ଭୁବନେଶ୍ୱର : ଆଜି ନୂଆଖାଇ  । ସାରା ପଶ୍ଚିମ ଓଡ଼ିଶା ଆଜି ଉତ୍ସବ ମୁଖର  । ଏହି ନୂଆଖାଇ ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କାଳିଆ ସହାୟତା ପ୍ରଦାନ କରିବେ  । ୨୦୨୧-୨୨ ବର୍ଷର ରବି ଫସଲ ପାଇଁ କାଳିଆ ଯୋଜନାରେ କ୍ଷୁଦ୍ର ଓ ନାମମାତ୍ର ଚାଷୀଙ୍କୁ କାଳିଆ ସହାୟତା ପ୍ରଦାନ କରାଯିବ  ।

ଆଜି ରାଜ୍ୟର ୩୭ ଲକ୍ଷରୁ ଉଦ୍ଧ୍ୱର୍ ଚାଷୀଙ୍କୁ କାଳିଆ ଯୋଜନାରେ ୭୪୩ କୋଟି ଟଙ୍କା ଦିଆଯିବ  । ଚାଷୀଙ୍କ ବ୍ୟାଙ୍କ ଆକାଉଂଟକୁ ସିଧାସଳଖ ଏହି ସହାୟତା ରାଶି ପ୍ରଦାନ କରାଯିବ  । ମୁଖ୍ୟମନ୍ତ୍ରୀ ଆଜି ଏହାର ଶୁଭାରମ୍ଭ କରିବେ  । ରାଜ୍ୟ କୃଷି ଓ କୃଷକ ସଶକ୍ତିକରଣ ବିଭାଗ ପକ୍ଷରୁ ଏନେଇ ପ୍ରସ୍ତୁତି କରାଯାଇଛି  ।

ସୂଚନାଯୋଗ୍ୟଯେ, କାଳିଆ ଯୋଜନାରେ କ୍ଷୁଦ୍ର ଓ ନାମମାତ୍ର ଚାଷୀଙ୍କୁ ସହାୟତା ପ୍ରଦାନ କରିବା ପାଇଁ ସରକାର ବ୍ୟବସ୍ଥା କରିଛନ୍ତି  । ଏହି ଯୋଜନାରେ ପ୍ରଥମେ ୧୦ ହଜାର ଟଙ୍କା ଦିଆଯାଉଥିଲା  । କିନ୍ତୁ ପ୍ରଧାନମନ୍ତ୍ରୀ କିସାନ ଯୋଜନାରେ ଚାଷୀଙ୍କୁ ବାର୍ଷିକ ୬ ହଜାର ଟଙ୍କା ଦିଆଯାଉଛି  । ପରେ ରାଜ୍ୟ ସରକାର ଚାଷୀଙ୍କୁ କାଳିଆ ଯୋଜନାରେ ବର୍ଷକୁ ୪ ହଜାର ଟଙ୍କା ଦେବାକୁ ନିଷ୍ପତି ନେଇଛନ୍ତି  । ତେବେ ପିଏମ କିସାନ ଯୋଜନା ଅପେକ୍ଷା କାଳିଆ ଯୋଜନାରେ ବହୁ ହିତାଧିକାରୀ ସୁବିଧା ପାଇପାରୁଛନ୍ତି  । କାହିଁକିନା ଭାଗଚାଷୀଙ୍କୁ ବି ଏଥିରେ ସହାୟତା ପ୍ରଦାନ କରାଯାଉଛି  । ଏହାଛଡ଼ା କାଳିଆ ଯୋଜନାରେ ଚାଷୀଙ୍କ ପିଲାମାନଙ୍କୁ ଉଚ୍ଚଶିକ୍ଷା ପାଇଁ ଛାତ୍ରବୃତିର ପ୍ରାବଧାନ ରହିଛି  ।

Powered by Froala Editor