ଗଣେଶ ଚତୁର୍ଥୀରେ ତାମିଲନାଡୁର ପ୍ରସିଦ୍ଧ ମଦୁରୈ ମୀନାକ୍ଷୀ ଅମ୍ମନ ମନ୍ଦିରରେ ପହଞ୍ଚିଛି ୫ ବର୍ଷୀୟ ମାଈ ହାତୀ ଦୁର୍ଗା । ମୀନାକ୍ଷୀ ମନ୍ଦିରରେ ପହଞ୍ଚିବା ପରେ ଦୁର୍ଗାକୁ ଦେଖିବାକୁ ଭିଡ଼ ଜମିଥିଲା । ପାରମ୍ପରିକ ରୀତିନୀତିରେ ତା’ଉପରେ ପୁଷ୍ପ ବୃଷ୍ଟି କରାଗଲା । ମନ୍ଦିରରେ ପୂର୍ବରୁ ପାର୍ବତୀ ନାମକ ଏକ ମାଈ ହାତୀ ଅଛି । ଏବେ ଦୁର୍ଗା ତା’ର ନୂଆ ସାଥୀ ହେବ । ଆସାମର ମାନସ ଜାତୀୟ ପାର୍କରୁ ପ୍ରାୟ ୩ ହଜାର କିମିର ଦୂରତା ଅତିକ୍ରମ କରି ଟ୍ରକ୍ ରେ ତାକୁ ଅଣାଯାଇଛି । 

ଗତ ସପ୍ତାହ ତାମିଲନାଡୁ ବନ ବିଭାଗର ମଞ୍ଜୁରି ପରେ ଦୁର୍ଗାର ସ୍ଥାନାନ୍ତର ବାଟ ଫିଟିଛି । ରାଜ୍ୟର ମନ୍ଦିରମାନଙ୍କରେ ହାତୀଙ୍କୁ ବନ୍ଦୀ ରଖିବା ଉପରେ କାର୍ଯ୍ୟାନୁଷ୍ଠାନ ମାମଲାରେ ନିକଟରେ ମାଡ୍ରାସ ହାଇକୋର୍ଟଙ୍କ ଶୁଣାଣି ପରେ ଦୁର୍ଗାକୁ ଆସାମରୁ ତାମିଲନାଡୁକୁ ଅଣାଯାଇଛି । ମନ୍ଦିର ପରିସରରେ ମଡ୍ (କାଦୁଅ) ବାଥ୍, ଜଳ ସ୍ନାନ ଓ ବୁଲିବା ସ୍ଥାନ ଭଳି ସୁବିଧାର ଯାଞ୍ଚ ପରେ ତାମିଲନାଡୁ ବନ ବିଭାଗ ଓ ଡିଷ୍ଟ୍ରିକ୍ଟ କ୍ୟାପ୍ଟିଭ ଏଲିଫ୍ୟାଣ୍ଟ ମ୍ୟାନେଜମେଣ୍ଟ କମିଟି ଏନ୍ଓସି ଜାରି କରିଥିଲା । 

ତେବେ ବନ୍ୟଜୀବ ସଂରକ୍ଷଣ ସମୂହ ଓ କର୍ମକର୍ତ୍ତାମାନେ ଦୁର୍ଗାର ସ୍ଥାନାନ୍ତରକୁ ବିରୋଧ କରିଛନ୍ତି । ସେମାନଙ୍କ ଅନୁସାରେ, ହାତୀଙ୍କୁ ସେମାନଙ୍କ ପ୍ରାକୃତିକ ପରିବେଶଠୁ ଦୂର ଜଂଜିରରେ ବାନ୍ଧି ରଖିବା କ୍ରୂରତା । ଏହି ସ୍ଥାନାନ୍ତରର ନ୍ୟାୟିକ ପ୍ରକ୍ରିୟା, ଦୁର୍ଗାର ବୟସ ଦସ୍ତାବିଜ ଓ ମାମଲାର ସ୍ୱଚ୍ଛତା ଉପରେ ମଧ୍ୟ ସେମାନେ ପ୍ରଶ୍ନ ଉଠାଇଛନ୍ତି । 

Powered by Froala Editor