ଭୁବନେଶ୍ବର: ଏଣିକି ଆଉ ବର୍ଷେ ନୁହେଁ, ତିନି ବର୍ଷିଆ ବଜେଟ ପ୍ରସ୍ତୁତ କରାଯିବ। ବଜେଟ ପ୍ରସ୍ତାବ ଦାଖଲ ସମୟରେ ଆଗାମୀ ୨୪ ମାସର ଯୋଜନାକୁ ଦୃଷ୍ଟି ଦେବା ଜରୁରୀ। ବଜେଟ ଅର୍ଥର ସୁବିନିଯୋଗ ଓ ଦୀର୍ଘ ମିଆଦି ଫଳାଫଳ ହାସଲ ପାଇଁ ଅର୍ଥ ବିଭାଗ ପକ୍ଷରୁ ସବୁ ବିଭାଗକୁ ଏପରି ପରାମର୍ଶ ଦିଆଯାଇଛି। କିନ୍ତୁ ବଜେଟ ଅର୍ଥ ଖର୍ଚ୍ଚରେ ବାଧକ ଦୂର ହୋଇପାରୁନାହିଁ। ଚଳିତ ଆର୍ଥିକ ବର୍ଷର ୩ୟ ତ୍ରୖମାସିକରେ ଖର୍ଚ୍ଚ ହୋଇପାରି ନଥିବା ୨୩ ହଜାର କୋଟିରୁ ଅଧିକ ଟଙ୍କା ଫେରିଯିବ। କାର୍ଯ୍ୟକ୍ରମ ବ୍ୟୟ ବାବଦରେ ଉପରୋକ୍ତ ପାଣ୍ଠିକୁ ଫେରାଇବା ପାଇଁ ଚଳିତ ମାସ ୨୭ ପର୍ଯ୍ୟନ୍ତ ସମସ୍ତ ବିଭାଗକୁ ସମୟ ଦିଆଯାଇଛି।

୨୦୨୪-୨୫ ଆର୍ଥିକ ବର୍ଷରେ ଅହେତୁକ ବିଳମ୍ବ ସତ୍ତ୍ବେ ତରବରିଆ ଭାବେ ବଜେଟ ପାଣ୍ଠି ଖର୍ଚ୍ଚ କରି ଧାର୍ଯ୍ୟ ଲକ୍ଷ୍ୟର ନିକଟବର୍ତ୍ତୀ ହୋଇଥିଲେ ଅଧିକାଂଶ ବିଭାଗ। ତେବେ ଚଳିତ ଆର୍ଥିକ ବର୍ଷରେ ଜାନୁଆରୀ ସୁଦ୍ଧା ବହୁ ବିଭାଗ ସର୍ବନିମ୍ନ ୬୦ ପ୍ରତିଶତ ଛୁଇଁ ନାହାନ୍ତି। ତେ‌େ‌ବ ତା ଠାରୁ ଗୁରୁତ୍ବପୂର୍ଣ୍ଣ ହେଉଛି ଚଳିତ ଆର୍ଥିକ ବର୍ଷର ୩ୟ ତ୍ରୖମାସିକରେ ବିଭିନ୍ନ ବିଭାଗ ୨୩,୫୫୦ କୋଟି ଟଙ୍କା ଖର୍ଚ୍ଚ କରିପାରି ନାହାନ୍ତି। ଏହା କେବଳ କାର୍ଯ୍ୟକ୍ରମ ବ୍ୟୟ। ମୋଟାମୋଟି ପାଣ୍ଠିକୁ ମିଶାଇଲେ ଫେରସ୍ତ ହେବାକୁ ଥିବା ପାଣ୍ଠି ଢ଼େର ଅଧିକ ହେବ। ଅର୍ଥ ବିଭାଗ ସୂତ୍ରରୁ ମିଳିଥିବା ସୂଚନା ଅନୁସାରେ, ସ୍ବାସ୍ଥ୍ୟ ବିଭାଗ ୧୧୫୩ କୋଟି ଓ ପଞ୍ଚାୟତିରାଜ ବିଭାଗ ୭୨୯୬ କୋଟି ଟଙ୍କା ଫେରାଇବ।

ସେହିପରି ଜଳ ସମ୍ପଦ ବିଭାଗ ୨୭୨୨ କୋଟି, ବିଦ୍ୟାଳୟ ଓ ଗଣଶିକ୍ଷା ୨୨୫୭ କୋଟି, ଅର୍ଥ ବିଭାଗ ୧୯୪୨ କୋଟି,ନଗର ଉନ୍ନୟନ ବିଭାଗ ୮୩୩ କୋଟି, ଅନୁସୂଚିତ ଜାତି ଓ ଅନୁସୂଚିତ ଜନଜାତି ବିଭାଗ ୮୨୩ କୋଟି, ଗୃହ ବିଭାଗ ୭୨୯ କୋଟି, କ୍ରୀଡ଼ା ବିଭାଗ ୬୦୮ କୋଟି, ମହିଳା ଓ ଶିଶୁ ବିକାଶ ୫୨୮ କୋଟି, ମିଶନ୍ ଶକ୍ତି ୪୨୬ କୋଟି, ପୂର୍ତ୍ତ ବିଭାଗ ୪୧୨ କୋଟି, ଏମଏସ୍‌ଏମଇ ୨୫୨ କୋଟି ଟଙ୍କା ସରକାରଙ୍କୁ ଫେରାଇବେ।

ଗତ ଡିସେମ୍ବର ୩୧ ସୁଦ୍ଧା ହୋଇଥିବା ଖର୍ଚ୍ଚରୁ ଉପରୋକ୍ତ ପାଣ୍ଠି ବଳକା ରହିଛି। କାର୍ଯ୍ୟକ୍ରମ ବ୍ୟୟ ବାବଦରେ ଗୃହ ବିଭାଗ ୨୯%, ସ୍ବାସ୍ଥ୍ୟ ବିଭାଗ ୫୩%, ଏସଟିଏସସି ବିଭାଗ ୪୪%, କ୍ରୀଡ଼ା ବିଭାଗ ମାତ୍ର ୫%, ପଞ୍ଚାୟତିରାଜ ବିଭାଗ ୨୮%, ଜଳସମ୍ପଦ ବିଭାଗ ୩୯%, ପରିବହନ ବିଭାଗ ୬୫%, ବନ ବିଭାଗ ୩୮%, ଇସ୍ପାତ ଓ ଖଣି ବିଭାଗ ୭%, ବିଜ୍ଞାନ ଓ କାରିଗରୀ ବିଭାଗ ୨୩%, ପର୍ଯ୍ୟଟନ ବିଭାଗ ୪୨%, ସରକାରୀ ଉଦ୍ୟୋଗ ବିଭାଗ ୩%, ମହିଳା ଓ ଶିଶୁ ବିକାଶ ୫୬%, ଗ୍ରାମ୍ୟ ଉନ୍ନୟନ ୪୮%, ବିଦ୍ୟାଳୟ ଓ ଗଣଶିକ୍ଷା ୪୫% ଅର୍ଥ ବ୍ୟୟ କରିପାରିଛନ୍ତି। 

Powered by Froala Editor