ନିକଟରେ ହଲିଉଡ୍ ଅଭିନେତ୍ରୀ ମାର୍ଗୋଟ ରୋବି ଏକ ୪୦୦ ବର୍ଷ ତଳର ହାର ପିନ୍ଧିଥିଲେ, ଯାହାକୁ ନେଇ ଚର୍ଚ୍ଚା ହେଉଛି । ସେ ପିନ୍ଧିଥିବା ତାଜମହଲ ହୀରା ହାର ୬୯.୪୨ କ୍ୟାରେଟ୍‌ରେ ହୃଦୟ ଆକୃତିର ଟେବଲ୍-ଟପ୍ ଡାଇମଣ୍ଡ୍ । ସୁନା ଓ ମାଣିକରେ ପ୍ରସ୍ତୁତ କାର୍ଟିୟର ଚେନ୍ ସହିତ ଏହାକୁ ସଂଲଗ୍ନ କରାଯାଇଛି । ହାରର ମୂଲ୍ୟ ପ୍ରାୟ ୭୪ କୋଟି ଟଙ୍କା ବୋଲି କୁହାଯାଉଛି । ପାର୍ସୀ ଭାଷାରେ ହୀରାରେ ଲେଖାଯାଇଛି ‘ପ୍ରେମ ଚିରନ୍ତନ’ ।

ଲସ୍ ଏଞ୍ଜେଲସରେ ଆୟୋଜିତ ନିଜର ଅପ୍‌କମିଙ୍ଗ ଫିଲ୍ମ ‘ଉଥ୍‌ରିଙ୍ଗ ହାଇଟ୍ସ’ର ୱର୍ଲଡ୍ ପ୍ରିମିୟର ଅବସରରେ ମାର୍ଗୋଟ ଗ୍ଲାମରସ୍ ଲୁକ୍‌ରେ ରେଡ୍ କାର୍ପେଟ୍‌ରେ ଚାଲିଥିଲେ । ସେ ଏକ ଚମତ୍କାର ଗାଉନ୍ ପିନ୍ଧିଥିଲେ । କିନ୍ତୁ ଆକର୍ଷଣର କେନ୍ଦ୍ରବିନ୍ଦୁ ଥିଲା ତାଜମହଲ ହୀରା ହାର।

୫୪ ବର୍ଷ ପୂର୍ବେ, ୧୯୭୨ରେ ଆମେରିକୀୟ ଅଭିନେତ୍ରୀ ଏଲିଜାବେଥ୍ ଟେଲରଙ୍କ ୪୦ତମ ଜନ୍ମଦିନରେ ତାଙ୍କର ୫ମ ସ୍ୱାମୀ ରିଚାର୍ଡ ବର୍ଟନ ତାଙ୍କୁ ଏହି ହାର ଉପହାର ଦେଇଥିଲେ । ଭାରତ ସହ ହାରଟି ନିବିଡ଼ ଭାବେ ଜଡ଼ିତ । ମୋଗଲ ସମ୍ରାଟ ଜାହାଙ୍ଗୀର ନିଜ ପତ୍ନୀ ନୂର୍‌ଜହାଁଙ୍କୁ ଏହି ହାର ଉପହାର ଦେଇଥିଲେ । ପରେ ତାଙ୍କ ପୁଅ ଶାହଜହାଁ ପତ୍ନୀ ମୁମ୍‌ତାଜ ମହଲଙ୍କୁ ଏହା ଉପହାର ଦେଇଥିଲେ । ହାରରେ ଥିବା ଲେଖାରେ ନୂର୍‌ଜହାଁଙ୍କ ନାଁ, ତାଙ୍କ ଟାଇଟଲ୍ ‘ଲେଡି ଅଫ୍ ଦ ବାଦ୍‌ଶାହ’ ଏବଂ ଶାସନକାଳର ୨୩ ବର୍ଷ ଉଲ୍ଲେଖ ହୋଇଛି ।

ଏହି ଐତିହାସିକ ତାଜମହଲ ହୀରା ହାର ପିନ୍ଧିବା ବିଷୟରେ ମାର୍ଗୋଟ୍ କହିଥିଲେ, ଏହା ଆମେରିକୀୟ ଅଭିନେତ୍ରୀ ଏଲିଜାବେଥ୍ ଟେଲର୍‌ଙ୍କର ଥିଲା । ପ୍ରିମିୟର ପାଇଁ କାର୍ଟିୟର ଦ୍ୱାରା ତାଙ୍କୁ ଏହି ହାର ପିନ୍ଧିବାକୁ ଦିଆଯାଇଥିଲା ।

Powered by Froala Editor