ଦେଶର ସବୁଠାରୁ ସ୍ବଚ୍ଛ ସହରର ଭାବେ ଜଣାଶୁଣା ଥିବା ଇନ୍ଦୋରରେ ବିଷାକ୍ତ ଜଳ ପାଇଁ ଜୀବନ ଯିବା ଘଟଣା ସବୁଠି ଚର୍ଚ୍ଚାର ବିଷୟ ପାଲଟିଥିଲା । ଇନ୍ଦୋରର ଭାଗୀରଥପୁରାରେ ଦୂଷିତ ପାଣି ପିଇବା ଯୋଗୁଁ ଏପର୍ଯ୍ୟନ୍ତ ୧୬ ଜଣଙ୍କର ମୃତ୍ୟୁ ହୋଇସାରିଥିବା ବେଳେ ୧,୪୦୦ରୁ ଅଧିକ ବାସିନ୍ଦା ଅସୁସ୍ଥ ହୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି।

ଏହି ଦୁର୍ଘଟଣାରେ ଏକ ଅତ୍ୟନ୍ତ ଚିନ୍ତାଜନକ ବିଷୟ ସାମ୍ନାକୁ ଆସିଛି। ଭାଗୀରଥପୁରାର ୬୭ ବର୍ଷୀୟା ପାର୍ବତୀ ବାଇ କୋଣ୍ଡଲାଙ୍କ ଠାରେ ଏକ ବିରଳ ଓ ସମ୍ଭାବ୍ୟ ମାରାତ୍ମକ ସ୍ନାୟୁଗତ ରୋଗ ଗୁଇଲିଆନ୍-ବାରେ ସିଣ୍ଡ୍ରୋମ୍ (GBS)ର ଲକ୍ଷଣ ଦେଖାଯାଇଛି। ଏହି ରୋଗରେ ଶରୀରର ପ୍ରତିରକ୍ଷା ପ୍ରଣାଳୀ ନିଜର ସ୍ନାୟୁକୁ ଆକ୍ରମଣ କରିଥାଏ, ଯାହାକି ଦୀର୍ଘକାଳୀନ ଅପୂରଣୀୟ ସ୍ନାୟୁଗତ କ୍ଷତିର ଆଶଙ୍କା ସୃଷ୍ଟି କରିଛି।

ଭାଗୀରଥପୁରାରେ ଘଟିଥିବା ଏହି ଘଟଣାକୁ ନେଇ ହାଇକୋର୍ଟ ମଧ୍ୟ ଭତ୍ସନା କରିଛନ୍ତି । କୋର୍ଟଙ୍କ ଭତ୍ସନା ପରେ ପ୍ରଶାସନ ପକ୍ଷରୁ ସ୍ଥାନୀୟ ଅଞ୍ଚଳରେ ପାନୀୟ ଜଳର ବ୍ୟବସ୍ଥା କରାଯାଇଥିଲା । ଟ୍ୟାଙ୍କର ଯୋଗେ ପାନୀୟ ଜଳ ଯୋଗାଣ ହୋଇଛି । ମାତ୍ର ଏହିସବୁ ଟ୍ୟାଙ୍କର ଗୁଡ଼ିକର ଅବସ୍ଥା ଏଭଳି ହୋଇଛି ସେଥିରୁ ପାଣି ପିଇଲେ ଅଘଟଣ ଘଟିବ ସେଭଳି ମନେ ହେଉଛି ।

ଟ୍ୟାଙ୍କର ଗୁଡ଼ିକରେ ଶିଉଳି ଏବଂ କଳଙ୍କି ଭର୍ତ୍ତି ହୋଇଛି । ଶୁଦ୍ଧ ପାନୀୟ ବଦଳରେ ଲୋକଙ୍କ ପାଖରେ ପୁଣି ଦୂଷିତ ଜଳ ପହଞ୍ଚୁଥିବା ଭଳି ଅଭିଯୋଗ ଆସିଛି । ଏନେଇ କଂଗ୍ରେସ ପକ୍ଷରୁ ସରକାରଙ୍କୁ ସମାଲୋଚନା କରି ସୋସିଆଲ ମିଡିଆରେ ପୋଷ୍ଟ ମଧ୍ୟ କରାଯାଇଛି । 

ସେପଟେ ସ୍ଥାନୀୟ ଲୋକେ ଅଭିଯୋଗ କରିଛନ୍ତି କି, ପାରି ବିଲ୍ ୩୦୦ ଟଙ୍କା ଦେଉଛୁ । ପାଣି ମାତ୍ର ୧୫ ମିନିଟ୍ ପାଇଁ ଆସୁଛି, ତାହା ପୁଣି ଶୁଦ୍ଧ ନୁହେଁ । ଏଭଳିଭାବେ ଲୋକେ ନିଜର ଅସନ୍ତୋଷ ବ୍ୟକ୍ତ କରିଛନ୍ତି । 

Powered by Froala Editor