ଏସବିଆଇ ଖୋଲିଲା ଭାସମାନ ଏଟିଏମ
ଶ୍ରୀନଗର: ଭାରତର ସର୍ବବୃହତ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ (ଏସବିଆଇ) ଶ୍ରୀନଗରସ୍ଥିତ ଡାଲ ହ୍ରଦରେ ଭାସମାନ ଏଟିଏମ ବ୍ୟବସ୍ଥାର ଶୁଭାରମ୍ଭ କରିଛି। ପୂର୍ବରୁ ଏହା ୨୦୦୪ରେ କେରଳରେ ପ୍ରଥମ କରି ଏହିଭଳି ଭାସମାନ ଏଟିଏମ ବ୍ୟବସ୍ଥା ପ୍ରଚଳନ କରିଥିଲା। କେରଳ ଜାହାଜ ଚଳାଚଳ ଓ ଅନ୍ତର୍ଦ୍ଦେଶୀୟ ନୌଚାଳନା ନିଗମ ମାଲିକାନାରେ ଥିବା ଝଙ୍କାର ୟାକ୍ଟରେ ଏହି ଏଟିଏମ୍ ସ୍ଥାପନ କରାଯାଇଥିଲା। ଏବେ ଲୋକପ୍ରିୟ ପର୍ଯ୍ୟଟନସ୍ଥଳ ଏବଂ ସ୍ଥାନୀୟ ଜନସାଧାରଣଙ୍କ ଯାତାୟତ ମାଧ୍ୟମ ଡାଲ ହ୍ରଦରେ ଏକ ହାଉସବୋଟରେ ସେହିଭଳି ଏକ ଏଟିଏମ୍ ସ୍ଥାପନ କରାଯାଇଛି। ଏହି ଏଟିଏମ ଉକ୍ତ ଅଞ୍ଚଳର ଦୀର୍ଘ ଦିନରୁ ନଗଦ ଅର୍ଥ ଆବଶ୍ୟକତାକୁ ପୂରଣ କରିପାରିବ। ଏସବିଆଇ ଅଧ୍ୟକ୍ଷ ଦିନେଶ କୁମାର ଖାରା ଉକ୍ତ ଏଟିଏମ ଉଦଘାଟନ କରିଛନ୍ତି। ଏସବିଆଇର ଏହି ଏଟିଏମ ସ୍ଥାପନକୁ ନେଇ ଶ୍ରୀନଗର ସ୍ଥାନୀୟ ଜନସାଧାରଣ ଖୁସି ବ୍ୟକ୍ତ କରିଛନ୍ତି। ଏହାଦ୍ୱାରା ସ୍ଥାନୀୟ ଜନସାଧାରଣଙ୍କ ସହିତ ପର୍ଯ୍ୟଟକଙ୍କର ନଗଦ ଅର୍ଥ ଆବଶ୍ୟକତା ପୂରଣ ହୋଇପାରିବ। ଏସବିଆଇ ୱେବସାଇଟ ଅନୁଯାୟୀ ଭାରତରେ ଏହାର ପ୍ରାୟ ୬୦ ହଜାରରୁ ଅଧିକ ଏଟିଏମ ରହିଛି। ଏଥିସହିତ ଦେଶରେ ଏହାର ୨୨,୨୨୪ଟି ଶାଖା ରହିଛି।
Powered by Froala Editor
