ରାଜ୍ୟସଭାର ଖାଲି ପଡ଼ିଥିବା ୬ ଆସନ ପାଇଁ ଉପନିର୍ବାଚନ କମିଶନ ତାରିଖ ଘୋଷଣା କରିଛନ୍ତି। ରାଜ୍ୟସଭା ଉପନିର୍ବାଚନ ଅକ୍ଟୋବର ୪ ତାରିଖରେ କରାଇବାକୁ ନିର୍ବାଚନ କମିଶନ ଘୋଷଣା କରିଛନ୍ତି। ଅକ୍ଟୋବର ୪ ତାରିଖରେ ତାମିଲନାଡୁର ୨ଟି, ପଶ୍ଚିମବଙ୍ଗ, ଆସାମ, ମଧ୍ୟପ୍ରଦେଶ ଏବଂ ମହାରାଷ୍ଟ୍ରର ଗୋଟିଏ ଲେଖାଁ ଆସନ ନିମନ୍ତେ ନିର୍ବାଚନ ହେବ। ସେହିପରି ବିହାର ବିଧାନ ପରିଷଦ ଉପନିର୍ବାଚନ ମଧ୍ୟ ସମାନ ତାରିଖରେ ହେବ। ଏହ ସମ୍ବନ୍ଧରେ ସେପ୍ଟେମ୍ବର ୧୫ ତାରିଖରେ ବିଜ୍ଞପ୍ତି ଜାରି ହେବ।

ପଶ୍ଚିମବଙ୍ଗ, ଆସାମ, ତାମିଲନାଡୁ ଏବଂ ମଧ୍ୟପ୍ରଦେଶରୁ ସଦସ୍ୟମାନେ ଇସ୍ତଫା ଦେବାରୁ ୬ଟି ରାଜ୍ୟସଭା ଆସନରୁ ୫ଟି ଆସନ ଖାଲି ହୋଇଯାଇଥିଲା। ମହାରାଷ୍ଟ୍ରରୁ ରାଜ୍ୟସଭା ସଦସ୍ୟ ହୋଇଥିବା ରାଜୀବ ଶଙ୍କରରାଓ ସାତାୱଙ୍କ ଦୁଃଖଦ ବିୟୋଗ ଯୋଗୁଁ ୬ଷ୍ଠ ଆସନଟି ଖାଲି ହୋଇଯାଇଥିଲା। ବିହାର ବିଧାନ ପରିଷଦ ଆସନରେ ଥିବା ତନବୀର ଅଖତରଙ୍କର ମେ’ ୯ ତାରିଖରେ ଦେହାନ୍ତ ହୋଇଥିଲା। ଯାହା ପରଠାରୁ ଏହି ସିଟ୍ ଖାଲି ପଡ଼ିଛି।

ରାଜ୍ୟସଭା ଉପନିର୍ବାଚନ ପାଇଁ ନାମାଙ୍କନ ପତ୍ର ଦାଖଲ କରିବାର ଶେଷ ତାରିଖ ସେପ୍ଟେମ୍ବର ୨୨ ତାରିଖ ହେବ। ନାମାଙ୍କନ ପତ୍ର ଯାଞ୍ଚର ଶେଷ ତାରିଖ ସେପ୍ଟେମ୍ବର ୨୩ ରହିଛି। ସେପ୍ଟେମ୍ବର ୨୭ ତାରିଖରେ ନାମାଙ୍କନ ପତ୍ର ପ୍ରତ୍ୟାହାର କରାଯାଇପାରିବ। ଅକ୍ଟୋବର ୪ ତାରିଖ ସକାଳ ୯ଟାରୁ ୪ ଯାଏ ଯାଏ ମତଦାନ ହେବ। ଏହା ପରେ ସନ୍ଧ୍ୟା ୫ଟାରୁ ଭୋଟ୍ ଗଣତି ଆରମ୍ଭ ହେବ। ଫଳାଫଳ ଅକ୍ଟୋବର ୪ ତାରିଖ ସନ୍ଧ୍ୟା ସୁଦ୍ଧା ପ୍ରକାଶ ପାଇବ।

Powered by Froala Editor