ପୂଜା ମସାଗ୍ରୀ ଚୋରି ଘଟଣାକୁ ନେଇ ଗାଁରେ ବସିଲା କଙ୍ଗାରୁ କୋର୍ଟ । ଜଣେ ବୃଦ୍ଧଙ୍କ ନାଁରେ ହୋଇଥିଲା ଚୋରି ଅଭିଯୋଗ । ହେଲେ କଙ୍ଗାରୁ କୋର୍ଟରେ ନ୍ୟାୟ ବିଚାର ଏମିତି ଯେ, ଯାହାର ହେଲେବି ମୁଣ୍ଡ ତଳକୁ ହୋଇଯିବ । ବୃଦ୍ଧଙ୍କୁ ଚପଲ ମାଳ ପକାଇ ଓ ହାତ ବାନ୍ଧି ଗାଁ ଦାଣ୍ଡରେ ଚଲାଯାଇଥିଲା । ଏ ଘଟଣା ବଲାଙ୍ଗୀର ବ୍ରାହ୍ମଣୀଡୁଙ୍ଗୁରୀ ଗାଁର । ସୂଚନା ଅନୁଯାୟୀ, ଗାଁର ଦଣ୍ଡନାଚ ଆୟୋଜନ ପାଇଁ ପ୍ରସ୍ତୁତି ଚାଲିଥିଲା । କୀର୍ତ୍ତନ ଛତ୍ରିଆର ଉଦ୍ୟମକ୍ରମେ ବ୍ରାହ୍ମଣୀଡୁଙ୍ଗୁରୀରୁ ଦଣ୍ଡନାଚ ଆରମ୍ଭ ହୋଇ ପରବର୍ତ୍ତି ସମୟରେ ଅନ୍ୟ ଗାଁମାନଙ୍କୁ ଯାଇଥାନ୍ତା । ହେଲେ ଗତ ଚାରିରୁ ପାଞ୍ଚଦିନ ତଳେ ଦଣ୍ଡନାଚରେ ବ୍ୟବହୃତ ପୂଜା ସାମଗ୍ରୀକୁ ସେହି ଗାଁର କେହି ଜଣେ ଚୋରି କରିନେଇଥିଲା । ଏନେଇ ପଚରାଉଚୁରା କରିବାରୁ କେତେକ ପ୍ରତ୍ୟକ୍ଷଦର୍ଶୀ ସେହି ଗାଁର ବୃଦ୍ଧ ମୁରାଲ କୁଅରଙ୍କ ନାଁ ନେଇଥିଲେ । ଗତ ସୋମବାର ଦିନ କୀର୍ତ୍ତନ ଏବଂ ତାଙ୍କର କେତେକ ସହଯୋଗୀ ମୁରାଲଙ୍କୁ ପାଇବା ପରେ ତାଙ୍କୁ ଗାଳିଗୁଲଜ କରିବାରୁ ସେ କରିଥିବା ଦୋଷ ସ୍ୱୀକାର କରିଥିଲେ । ସେ ମଧ୍ୟ ନିଶାରେ ସାମଗ୍ରୀକୁ ନେଇ ଯାଇଥିବା କହିଥିଲେ । ଏହାପରେ କୀର୍ତ୍ତନଙ୍କ ଭାଇ ସଦାନନ୍ଦ ମୁରାଲଙ୍କ ହାତକୁ ବାନ୍ଧି ବେକରେ ଚପଲ ମାଳା ପିନ୍ଧାଇ ଗାଁରେ ବୁଲାଇଥିଲେ । ପରେ ତାଙ୍କ ମୁହଁରେ ଚୂନ ପାଉଁଶ ମଧ୍ୟ ବୋଳି ଏଭଳି ତାଙ୍କୁ ଦଣ୍ଡ ଦିଆଯିବ ବୋଲି କହିଥିଲେ । ଅବଶ୍ୟ ରାସ୍ତାରେ କେତେକ ବରିଷ୍ଠ ବ୍ୟକ୍ତି ଏହାକୁ ଅମାନବୀୟ କାର୍ଯ୍ୟ କହି ଏଥିରୁ ନିବୃତ୍ତ ରହିବାକୁ କହିଥିଲେ । ହେଲେ ସେମାନେ ଶୁଣିବା ପରେ ପରିବର୍ତ୍ତେ ବୃଦ୍ଧଙ୍କ ଉପରେ ଆହୁରି ନିର୍ଯ୍ୟାତନା ଦେଇଥିଲେ । ମାଡ଼ ମାରିବା ସହ ତାଙ୍କୁ ଅଶ୍ଲୀଳ ଭାଷାରେ ଗାଳିଗୁଲଜ କରିବା ପରେ ସେହି ଭିଡିଓକୁ ସୋସିଆଲ ମିଡିଆରେ ଭାଇରାଲ କରିଥିଲେ ବୋଲି ଅଭିଯୋଗ ଆସିଛି । ଏନେଇ ଖବର ପାଇବା ପରେ ସଦର ପୋଲିସ ଜଣକୁ ଥାନାରେ ଅଟକ ରଖିଛି । ସେପଟେ ବୃଦ୍ଧଙ୍କ ଝିଅ ଥାନାରେ ତାଙ୍କ ବାପାଙ୍କୁ କଙ୍ଗାରୁ କୋର୍ଟ କରି ନିର୍ଯ୍ୟାତନା ଦେଇଥିବା ଅଭିଯୋଗ କରିଛନ୍ତି ।