ଭୁବନେଶ୍ବର : ଓଡ଼ିଶାର କେତେକ ସହରର ବାୟୁ ପ୍ରଦୂଷଣ ଏବେ ଚିନ୍ତାଜନକ ସ୍ଥିତିରେ ପହଞ୍ଚିଛି। ବିଷ ବଳୟକୁ ଚାଲି ଯାଇଛି ପ୍ରଦୂଷଣ ମାତ୍ରା। ବାୟୁ ପ୍ରଦୂଷଣ କ୍ଷେତ୍ରରେ ସର୍ବଦା ଚର୍ଚ୍ଚାରେ ରହୁଥିବା ଦେଶର ରାଜଧାନୀ ଦିଲ୍ଲୀକୁ ମଧ୍ୟ ପଛରେ ପକାଇ ଦେଇଛନ୍ତି ରାଜ୍ୟର ତିନି ସହର ବାଲେଶ୍ବର, ତାଳଚେର ଏବଂ ବାରିପଦା। ଏକ୍ୟୁଆଇ ରିପୋର୍ଟ ଅନୁଯାୟୀ, ଦେଶର ୫ଟି ସବୁଠାରୁ ପ୍ରଦୂଷିତ ସହର ମଧ୍ୟରେ ଏହି ତିନି ସହର ସ୍ଥାନ ପାଇଛନ୍ତି। ବଡ଼ କଥା ହେଲା ବାଲେଶ୍ବର ବାୟୁ ପ୍ରଦୂଷଣରେ ଦେଶରେ ସବୁଠୁ ଆଗରେ ରହିଛି। ଗୁରୁବାର ପୂର୍ବାହ୍ଣ ୧୧ଟାରେ ବାଲେଶ୍ବରରେ ବାୟୁ ଗୁଣବତ୍ତା ସୂଚକାଙ୍କ (ଏକ୍ୟୁଆଇ) ୩୩୬ ଥିବାବେଳେ ଅପରାହ୍ଣ ୪ଟା ବେଳକୁ ତାହା ବୃଦ୍ଧି ପାଇ ୩୩୮ରେ ପହଞ୍ଚିଥିଲା। ଏହାସହ ଏହି ସହର ଦେଶର ସବୁଠାରୁ ଅଧିକ ପ୍ରଦୂଷିତ ସହର ଭାବେ ପରିଗଣିତ ହୋଇଛି। ଏହି ସମୟରେ ଦିଲ୍ଲୀରେ ଏକ୍ୟୁଆଇ ୨୩୪ ଥିଲା। ବାୟୁ ପ୍ରଦୂଷଣ ତାଲିକାରେ ଦ୍ୱିତୀୟ ସ୍ଥାନରେ ରହିଛି ଶିଳ୍ପ ସହର ତାଳଚେର। ପୂର୍ବାହ୍ଣ ୧୧ଟାରେ ତାଳଚେରରେ ଏକ୍ୟୁଆଇ ୩୨୬ ରହିଥିଲା। ତେବେ ଅପରାହ୍ଣ ୪ଟା ସୁଦ୍ଧା ଏହା ୩୨୦କୁ ଖସି ଆସିଥିଲା। ଏହାସହ ଦିନ ୧୧ଟାରେ ବାରିପଦାରେ ଏକ୍ୟୁଆଇ ୩୦୪ ଥିବାବେଳେ ଅପରାହ୍ଣ ୪ଟା ସୁଦ୍ଧା ଏହା ୩୦୧କୁ ହ୍ରାସ ପାଇଥିଲା। ଆଜି ବାରିପଦା ସହର ଦେଶର ପଞ୍ଚମ ପ୍ରଦୂଷିତ ସହର ଭାବେ ଚିହ୍ନଟ ହୋଇଛି। ଏହାସହ ଅନୁଗୋଳରେ ଏକ୍ୟୁଆଇ ୨୭୬ ଥିବାବେଳେ ଭୁବନେଶ୍ବରରେ ଏକ୍ୟୁଆଇ ୨୩୯ ଏବଂ କଟକରେ ଏକ୍ୟୁଆଇ ୨୬୨ ରହିଛି। ଏହି ସବୁ ସହରଗୁଡ଼ିକରେ ବାୟୁର ମାନ ଅତି ଖରାପ ସ୍ତରରେ ପହଞ୍ଚିଥିବାରୁ ଜନସାଧାରଣଙ୍କ ସ୍ବାସ୍ଥ୍ୟ ପାଇଁ ଏହା ଗୁରୁତର ବିପଦ ସୃଷ୍ଟି କରିଛି।
ଦେଶର ଅନ୍ୟ ପ୍ରଦୂଷିତ ସହର ମଧ୍ୟରେ ପଶ୍ଚିମବଙ୍ଗର ହଳଦିଆ ସହର ଏକ୍ୟୁଆଇ ୩୧୬ ଏବଂ ପଞ୍ଜାବର ରୂପନଗର ଏକ୍ୟୁଆଇ ୩୧୧ ଥିବାବେଳେ ଆନ୍ଧ୍ରପ୍ରଦେଶର ବିଶାଖାପାଟଣାରେ ଏକ୍ୟୁଆଇ ୩୦୩ ରହିଛି। ଏହା କୌଣସି ଗୋଟିଏ ଦିନର ଘଟଣା ନୁହେଁ ବରଂ ଗତକାଲି ମଧ୍ୟ ଦେଶର ୫ବାୟୁ ପ୍ରଦୂଷିତ ସହର ମଧ୍ୟରେ ଓଡ଼ିଶାର ଅନୁଗୋଳ ଓ ତାଳଚେର ରହିଥିଲା। ଗତକାଲି ତାଳଚେରରେ ଏକ୍ୟୁଆଇ ୩୩୬ ଥିବାବେଳେ ଅନୁଗୋଳର ଏକ୍ୟୁଆଇ ୩୦୩ ଥିଲା।
ରାଜ୍ୟର ଯେଉଁ ୭ଟି ସହରରେ ବାୟୁ ପ୍ରଦୂଷଣ ଅଧିକ ରହୁଛି ସେଠାରେ ପ୍ରଦୂଷଣ ହ୍ରାସ କରିବା ପାଇଁ ଏନ୍‌ଜିଟି ଏବଂ କେନ୍ଦ୍ର ସରକାର ରାଜ୍ୟ ସରକାରଙ୍କୁ ଆକ୍ସନ ପ୍ଲାନ ତିଆରି କରି ପଦକ୍ଷେପ ନେବାକୁ କୁହାଯାଇଥିଲା। କିନ୍ତୁ ଆକ୍ସନ ପ୍ଲାନ ତିଆରି ହୋଇଥିଲେ ବି କାର୍ଯ୍ୟକାରୀ କରାଯାଉ ନଥିବାରୁ ଗୁରୁବାର ବାଲେଶ୍ବର ଦେଶର ସବୁଠୁ ଅଧିକ ପ୍ରଦୂଷିତ ସହର ପାଲଟିଛି।

Powered by Froala Editor