ସୋସିଆଲ ମିଡିଆରେ ଏବେ ଏକ ପୋଷ୍ଟ ବେଶ୍ ଭାଇରାଲ ହେବାରେ ଲାଗିଛି, ଯାହାକୁ ନେଇ ସାଧାରଣ ଜନତାଙ୍କ ମଧ୍ୟରେ ଚିନ୍ତା ବଢ଼ିଯାଇଛି । ଭାଇରାଲ ପୋଷ୍ଟରେ ଦାବି କରାଯାଉଛି ଯେ, ଆସନ୍ତା ୧ ଜୁଲାଇରୁ ୧୦, ୨୦, ୫୦ ଏବଂ ୧୦୦ ଟଙ୍କାର ପୁରୁଣା ନୋଟ୍ ଗୁଡ଼ିକ ସମ୍ପୂର୍ଣ୍ଣ ଭାବେ ବନ୍ଦ ହେବାକୁ ଯାଉଛି । 

ମିଡିଆ ରିପୋର୍ଟ ଅନୁଯାୟୀ, ଦେଶରେ ଲୋକଙ୍କ ପାଖରେ ଥିବା ନଗଦ ଅର୍ଥ (କ୍ୟାଶ) ବୃଦ୍ଧିର ଗତି କୋଭିଡ-୧୯ ମହାମାରୀ ପରେ ସବୁଠାରୁ ଦ୍ରୁତ ରହିଛି। ଏଥିରୁ ଜଣାପଡ଼ୁଛି ଯେ ସତର୍କତାମୂଳକ ପଦକ୍ଷେପ ଭାବେ ନଗଦ ଟଙ୍କା ପାଖରେ ରଖିବାର ପ୍ରବୃତ୍ତି ପୁଣି ଥରେ ବଢିବାରେ ଲାଗିଛି। ତେବେ ଏହାର ଅର୍ଥ ଏହା ଆଦୌ ନୁହେଁ ଯେ ବ୍ୟାଙ୍କିଙ୍ଗ ବ୍ୟବସ୍ଥା କିମ୍ବା ଡିଜିଟାଲ ପେମେଣ୍ଟ ଉପରୁ ଲୋକଙ୍କ ଭରସା କମିଯାଇଛି। ୟୁପିଆଇ (UPI) ଏବଂ ଡିଜିଟାଲ କାରବାର କ୍ରମାଗତ ଭାବେ ବୃଦ୍ଧି ପାଉଛି, କିନ୍ତୁ ଏହା ସହିତ ଲୋକେ କିଛି ନଗଦ ଟଙ୍କା ମଧ୍ୟ ନିଜ ପାଖରେ ରଖିବାକୁ ପସନ୍ଦ କରୁଛନ୍ତି। ଦେଖିବାକୁ ମିଳୁଛି ଯେ ୧୦୦-୨୦୦ ଭଳି ଛୋଟ ନୋଟର ଚାହିଦା ବଢିଯାଇଛି। 

ସୋସିଆଲ ମିଡିଆରେ ଯେଉଁ ପୋଷ୍ଟଟି ଭାଇରାଲ ହେଉଛି, ସେଥିରେ 'ବ୍ୟାଙ୍କ ଅଫ୍ ମହାରାଷ୍ଟ୍ର'ର ଲୋଗୋ ଲାଗିଥିବା ଏକ ପୋଷ୍ଟର ଦେଖିବାକୁ ମିଳୁଛି । ସେହି ପୋଷ୍ଟରରେ ଲେଖାଯାଇଛି ଯେ, ୧ ଜୁଲାଇ ୨୦୨୬ରୁ ୧୦, ୨୦, ୫୦ ଏବଂ ୧୦୦ ଟଙ୍କାର ପୁରୁଣା ନୋଟ୍ ବନ୍ଦ ହୋଇଯିବ । ତେବେ ଏଥିରେ ସମସ୍ତ ନୋଟ୍ ନୁହେଁ, ବରଂ ୨୦୦୫ ମସିହା ପୂର୍ବରୁ ପ୍ରିଣ୍ଟ ବା ଛପା ହୋଇଥିବା ନୋଟ୍ ଗୁଡ଼ିକ ଉପରେ ପ୍ରତିବନ୍ଧକ ଲଗାଯିବ ବୋଲି ଦାବି କରାଯାଇଛି । ଏହା ସହିତ ଏହି ନିଷ୍ପତ୍ତି ଆରବିଆଇର ବୋଲି ମଧ୍ୟ କୁହାଯାଇଛି ।

ଭାଇରାଲ ହେଉଥିବା ଏହି ଖବର ସମ୍ପୂର୍ଣ୍ଣ ନକଲି । ସରକାରଙ୍କ ସରକାରୀ ସଂସ୍ଥା ପ୍ରେସ୍ ଇନଫରମେସନ ବ୍ୟୁରୋ (PIB) ଏହି ଭାଇରାଲ ପୋଷ୍ଟର ଫ୍ୟାକ୍ଟ ଚେକ୍ କରି ସତ ସାମ୍ନାକୁ ଆଣିଛି । PIB ପକ୍ଷରୁ ଏକ୍ସ ଆକାଉଣ୍ଟରେ କୁହାଯାଇଛି ଯେ, ବ୍ୟାଙ୍କ ଅଫ୍ ମହାରାଷ୍ଟ୍ର ନାଁରେ ସେୟାର କରାଯାଉଥିବା ନୋଟିସ୍ ସମ୍ପୂର୍ଣ୍ଣ ଭୁଲ୍ । ବ୍ୟାଙ୍କ ଅଫ୍ ମହାରାଷ୍ଟ୍ର ଏଭଳି କୌଣସି ନୋଟିସ୍ ଜାରି କରିନାହିଁ । 

Powered by Froala Editor