କଲ୍ୟାଣସିଂହପୁର: ରାୟଗଡ଼ା ଜିଲା କଲ୍ୟାଣସିଂହପୁର ରେଞ୍ଜ ଅଧୀନ ରିଭଲକଣାରେ ବାଘଛାଲ କିଣାବିକା ନେଇ ଡିଲ୍‌ ଚାଲିଥିବାବେଳେ ବନ ବିଭାଗ ସେଠାରେ ପହଞ୍ଚି ତାହାକୁ ଭଣ୍ଡୁର କରିଛି। ଘଟଣାସ୍ଥଳରୁ ରାୟଗଡ଼ା ଜିଲାର ୫ ଏବଂ କଳାହାଣ୍ଡି ଜିଲାର ୩ଜଣଙ୍କୁ ଗିରଫ କରାଯାଇଛି। ସେଠାରୁ କଲରାପତରିଆ ବାଘ ଛାଲ, ଗୋଟିଏ ବାଇକ୍‌ ଓ ମୋବାଇଲ ଫୋନ୍‌ ଜବତ ହୋଇଛି। ଅଭିଯୁକ୍ତମାନେ ହେଲେ ରାୟଗଡ଼ା ଜିଲା କଲ୍ୟାଣସିଂହପୁରର ଭରତ ନାଚିକା, ରାୟଗଡ଼ା ବ୍ଲକର ସୀମାଦ୍ରି ତାଡ଼ିଙ୍ଗି, ରିଭଲକଣାର କୈଳାସ ଜାନି, ପ୍ରଶାନ୍ତ କାଡ୍ରାକା, ଧର୍ମ ପାତିକା ଓ କଳାହାଣ୍ଡି ଜିଳାର ଜିତେନ୍ଦ୍ର ବେନିଆ, ଇ.ଜେ. ରାଓ ସାହୁ, ମୁନୁଗା ମାଝି।
ରେଞ୍ଜର ସଚ୍ଚିଦାନନ୍ଦ ପରିଡ଼ାଙ୍କ ସୂଚନା ପ୍ରକାରେ ଏହି ଡିଲ୍‌ ନେଇ ବନ ବିଭାଗକୁ ୨ ଦିନ ତଳୁ ସୂଚନା ମିଳିଥିଲା। ତେଣୁ ରାୟଗଡ଼ା ଡିଏଫ୍‌ଓ ସଚିନ ଆନ୍ନାସାହେବ ଓହୋଲଙ୍କ ନେତୃତ୍ୱରେ କଲ୍ୟାଣସିଂହପୁର ଓ ରାୟଗଡ଼ା ରେଞ୍ଜ ଟିମ୍‌ ମିଳିତ ଭାବେ ଚଢ଼ାଉ କରିଥିଲେ। ଡିଲ୍‌ କରୁଥିବା ବ୍ୟକ୍ତିଙ୍କୁ ଚିହ୍ନଟ ପାଇଁ କଳାହାଣ୍ଡି ଜିଲା ବନ ବିଭାଗ ଟିମ୍‌ ସହାୟତା କରିଥିଲେ। କଳହାଣ୍ଡି ଜିଲା ଭବାନୀପାଟଣାଠାରୁ ମାତ୍ର ୮ରୁ ୧୦ କି.ମି. ଦୂରରେ ଥିବା ଜଙ୍ଗଲରେ ପ୍ରାୟ ୨ରୁ ୪ମାସ ତଳେ ଏକ କଲରାପତରିଆ ବାଘର ଶିକାର କରାଯାଇଛି। ଶିକାରୀ କଳାହାଣ୍ଡି ଜିଲାର ବୋଲି ଜଣାପଡ଼ିବା ପରେ କଳାହାଣ୍ଡି ବନବିଭାଗ ତାଙ୍କୁ ଗିରଫ କରିଥିଲା।

Powered by Froala Editor