ବଲିଉଡ୍‌ ଅଭିନେତ୍ରୀ ସେଲିନା ଜେଟ୍‌ଲି ସ୍ୱାମୀ ତଥା ଅଷ୍ଟ୍ରେଲୀୟ ବ୍ୟବସାୟୀ ପିଟର ହାଗ୍‌ଙ୍କ ବିରୋଧରେ ମୁମ୍ବାଇର ଏକ କୋର୍ଟରେ ଘରୋଇ ହିଂସା ମାମଲା ରୁଜୁ କରିଛନ୍ତି । ମୁମ୍ବାଇର ଫ୍ୟାମିଲି କୋର୍ଟରେ ସେଲିନା ବିଭିନ୍ନ ସମୟରେ ସ୍ବାମୀ ତାଙ୍କୁ ଶାରୀରିକ ଏବଂ ମାନସିକ ନିର୍ଯାତନା  ଦେଉଥିବାର କଥାକୁ ଉଲ୍ଲେଖ କରିଛନ୍ତି। ଏଥିସହିତ ୫୦ କୋଟି ଟଙ୍କା କ୍ଷତିପୂରଣ ଓ ପ୍ରତି ମାସ ୧୦ ଲକ୍ଷ ଟଙ୍କା ଭରଣପୋଷଣ ରାଶି ଦାବି କରିଛନ୍ତି ।

ତାଙ୍କ ଆବେଦନ ପରେ ମୁମ୍ବାଇର କୋର୍ଟ ହାଗଙ୍କୁ ଏକ ନୋଟିସ୍ ଜାରି କରିଛନ୍ତି। ସେଲିନା ନିଜ ଆବେଦନରେ କହିଛନ୍ତି, ୪୮ ବର୍ଷୀୟ ପିଟରଙ୍କର ନିଜ ସନ୍ତାନଙ୍କ ପ୍ରତି କୌଣସି ସହାନୁଭୂତି ନାହିଁ । ଶାରୀରିକ, ମାନସିକ ନିର୍ଯାତନା ଯୋଗୁ ତାଙ୍କୁ ଅଷ୍ଟ୍ରିଆରେ ନିଜ ଘର ଛାଡ଼ି ଭାରତ ଫେରିବାକୁ ପଡ଼ିଲା । ଏଥିସହିତ ତାଙ୍କର ମୁମ୍ବାଇ ସ୍ଥିତ ଘରେ ପିଟରଙ୍କ ପ୍ରବେଶ ରୋକିବାକୁ ସେ ଆବେଦନ କରିଛନ୍ତି । ଅଷ୍ଟ୍ରିଆରେ ପିଟରଙ୍କ ସହ ରହୁଥିବା ନିଜର ୩ ସନ୍ତାନଙ୍କ ହେପାଜତ ଲାଗି ମଧ୍ୟ ସେଲିନା ଆବେଦନ କରିଛନ୍ତି । ତାଙ୍କ ଅଭିଯୋଗ ଅନୁସାରେ, ସନ୍ତାନ ଜନ୍ମ ପରେ ପିଟର ବିଭିନ୍ନ ବାହାନା କରି ତାଙ୍କୁ କାମ କରିବାରୁ ଅଟକାଇଲେ । ଏହା ଦ୍ୱାରା ତାଙ୍କର ଆର୍ଥିକ ସ୍ୱାଧୀନତା ଉପରେ ପ୍ରଭାବ ପଡ଼ିଲା ଏବଂ ତାଙ୍କ ସମ୍ମାନ ହାନି ହେଲା । ତାଙ୍କ ଆବେଦନ ଅନୁସାରେ, ପିଟର ଚଳିତ ବର୍ଷ ଅଗଷ୍ଟରେ ଅଷ୍ଟ୍ରିଆର ଏକ କୋର୍ଟରେ ଛାଡ଼ପତ୍ର ଆବେଦନ କରିଥିଲେ ।

ସେଲିନା ଓ ପିଟର ୨୦୧୦ରେ ଅଷ୍ଟ୍ରିଆରେ ବିବାହ କରିଥିଲେ । ଉଭୟଙ୍କର ୩ ସନ୍ତାନ ୱିନ୍‌ଷ୍ଟନ, ଭିରାଜ ଓ ଆର୍ଥର ଅଛନ୍ତି । ସେଲିନା ନୋ ଏଣ୍ଟ୍ରି, ଗୋଲମାଲ ରିଟର୍ଣ୍ଣସ୍, ଥାଙ୍କ୍ ୟୁ, ଅପନା ସପନା ମନି ମନି ପରି ଚଳଚିତ୍ରରେ ନିଜର ଅଭିନୟର ଯାଦୁକୁ ପ୍ରଦର୍ଶିତ କରିଛନ୍ତି ।

Powered by Froala Editor