାତୀୟ କ୍ରିକେଟ କ୍ୟାରିୟରରେ ଶ୍ରୀଲଙ୍କା ପାଇଁ ୩୦ଟି ଟେଷ୍ଟ, ୨୨୬ଟି ଦିନିକିଆ ଓ ୮୪ଟି ଟି-୨୦ ମ୍ୟାଚ୍ ଖେଳି ଯଥାକ୍ରମେ ୧୦୧, ୩୩୮ ଓ ୧୦୭ଟି ୱିକେଟ ହାସଲ କରିଛନ୍ତି ମାଲିଙ୍ଗା । ଏପରିକି ମାଲିଙ୍ଗାଙ୍କ ନାଁରେ ସର୍ବାଧିକ ୫ଟି ହ୍ରାଟିକ ୱିକେଟ ନେବାର ରେକର୍ଡ ରହିଛି । ସେହିଭଳି ଆଇପିଏଲରେ ମଧ୍ୟ ୧୭୦ଟି ୱିକେଟ ନେଇଛନ୍ତି ମାଲିଙ୍ଗା । ଶ୍ରୀଲଙ୍କାକୁ ଟି-୨୦ ବିଶ୍ୱକପ ବିଜେତା କରିବା ପଛରେ ମଧ୍ୟ ମାଲିଙ୍ଗାଙ୍କ ବଡ ଅବଦାନ ରହିଛି ।

ମାଲିଙ୍ଗା ନିଜର ଶେଷ ମ୍ୟାଚ୍ ୨୦୨୦ ମାର୍ଚ୍ଚ ମାସରେ ୱେଷ୍ଟଇଣ୍ଡିଜ୍ ବିପକ୍ଷରେ ଖେଳିଥିଲେ । ଅନେକ ବିଶ୍ବକପ ମଧ୍ୟ ଶ୍ରୀଲଙ୍କା ଟିମ୍ ପାଇଁ ଖେଳିଛନ୍ତି ମାଲିଙ୍ଗା । ଅବସର ଘୋଷଣା ସମୟରେ ନିଜର ସାଥୀ ଖେଳାଳି ଓ ଫ୍ୟାନମାନଙ୍କୁ ଧନ୍ୟବାଦ ଦେଇଛନ୍ତି । 

Powered by Froala Editor