ଗୁରୁଗ୍ରାମ ହିଟ୍ - ଆଣ୍ଡ- ରନ୍ ମାମଲାର ଅଭିଯୁକ୍ତ କଲ୍ୟାଣ ବୈଂସଲା ପୁଲିସ କଷ୍ଟଡିରୁ ଫେରାର ହେବାକୁ ଚେଷ୍ଟା କରୁଥିଲା । ଗୁରୁଗ୍ରାମ୍ ପୁଲିସ ଏହି ବିଷୟରେ ସୂଚନା ଦେଇ କହିଛି ଯେ, ରାଜସ୍ଥାନର ଦୌସାରୁ ଗିରଫ କରାଯିବା ପରେ ସେ ଟୟଲେଟ୍‌ ବାହାନା କରି ଫେରାର ଉଦ୍ଦେଶ୍ୟରେ ଥିଲା । ହେଲେ ଏହି ସମୟରେ ସେ ତଳେ ଖସି ପଡ଼ିଲା । ପୁଲିସ ତାକୁ କାବୁ କରି ନେଇ ଥିଲା ।

ଗତ ୧୩ ତାରିଖ ରବିବାର ସକାଳେ ଗଲ୍ଫ କୋର୍ସ ରୋଡରେ ଗୋଟିଏ କାର ଜଣେ ମହିଳା ବାଇକ ଚାଳକଙ୍କୁ ଧକ୍କା ଦେବାର ଏକ ଭିଡିଓ ସୋସିଆଲ ମିଡିଆରେ ଶୀଘ୍ର ଭାଇରାଲ ହୋଇଥିଲା। ଭିଡିଓ ଭାଇରାଲ ପରେ ଗୁରୁଗ୍ରାମ ପୋଲିସ ନିଜଆଡୁ ତଦନ୍ତ କରି ମାମଲା ରୁଜୁ କରିଥିଲା। ଏହା ପରେ, ପୋଲିସ ଅଭିଯୁକ୍ତକୁ ଚିହ୍ନଟ ଏବଂ ଗିରଫ କରିବା ପାଇଁ ତଦନ୍ତକୁ ଜୋରଦାର କରିଥିଲା।

ପୋଲିସ ଘଟଣାସ୍ଥଳ ଏବଂ ନିକଟରେ ଥିବା ସିସିଟିଭି କ୍ୟାମେରାର ଫୁଟେଜ୍ ଯାଞ୍ଚ କରିଥିଲା। ଭାଇରାଲ୍ ଭିଡିଓ ଏବଂ ସିସିଟିଭି ଫୁଟେଜ୍କୁ ତନ୍ନ ତନ୍ନ କରି ଯାଞ୍ଚ କରାଯାଇଥିଲା। ତଦନ୍ତ ଆଧାରରେ ପୋଲିସ ହତ୍ୟା ଉଦ୍ୟମ ପାଇଁ ଧାରା 109 ଲଗାଇଛି।  ସ୍ପୋର୍ଟସ୍ ବାଇକ୍ ଚାଳକ ସିଆ ତାଙ୍କ ବନ୍ଧୁମାନଙ୍କ ସହିତ ବୁଲିବାକୁ ବାହାରକୁ ଯାଇଥିଲେ। ଏହି ସମୟରେ କାରରେ ଥିବା ଜଣେ ଯୁବକ ତାଙ୍କୁ ଗଲ୍ଫ କୋର୍ସ ରୋଡରେ ଅଟକିବାକୁ ଇଙ୍ଗିତ କରିଥିଲେ।

ଏହା ପୂର୍ବରୁ ପୁଲିସ କହିଥିଲା ଯେ, ବାଇକକୁ ଧକ୍କା ଦେବା ପୂର୍ବରୁ କଲ୍ୟାଣ ବୈଂସଲା ମହିଳା ବାଇକ୍ ଚାଳକଙ୍କ ପ୍ରତି ଅଶ୍ଳୀଳ ମନ୍ତବ୍ୟ ଦେଇଥିଲା । କାର୍ ଧକ୍କା ହେବା ଫଳରେ ମହିଳାଜଣକ କିଛି ଦୂର ପର୍ଯ୍ୟନ୍ତ ଘୋଷାଡ଼ି ହୋଇଯାଇ ଥିଲେ । ଡିସିପି ଆହୁରି ମଧ୍ୟ କହିଛନ୍ତି ଯେ, ଘଟଣାର ଭିଡିଓ ସାମ୍ନାକୁ ଆସିବା ମାତ୍ରେ କ୍ୟାମେରାରେ କଏଦ ହୋଇଥିବା ଡ୍ରାଇଭରର ଅସ୍ପଷ୍ଟ ଫଟୋ ଆଧାରରେ ପୁଲିସ ତଦନ୍ତ ଆରମ୍ଭ କରି ଥିଲା । ମହିଳା ଜଣଙ୍କର ପରିଚୟ ଶିବାନୀ ଚୌହାନ ଓରଫ୍ ସିୟା ବୋଲି ଜଣାପଡ଼ିଛି ।

Powered by Froala Editor