ପୁରୀ : ଶ୍ରୀମନ୍ଦିର ସିଂହଦ୍ୱାର ଆଗରେ ପହଞ୍ଚିଛନ୍ତି ତିନିରଥ। ଶ୍ରୀଗୁଣ୍ଡିଚା ମନ୍ଦିରରେ ଆଡ଼ପ ଲୀଳା ଶେଷକରି ବାହୁଡିଛନ୍ତି ମହାପ୍ରଭୁ। ପ୍ରାୟ ୫ଲକ୍ଷ ଶ୍ରଦ୍ଧାଳୁ ବାହୁଡ଼ାଯାତ୍ରାରେ ସାମିଲ ହୋଇଛନ୍ତି। ରାତି ୧୧ଟା ପର୍ଯ୍ୟନ୍ତ ରଥଟଣା ଯାଇଛି। ତିନିରଥ କଡ଼ା ସୁରକ୍ଷା ବଳୟରେ ରଖାଯାଇଛି। ଶ୍ରଦ୍ଧାଳୁମାନେ ରଥାରୁଢ ଦାରୁବ୍ରହ୍ମଙ୍କୁ ଦର୍ଶନ କରୁଛନ୍ତି। ରଥ ଉପରେ ଚାଲିଛି ପ୍ରଭୁଙ୍କ ସେବାପୂଜା। ଶନିବାର ହରିଶୟନ ଏକାଦଶୀ ତିଥିରେ ପ୍ରଭୁ ଶ୍ରୀବଳଭଦ୍ର, ଶ୍ରୀଜଗନ୍ନାଥ, ଦେବୀ ସୁଭଦ୍ରାଙ୍କୁ ରଥ ଉପରେ ସୁନାବେଶ କରାଯିବ। ତେଣୁ ତିନିରଥ
ସିଂହଦ୍ୱାର ଆଗରେ ପହଞ୍ଚିବା ପରେ ପ୍ରଶାସନ ପକ୍ଷରୁ ଜୋରଦାର ପ୍ରସ୍ତୁତି ଚାଲିଛି। ଶୁକ୍ରବାର ଗୁଣ୍ଡିଚା ମନ୍ଦିର ଜନ୍ମବେଦୀରେ ପ୍ରଭୁଙ୍କ ମଙ୍ଗଳଆଳତି, ମଇଲମ, ତଡ଼ପଲାଗି, ଅବକାଶ, ସୂର୍ଯ୍ୟପୂଜା, ଦ୍ୱାରପାଳପୂଜା ସହ ବେଶ କରାଯାଇଥିଲା। ଗୋପାଳବଲ୍ଲଭ ଓ ସକାଳଧୂପ ଏକାଠି ଅନୁଷ୍ଠିତ ହୋଇଥିଲା। ଖେଚୁଡି ଭୋଗ ଖାଇ ରଥ ଉପରକୁ ବିଜେ କରିଥିଲେ ଚତୁର୍ଦ୍ଧାବିଗ୍ରହ। ଦିନ୧୦ଟା ୫୦ରେ ପହଣ୍ଡି ଆରମ୍ଭ ହୋଇ ୨ଟା ୧୫ରେ ଶେଷ ହୋଇଥିଲା। ଏହାପରେ ମଦନମୋହନ ଓ ରାମକୃଷ୍ଣ ରଥ ଉପରେ ବିଜେ କରିଥିଲେ। ଗଜପତି ମହାରାଜ ଶ୍ରୀଦିବ୍ୟସିଂହଦେବ ତିନିରଥ ଉପରେ ଛେରାପହଁରା କରିଥିଲେ। ରଥରୁ ଚାରମାଳ ଫିଟାଯାଇ ଘୋଡାଲାଗି କରାଯାଇଥିଲା। ଅପରାହ୍ଣ ୪ଟା ୩୦ରେ ଆରମ୍ଭ ହୋଇଥିଲା ରଥଟଣା। ପ୍ରଥମେ ବଡ଼ଠାକୁର ଶ୍ରୀବଳଭଦ୍ରଙ୍କ ତାଳଧ୍ୱଜ, ପରେ ଦେବୀ ସୁଭଦ୍ରାଙ୍କ ଦର୍ପଦଳନ ଏବଂ ଶେଷରେ କାଳିଆ ଠାକୁର ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥ ଟଣା ଯାଇଥିଲା। ଲକ୍ଷ ଲକ୍ଷ ଶ୍ରଦ୍ଧାଳୁ ଉତ୍କଣ୍ଠାର ସହ ରଥ ଟାଣିଥିଲେ। ମେଘୁଆ ପାଗ ଯୋଗୁଁ ଭକ୍ତଙ୍କ ସଂଖ୍ୟା ବୃଦ୍ଧି ପାଇଥିଲା। ମାଉସୀ ମା’ ମନ୍ଦିର ସମ୍ମୁଖରେ ପ୍ରଭୁଙ୍କୁ ରଥ ଉପରେ ପୋଡପିଠା ଭୋଗ କରାଯାଇଛି। ନନ୍ଦିଘୋଷ ରଥ ଶ୍ରୀନଅର ସମ୍ମୁଖରେ ପହଞ୍ଚିବା ପରେ ଗଜପତି ମହାରାଜ ଲକ୍ଷ୍ମୀନାରାୟଣ ଭେଟ କରାଇଛନ୍ତି। ଶନିବାର ମହାପ୍ରଭୁଙ୍କ ସୁନାବେଶ ହେବାକୁ ଥିବାରୁ ଶୁକ୍ରବାର ରାତିରେ ଆଲୋକ ବ୍ୟବସ୍ଥା କରାଯାଇ ରଥଟଣା ଯାଇଛି। ଭକ୍ତଙ୍କ ସୁରକ୍ଷା, ଗହଳି ନିୟନ୍ତ୍ରଣ ଓ ଟ୍ରାଫିକ ନିୟନ୍ତ୍ରଣ ପାଇଁ ୧୩ହଜାର ପୁଲିସ ଫୋର୍ସ, ୨୦ କମ୍ପାନୀ କେନ୍ଦ୍ରୀୟ ସୁରକ୍ଷା ବାହିନୀ, ପ୍ରାୟ ୨ହଜାର ପୁଲିସ ଅଧିକାରୀ ନିୟୋଜିତ ହୋଇଥିଲେ। ୨୩ ଆଇପିଏସ୍‌‌ ଅଧିକାରୀଙ୍କୁ ସୁରକ୍ଷା ବ୍ୟବସ୍ଥା ତଦାରଖ ଦାୟିତ୍ୱ ଦିଆଯାଇଥିଲା।
ଶନିବାର ହରିଶୟନ ଏକାଦଶୀ ତିଥିରେ ରଥ ଉପରେ ଦାରୁବ୍ରହ୍ମଙ୍କୁ ସୁନାବେଶ କରାଯିବ। ମହଣ ମହଣ ହୀରାନୀଳା ଖଚିତ ସୁନାରେ ଆଭୁଷିତ ହେବେ ମହାପ୍ରଭୁ। ରଥ ଉପରେ ଶ୍ରୀଜୀଉଙ୍କ ସନ୍ଧ୍ୟା ଆଳତି ଓ ଏକାଦଶୀ ସର୍ବାଙ୍ଗ ପରେ ଅପରାହ୍ଣ ୫ଟାରୁ ୬ଟା ୩୦ ମଧ୍ୟରେ ପ୍ରଭୁଙ୍କୁ ସୁନାବେଶ କରାଯିବ। ରାତି ୧୦ଟା ଠାରୁ ୧୧ଟା ମଧ୍ୟରେ ମହାପ୍ରଭୁଙ୍କ ଶ୍ରୀଅଙ୍ଗରୁ ସୁନାବେଶ ମଇଲମ କରାଯିବ। ପ୍ରାୟ ୧୦ ଲକ୍ଷ ଶ୍ରଦ୍ଧାଳୁଙ୍କ ସମାଗମକୁ ଦୃଷ୍ଟିରେ ରଖି ଆବଶ୍ୟକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି।

Powered by Froala Editor