ମୁମ୍ବାଇର ପଶ୍ଚିମ ଉପନଗର ଜୁହୁରେ ଥିବା ଚଳଚ୍ଚିତ୍ର ନିର୍ମାତା ରୋହିତ ଶେଟ୍ଟୀଙ୍କ ବାସଭବନ ବାହାରେ ଅଜ୍ଞାତ ବ୍ୟକ୍ତିମାନେ ଗୁଳି ଚଳାଇବା ପରେ ସୁରକ୍ଷା ବ୍ୟବସ୍ଥା ବଢ଼ାଇ ଦିଆଯାଇଛି। ଶନିବାର ବିଳମ୍ବିତ ରାତିରେ ତାଙ୍କ ଘର ବାହାରେ ପ୍ରାୟ ୩ରୁ ୪ ରାଉଣ୍ଡ ଫାୟାରିଂ କରାଯାଇଛି। ଘଟଣା ପରଠାରୁ ରୋହିତଙ୍କ ପରିବାର ସମେତ ପ୍ରଶଂସକମାନେ ଚିନ୍ତାରେ ରହିଛନ୍ତି। ତେବେ କିଏ ଏବଂ କେଉଁ କାରଣରୁ ଏଭଳି କାଣ୍ଡ ଭିଆଇଛନ୍ତି ତାହା ସ୍ପଷ୍ଟ ହୋଇନାହିଁ।

ମାମଲାର ସମ୍ବେଦନଶୀଳତାକୁ ଦୃଷ୍ଟିରେ ରଖି, ମୁମ୍ବାଇ ପୁଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ତଦନ୍ତ ଦାୟିତ୍ୱ ମୁମ୍ବାଇ କ୍ରାଇମ୍ ବ୍ରାଞ୍ଚକୁ ହସ୍ତାନ୍ତର କରିଛି। ସୌଭାଗ୍ୟବଶତଃ, ଏହି ଆକ୍ରମଣରେ କୌଣସି କ୍ଷୟକ୍ଷତିର ରିପୋର୍ଟ ହୋଇନାହିଁ।

ରୋହିତ ଶେଟ୍ଟୀ ଓ ତାଙ୍କ ପରିବାର ସମ୍ପୂର୍ଣ୍ଣ ସୁରକ୍ଷିତ ଅଛନ୍ତି। ପ୍ରାଥମିକ ସୂଚନା ଅନୁଯାୟୀ, ରୋହିତ ଶେଟ୍ଟୀଙ୍କ ବାସଭବନ ବାହାରେ ପ୍ରାୟ ୪ ରାଉଣ୍ଡ ଗୁଳି ଚାଳନା କରାଯାଇଥିଲା। ପୁଲିସ କୋଠାର ବାହାର କାନ୍ଥରେ ଗୁଳି ଚିହ୍ନ ପାଇଛି। ଯାହା ଆକ୍ରମଣର ଗମ୍ଭୀରତାକୁ ସୂଚାଉଛି। 

ଏହି ଚାଞ୍ଚଲ୍ୟକର ମାମଲାର ମୂଳ ପର୍ଯ୍ୟନ୍ତ ପହଞ୍ଚିବା ପାଇଁ, ମୁମ୍ବାଇ କ୍ରାଇମ୍ ବ୍ରାଞ୍ଚ ରୋହିତ ଶେଟ୍ଟୀଙ୍କ ବୟାନ ରେକର୍ଡ କରିଛି। କିଛି ଦିନ ମଧ୍ୟରେ ସେ କୌଣସି ଧମକପୂର୍ଣ୍ଣ କଲ୍ କିମ୍ବା ମେସେଜ୍ ପାଇଥିଲେ କି ନାହିଁ ତାହା ପୁଲିସ ଜାଣିବାକୁ ଚେଷ୍ଟା କରୁଛି। ତଦନ୍ତକୁ ତ୍ୱରାନ୍ୱିତ କରିବା ପାଇଁ, ପୁଲିସ ୧୨ ରୁ ଅଧିକ ସ୍ୱତନ୍ତ୍ର ଦଳ ଗଠନ କରିଛି। 

Powered by Froala Editor