ଭୁବନେଶ୍ବର: ଆଜି ଠାରୁ ମହାକାଶରେ ଶନି ଗ୍ରହ ଆକର୍ଷଣୀୟ ଭାବେ ଦୃଶ୍ୟମାନ ହେବ। ସୂର୍ୟ୍ୟ ଚାରିପଟେ ଶନି ଏବଂ ପୃଥିବୀ ଘୂରି ବୁଲିବା ବେଳେ ସୋମବାର ସେମାନେ ପରସ୍ପରର ସବୁଠାରୁ ନିକଟତର ହେବେ। ଶନି ଗ୍ରହ ପୃଥିବୀର ନିକଟତର ହେଉଥିବାରୁ ଉଜ୍ଜ୍ବୃଳ ବୃହସ୍ପତି ଗ୍ରହ ମଧ୍ୟ ଖାଲି ଆଖିରେ ଦେଖିହେବ ବୋଲି ପଠାଣି ସାମନ୍ତ ପ୍ଲାନେଟାରିୟମର ଉପ ନିର୍ଦେଶକ ଶୁଭେନ୍ଦୁ ପଟ୍ଟନାୟକ କହିଛନ୍ତି। ଆଜି ସୂର୍ୟ୍ୟ ଅସ୍ତ ହେବା ସହ ଶନି ଗ୍ରହ ପୂର୍ବ ଦିଗବଳୟରେ ଉଦୟ ହୋଇ ଧୀରେ ଧୀରେ ପଶ୍ଚିମ ଦିଗକୁ ଗତିକରି ୧୨ ଘଣ୍ଟା ପରେ ଅର୍ଥାତ୍‌ ଭୋର ସମୟରେ ଅସ୍ତ ହେବ। ମେଘ ମୁକ୍ତ ପରିଷ୍କାର ଆକାଶରେ ଅଗଷ୍ଟ ମାସ ପ୍ରତି ରାତିରେ ସଂଧ୍ୟା ଠାରୁ ସକାଳ ଯାଏଁ ଶନି ସହ ବୃହସ୍ପତି ଖାଲି ଆଖିରେ ଦେଖାଯିବ। ଶନି ପୃଥିବୀର ଅତି ନିକଟତର ହେଉଥିବାରୁ ଖାଲି ଆଖିରେ ସାଧାରଣ ଦିନ ତୁଳନାରେ ଅଧିକ ଉଜ୍ଜଳ ଦେଖାଯିବା ସହ ଏହାର ବଳୟ ଏବଂ ଉପଗ୍ରହ ସାଧାରଣ ଦୂରବୀକ୍ଷଣ ଯନ୍ତ୍ର ଦ୍ବାରା ଦେଖାଯିବ।
ସୂଚନା ଅନୁସାରେ ପୃଥିବୀଠାରୁ ଶନିର ଦୂରତା କ୍ରମାଗତ ଭାବେ ବଦଳିଥାଏ। ପ୍ରତି ଏକ ବର୍ଷ ଏବଂ ୧୩ ଦିନରେ ଶନି ଏବଂ ପୃଥିବୀ ନିକଟତର ହୋଇଥାନ୍ତି ଓ ଗ୍ରହ ଦୁଇଟି ସୂର୍ୟ୍ୟର ଗୋଟିଏ ପଟରେ ରୁହନ୍ତି। ୨୦୨୦ ମସିହା ଜୁଲାଇ ୨୦ରେ ଶନି ପୃଥିବୀର ନିକଟତର ହୋଇଥିଲା ଓ ଆଗାମୀ ୨୦୨୨ ମସିହା ଅଗଷ୍ଟ ୧୪ ତାରିଖରେ ଏପରି ଘଟିବ ବୋଲି ଶ୍ରୀ ପଟ୍ଟନାୟକ ସୂଚନା ଦେଇଛନ୍ତି।

Powered by Froala Editor