କେନ୍ଦୁଝର ଜିଲ୍ଲା ହାଟଡିହି ବ୍ଲକ୍ ନନ୍ଦିପଦା ଥାନା ଅଞ୍ଚଳରେ ବିଭିନ୍ନ ସ୍ଥାନରେ ତାଲା ଭାଙ୍ଗି ଚୋରି ଘଟଣା ବୃଦ୍ଧି ପାଉଛି । ମଙ୍ଗଳବାର ରାତିରେ ଶାଳଣିଆଁ ବଜାରରେ ଥିବା ଏକ ଫାଷ୍ଟଫୁଡ ଦୋକାନରୁ ତିନୋଟି ଗ୍ୟାସ ସିଲିଣ୍ଡର ଓ ଗୋଟିଏ ଫ୍ରିଜ ଚୋରି ହୋଇଥିବା ବେଳେ ବୁଧବାର ରାତିରେ ମଙ୍ଗରାଜପୁର ଗ୍ରାମର ଶରତ ବେହେରାଙ୍କ ଘରୁ ପାଞ୍ଚ ଲକ୍ଷରୁ ଊର୍ଦ୍ଧ୍ୱ ଟଙ୍କାର ସୁନା, ରୁପା ଅଳଙ୍କାର ଓ ନଗଦ ଦେଢ଼ ଲକ୍ଷ ଟଙ୍କା ଲୁଟ ହୋଇଥିବା ଅଭିଯୋଗ ହୋଇଛି ।  

ଗ୍ରାମର ଶରତ ବେହେରା ଘରେ ନଥିବା ବେଳେ ତାଙ୍କ ମା’ ଓ ଭାଉଜ ଘରେ ରହୁଥିଲେ । ସେମାନେ ଖାଇପିଇ ଶାଇଥିବା ବେଳେ ଦୁର୍ବୃତ୍ତମାନେ ତାଙ୍କ ଘର ସମ୍ମୁଖ କବାଟ ତାଲା ଭାଙ୍ଗି ଘରେ ପଶି ମା’ ଓ ଭାଉଜ ଶୋଇଥିବା ଘରର ବାହାର ପଟୁ ଶିକୁଳି ଦେଇ ଶରତଙ୍କ ରୁମ୍‌ରୁ ମଙ୍ଗଳସୂତ୍ର, ସୁନାଚେନ୍‌, କାନଫୁଲ, ଦୁଇଟି ସୁନା ମୁଦି, ସାଂକ୍ଷୀ, ରୁପା ପାଉଁଜି, ରୁପାରେ ତିଆରି ଅଣ୍ଟା ବିଛା ସମେତ ନଗଦ ଦେଢ଼ଲକ୍ଷ ଟଙ୍କା ଓ ଗୋଟିଏ ମୋବାଇଲ ଲୁଟିନେଇ ଥିଲେ ।

ଗୁରୁବାର ସକାଳୁ ପରିବାର ଲୋକେ ଉଠିବାବେଳେ ବାହାରପଟୁ କବାଟ ବନ୍ଦ ଥିବା ଦେଖି ପଡୋଶୀ କବାଟ ଖାଲିବା ପରେ ଲୁଟ୍ ସମ୍ପର୍କରେ ଜାଣିବାକୁ ପାଇଥିଲେ । ଲୁଟ ସମ୍ପର୍କରେ ଖବର ପାଇ ଶରତ ଘରକୁ ଫେରିବା ପରେ ନନ୍ଦିପଦା ଥାନାରେ ଅଭିଯୋଗ କରିଥିଲେ । ଥାନା ଆଇଆଇସି ଧର୍ମେନ୍ଦ୍ର କୁମାର ଶାନ୍ତି ଘଟଣାସ୍ଥଳରେ ପହଞ୍ଚି ଅନୁଧ୍ୟାନ କରିବା ପରେ ସନ୍ଧନୀ କୁକୁର ଓ ସାଇଣ୍ଟିଫିକ ଟିମ୍ ଆଣି ତଦନ୍ତ କରିଥିଲେ ବି କିଛି ସୁରାକ ମିଳିପାରିନି । ବାରମ୍ବାର ଲୁଟ୍ ଘଟଣା ଘଟୁଥିବାରୁ ଲାକେ ଭୟଭୀତ ହୋଇ ପଡିଛନ୍ତି । ଗୋଟିଏ ପରେ ଗୋଟିଏ ଚୋରି ଓ ଲୁଟ୍ ହେଉଥିଲେ ବି ପୁଲିସ ଲୁଟେରାଙ୍କ ସମ୍ପର୍କରେ ସାମାନ୍ୟତମ ସୁରାକ ବି ପାଇପାରୁନି । ଯାହାକୁ ନେଇ ଲୋକଙ୍କ ଭିତରେ ଅସନ୍ତୋଷ ବୃଦ୍ଧି ପାଉଛି ।

Powered by Froala Editor