ସୁନ୍ଦରଗଡ଼: ‌ପେଟର ଜ୍ବାଳା ଓ ପରିବାରର ବୋଝ ଆଗରେ ବଳି ପଡ଼ିଲା ପାଠପଢ଼ା। ଗୁଜୁରାଣ ମେଣ୍ଟାଇବା ପାଇଁ ମାଟ୍ରିକ ପରୀକ୍ଷା ଛାଡ଼ି ଗୋଆ ଦାଦନ ଖଟିବାକୁ ବାହାରିଥିବା ଧର୍ମଶାଳା ଉଚ୍ଚ ବିଦ୍ୟାଳୟ ଦଶମ ଶ୍ରେଣୀର ଛାତ୍ର ଉତ୍ତମ ରୋହିଦାସଙ୍କୁ ଶିକ୍ଷା ବିଭାଗର କର୍ମଚାରୀ ଠାବ କରିଛନ୍ତି। ଉତ୍ତମ ପରୀକ୍ଷା ଦେବାକୁ ଫର୍ମ ପୂରଣ କରିଥିଲା। କିନ୍ତୁ ପ୍ରବେଶ ପତ୍ର ନେଇନଥିଲା। ହଜାର ହଜାର ପିଲା ମାଟ୍ରିକ ପରୀକ୍ଷା ଦେଉଥିବା ବେଳେ ସେ ପରୀକ୍ଷା କେନ୍ଦ୍ରକୁ ଆସିନଥିଲା। ତେଣୁ ପ୍ରଧାନଶିକ୍ଷକ ଅଶୋକ କୁମାର ନାଏକ ତା ଘରକୁ ପିଅନ ପଠାଇ ଡକାଇ ପଠାଇଥିଲେ। ତେବେ ଭଲ ଭାବେ ପ୍ରସ୍ତୁତ ନଥିବାରୁ ଆସନ୍ତା ବର୍ଷ ଭଲ ଭାବରେ ପଢ଼ି ପରୀକ୍ଷା ଦେବି ବୋଲି କହିଥିଲା। କିନ୍ତୁ ପ୍ରକୃତରେ ସେ ଗୋଆ ଦାଦନ ଖଟିଯିବାକୁ ଯୋଜନା କରିଥିଲା। ସେଠାରେ ମାଛ ଧରି ମାସକୁ ୧୫ ହଜାର ଟଙ୍କା ରୋଜଗାର କରିବ ବୋଲି ଗଣମାଧ୍ୟମକୁ କହିଛି। ଶ୍ରମିକମାନଙ୍କୁ ଗୋଆ ନେବା ପାଇଁ ବସଷ୍ଟାଣ୍ଡରେ ଅପେକ୍ଷା କରିଥିବା ବସରୁ ଉତ୍ତମକୁ ଠାବ କରାଯାଇ ଘରକୁ ଫେରାଇ ଅଣାଯାଇଛି। 

ଉତ୍ତମଙ୍କ ବାପା ତିନି ବର୍ଷ ପୂର୍ବେ ଆରପାରିକୁ ଚାଲି ଯାଇଛନ୍ତି। ତାଙ୍କ ବଡ଼ଭାଇ ସୁମନ ବାହା ହୋଇ ଅଲଗା ସଂସାର କଲାଣି। ମଝିଆ ଭାଇ ଗୌତମ ଓ ସାନ ଉତ୍ତମ ମାଆଙ୍କ ସହ ରହୁଛନ୍ତି। ମାଆ ମଜୁରି କରି ଯାହା ରୋଜଗାର କରନ୍ତି ସେଥିରେ ପରିବାର ଚଳାଇବା କଷ୍ଟକର ହୋଇପଡ଼ୁଛି। ତେଣୁ ପରିବାର ବୋଝ ଲାଘବ କରିବା ପାଇଁ ଉତ୍ତମ ପାଠରେ ଡୋରି ପକାଇ ଦାଦନ ଖଟିବାକୁ ପରୀକ୍ଷା ଦେଇନାହିଁ। ପ୍ରଧାନଶିକ୍ଷକ ଶ୍ରୀ ନାଏକଙ୍କୁ ପଚାରିବାରୁ ସେ ଦାଦନ ଯିବା କଥା ଜାଣିନାହିଁ ବୋଲି କହିଛନ୍ତି। ଭଲ ଭାବରେ ପଢ଼ି ନଥିବାରୁ ପରୀକ୍ଷା ଦେଲି ନାହିଁ ବୋଲି ଲିଖିତ ଜଣାଇଛି ବୋଲି ପ୍ରଧାନ ଶିକ୍ଷକ କହିଛନ୍ତି। ବସରେ ଉତ୍ତମ ବସିଥିବା ଅବସ୍ଥାରେ ପାଇ ଶିକ୍ଷା ବିଭାଗର କର୍ମଚାରୀମାନେ ତାକୁ ସେଠାରୁ ଘରକୁ ଫେରାଇ ଆଣିଛନ୍ତି। ଜିଲା ଶିକ୍ଷକ-ଛାତ୍ର ସହଯୋଗ ପାଣ୍ଠିରୁ ତାକୁ ୧୦ ହଜାର ଟଙ୍କା ଦିଆଯାଇଛି। ତା’ ପଢ଼ାଖର୍ଚ୍ଚ ଜିଲା ପ୍ରଶାସନ ବହନ କରିବ ଓ ତାକୁ ଧନ୍ଦାମୂଳକ ଶିକ୍ଷା ଦିଆଯିବ ବୋଲି ପ୍ରତିଶ୍ରୁତି ଦିଆଯାଇଛି। ଉତ୍ତମ ଆସନ୍ତାକାଲିଠାରୁ ଅନ୍ୟ ବିଷୟଗୁଡ଼ିକରେ ପରୀକ୍ଷା ଦେବାକୁ ରାଜି ହୋଇଛି। ଆସନ୍ତା ସପ୍ଲିମେଣ୍ଟାରୀ ପରୀକ୍ଷାରେ ସେ ଓଡ଼ିଆ ବିଷୟ ପରୀକ୍ଷା ଦେବ ବୋଲି ଜିଲା ଶିକ୍ଷା ଅଧିକାରୀ ଡ. ମୁରଲୀଧର ବେହେରା କହିଛନ୍ତି।

Powered by Froala Editor