୨୮ରୁ ଲଘୁଚାପ ବର୍ଷା
ଭୁବନେଶ୍ୱର : ମୌସୁମୀ ଏଥର ଓଡ଼ିଶାକୁ ଧୋକା ଦେଇ ଚାଲିଛି । ଚାଷୀ କୂଳ ଆକାଶକୁ ଅନେଇ ବସିଛନ୍ତି । ବର୍ଷାର ଦେଖା ନାହିଁ । ଯେତିକି ବର୍ଷା ହେଉଛି, ସେଥିରେ ରୁଆ ବେଉଷଣ ହୋଇପାରୁନି । ଏଯାଏ ଯେତିକି ଲଘୁଚାପ ହେଲାଣି, ତାହା ବି ଭଲ ବର୍ଷା ଦେଉନି । ପାଣିପାଗ ବିଶେଷଜ୍ଞ ଆକଳନ କରୁଛନ୍ତି, ଆସନ୍ତା ୨୮ରେ ବଙ୍ଗୋପସାଗରରେ ପୁଣି ଏକ ଲଘୁଚାପ ସୃଷ୍ଟି ହୋଇପାରେ । ଏହି ଲଘୁଚାପ ହେଲେ ଅଗଷ୍ଟ ଶେଷ ସପ୍ତାହବେଳକୁ ଓଡ଼ିଶାରେ ଭଲ ବର୍ଷା ଆଶା କରାଯାଉଛି । ସେପର୍ଯ୍ୟନ୍ତ ରାଜ୍ୟରେ ବିଶେଷ ବର୍ଷା ସମ୍ଭାବନା ନାହିଁ । ସ୍ଥିତି ମରୁଡ଼ି ଆଡ଼କୁ ମୁହାଁଉଥିବାବେଳେ ଚାଷୀକୂଳ ଆଗାମୀ ଲଘୁଚାପକୁ ଅପେକ୍ଷା କରିଛନ୍ତି । ମାତ୍ର ବହୁ ବିଳମ୍ବ ହୋଇସାରିଥିବାରୁ ଏଥର ଧାନ ଚାଷ ବିଶେଷ ପ୍ରଭାବିତ ହେବ ବୋଲି କୁହାଯାଉଛି । ରାଜ୍ୟରେ ଜୁନ୍ ୧ରୁ ଆଜି ସୁଦ୍ଧା ଯେତିକି ବର୍ଷା ହୋଇଛି, ତାହା ସ୍ୱାଭାବିକଠାରୁ ଢେର କମ୍ । ୨୬ଟି ଜିଲ୍ଲାରେ ବର୍ଷା ଅଭାବ ରହିଛି । ଅଗଷ୍ଟରେ ବର୍ଷା ଅଭାବ ସ୍ଥିତି ଗୁରୁତର ରୂପ ନେଲାଣି । ୨୮ଟି ଜିଲ୍ଲାରେ ବର୍ଷା କମ୍ ଥିବାବେଳେ ପ୍ରାୟ ଅଧା ଓଡ଼ିଶାରେ ବିଲ ଫାଟି ଆଁ କରିଛି ।
Powered by Froala Editor
