କଟକ: ଏସସିବିରେ ଜଣେ ମହିଳା ଏକାସଙ୍ଗରେ ୪ ଶିଶୁକନ୍ୟା ଜନ୍ମ ଦେଇଛନ୍ତି । ସମ୍ପୃକ୍ତ ମହିଳା ରକ୍ତହୀନତା, ଜଣ୍ଡିସ, ସିକିଲସେଲ ଭଳି ମାରାତ୍ମକ ରୋଗରେ ପୀଡ଼ିତ ଥିଲେ ବି ଶିଶୁକନ୍ୟାଙ୍କୁ ଜନ୍ମ ଦେବା ପରେ ସେ ସୁରକ୍ଷିତ ଅଛନ୍ତି । ତେବେ ଶିଶୁକନ୍ୟାଙ୍କ ମଧ୍ୟରୁ ଦୁଇ ଜଣଙ୍କ ମୃତୁ୍ୟ ଘଟିଛି । ଅନ୍ୟ ଦୁଇ ଜଣ ଗୁରୁତର ଅଛନ୍ତି । ଅନ୍ୟପଟେ ମହିଳାଙ୍କୁ ଏସସିବିରେ ଭର୍ତ୍ତି କରିବା ସହ ସମସ୍ତ ସହାୟତା ଯୋଗାଇ ଦେଇଛନ୍ତି ଚଳଚ୍ଚିତ୍ର ଅଭିନେତା ସବ୍ୟସାଚୀ ମିଶ୍ର । ଶିଶୁକନ୍ୟାଙ୍କୁ ସେ ଲକ୍ଷ୍ମୀ ଭାବେ ବର୍ଣ୍ଣନା କରିବା ସହିତ ଭାଣିଜୀ ଭାବେ ଗ୍ରହଣ କରିଛନ୍ତି । ସୂଚନା ମୁତାବକ ଶରଣକୁଳ ଅଞ୍ଚଳରେ ଜଣେ ମହିଳାଙ୍କ ଗର୍ଭରେ ୪ଟି ସନ୍ତାନ ବଢ଼ୁଥିବା ବେଳେ ସେ ଅର୍ଥାଭାବ କାରଣରୁ ଉପଯୁକ୍ତ ଚିକିତ୍ସା ପାଉନଥିବା ସବ୍ୟସାଚୀ ଜାଣିବାକୁ ପାଇଥିଲେ । ଏହା ପରେ ସବ୍ୟସାଚୀ ଏକ ଆମ୍ବୁଲାନ୍ସ ଯୋଗାଡ଼ କରି ମହିଳାଙ୍କୁ ଏସସିବି ଆଣିବାର ବ୍ୟବସ୍ଥା କରିଥିଲେ । ମହିଳା ଜଣକ ବିଭିନ୍ନ ରୋଗରେ ପୀଡ଼ିତ ଥିବାରୁ ମେଡିକାଲରେ ସ୍ତ୍ରୀ ଓ ପ୍ରସୂତି ରୋଗ ବିଭାଗ, ଲିଭର ଓ ପିତ୍ତକୋଷ ବିଭାଗ ସହିତ ରକ୍ତରୋଗ ବିଭାଗର ଡାକ୍ତରମାନଙ୍କୁ ନେଇ ଏକ ଟିମ ଗଠନ କରାଯାଇଥିଲା । ପ୍ରସୂତି ରୋଗ ବିଭାଗର ମୁଖ୍ୟ ପ୍ରଫେସର ଡାକ୍ତର ତୁଷାର କରଙ୍କ ନେତୃତ୍ୱରେ ଗଠିତ ଉକ୍ତ ଟିମ ମହିଳାଙ୍କ ଚିକିତ୍ସା କରିଥିଲେ । ବିନା ଅସ୍ତ୍ରୋପଚାରରେ ଯେଭଳି ଏହି ପ୍ରସବ ହୋଇପାରିବ ସେ ବ୍ୟବସ୍ଥା ମଧ୍ୟ କରାଯାଇଥିଲା । 

Powered by Froala Editor