ଭୁବନେଶ୍ୱର : ଆସନ୍ତା ୧୭ରୁ ପୁଣି ବର୍ଷା କାଚିବ  । ଏଭଳି ସୂଚନା ଦେଇଛନ୍ତି ଆଇଏମଡ଼ି ଡିଜି ମୃତ୍ୟୁଞ୍ଜୟ ମହାପାତ୍ର  ।

ସେ କହିଛନ୍ତିଯେ, ଗଭୀର ଅବପାତ ଆଜି ଚାନ୍ଦବାଲି ଠାରେ ଉପକୂଳ ଅତିକ୍ରମ କରିଛି  । ଯାହାର ପ୍ରଭାବରେ ଉପକୂଳ ଓଡ଼ିଶାରେ ବର୍ଷା ଲାଗି ରହିଛି  । କ୍ରମେ ଏହା ଉତର ପଶ୍ଚିମ ଦିଗକୁ ଗତି କରି କାଲି ଛତିଶଗଡ଼ ଛୁଇଁବ  । ଯାହାର ପ୍ରଭାବରେ ଉପକୂଳରେ ବର୍ଷା କମିଯିବ  । ତେବେ ଆଭ୍ୟନ୍ତର ଓଡ଼ିଶାରେ ବର୍ଷା ପରିମାଣ ବଢ଼ିଯିବ ବୋଲି ପାଣିପାଗ ବିଭାଗ ପକ୍ଷରୁ ଆକଳନ କରାଯାଇଛି  । ବିଶେଷକରି ସମ୍ବଲପୁର, ଅନୁଗୁଳ, ଦେବଗଡ଼, ବରଗଡ଼ ଓ ବୌଦ୍ଧରେ ପ୍ରବଳ ବର୍ଷା ହେବ  । ଏବେ ମହାନଦୀର ନିମ୍ନ ଅବବାହିକାରେ ବର୍ଷାର ପରିମାଣ ବୃଦ୍ଧି ପାଇଥିବାବେଳେ ଆସନ୍ତାକାଲି ଠାରୁ ମହାନଦୀର ଉପର ଅବବାହିକାରେ ଅଧିକ ବର୍ଷା ହେବବୋଲି ଆକଳିତ ହୋଇଛି  । ଆସନ୍ତାକାଲି ସୁଦ୍ଧା ଉପକୂଳରେ ବର୍ଷା ସମ୍ପୂର୍ଣ୍ଣ ଭାବେ କମିଯିବ  । ତେବେ ୧୭ରୁ ପୁଣି ସାରା ରାଜ୍ୟରେ ବର୍ଷା ଲାଗି ରହିବ  । କାହିଁକିନା ୧୭ ସୁଦ୍ଧା ବଙ୍ଗୋପସାଗରରେ ପୁଣି ଏକ ଘୂର୍ଣ୍ଣିବଳୟ ସୃଷ୍ଟି ହେବାର ସମ୍ଭାବନା ରହିଛି  । ଯାହାକି ୧୮ ତାରିଖ ସକାଳ ସୁଦ୍ଧା ଏହା ଉତର ଓଡ଼ିଶା ନିକଟରେ ପହଁଚିପାରେ  । ସେହିପରି ଏହା ପ୍ରଭାବରେ ୧୭ରୁ ଉପକୂଳ ଓଡ଼ିଶାରେ ପୁଣି ଏକ ବର୍ଷାର ଧାରା ଜାରି ରହିବ  ।

ଅପରପକ୍ଷରେ ସ୍ୱତନ୍ତ୍ର ରିଲିଫ କମିଶନରଙ୍କ କାର୍ଯ୍ୟାଳୟରୁ ମିଳିଥିବା ସୂଚନାନୁଯାୟୀ, ପୁରୀର ଅସ୍ତରଙ୍ଗ ଠାରେ ୫୩୦ ମିମି ଓ କାକଟପୁର ଠାରେ ୫୨୫ ମିମି ବର୍ଷା ରେକଡର଼୍ କରାଯାଇଛି  । ସେହିପରି ଜଗତସିଂହପୁରର ବାଲିକୁଦା ଠାରେ ୪୪୦ ମିମି, କଟକରେ କନ୍ତାପଡ଼ା ଠାରେ ୩୮୧ ମିମି ଓ ନିଆଳୀ ଠାରେ ୩୭୦ ମିମି, ଜଗତସିଂହପୁରର ଆଳିପିଙ୍ଗଳ ଠାରେ ୩୬୪ ମିମି ବର୍ଷା ହୋଇଥିବା ଜଣାପଡ଼ିଛି  ।

ଅପରପକ୍ଷରେ ପୁରୀରେ ୩୪୨.୫ ମିମି, ଗୋପରେ ୩୩୧ ମିମି ଓ ସତ୍ୟବାଦୀ ଠାରେ ୩୨୮ ମିମି ବର୍ଷା ହୋଇଥିବା ରେକଡର଼୍ କରାଯାଇଛି  । ଏତଦବ୍ୟତୀତ ଜଗତସିଂହପୁରର ରଘୁନାଥପୁର ଠାରେ ୩୨୩ ମିମି, ପୁରୀର ନିମାପଡ଼ା ଠାରେ ୩୦୦.୬ ମିମି ଓ ଖୋର୍ଦ୍ଧାର ବାଲିପାଟଣା ଠାରେ ୨୮୦.୫ ମିମି ବର୍ଷା ହୋଇଛି  । 

Powered by Froala Editor