ଅଭିନେତା ଗୋବିନ୍ଦା ହସ୍ପିଟାଲରେ ଭର୍ତ୍ତି ହୋଇଛନ୍ତି। ମଙ୍ଗଳବାର ମଧ୍ୟରାତ୍ରିରେ ସେ ଚେତାଶୂନ୍ୟ ହୋଇଯାଇଥିଲେ। ତାଙ୍କୁ ମୁମ୍ବାଇ ସ୍ଥିତ କ୍ରିଟି କେୟାର ଏସିଆ ମଲ୍ଟିସ୍ପେସାଲିଟି ହସ୍ପିଟାଲରେ ଭର୍ତ୍ତି କରାଯାଇଛି । ତାଙ୍କ ବନ୍ଧୁ ଲଳିତ ବିନ୍ଦଲ ଗାଣମାଧ୍ୟମକୁ ତାଙ୍କ ଅସୁସ୍ଥତା ବାବଦରେ ସୂଚନା ଦେଇଛନ୍ତି । ଦିନକ ପୂର୍ବରୁ ବ୍ରିଜ କ୍ୟାଣ୍ଡି ହସ୍ପିଟାଲରେ ଚିକିତ୍ସିତ ହେଉଥିବା ଅଭିନେତା ଧର୍ମେନ୍ଦ୍ରଙ୍କୁ ଭେଟିଥିଲେ ଗୋବିନ୍ଦା । ବର୍ତ୍ତମାନ ସେ ଡାକ୍ତରୀ ଟିମ୍ ନୀରିକ୍ଷଣରେ ରହିଛନ୍ତି । ସ୍ୱାସ୍ଥ୍ୟାବସ୍ଥାରେ ସୁଧାର ଆସୁଥିବା ସୂଚନା ରହିଛି ।

ହିନ୍ଦୁସ୍ତାନ ଟାଇମ୍ସ ସହିତ ଏକ ଆଲୋଚନାରେ, ଗୋବିନ୍ଦାଙ୍କ ବନ୍ଧୁ ଲଳିତ କହିଛନ୍ତି ଯେ ସେ ଚେତାଶୂନ୍ୟ ହେବା ସମୟରେ ତାଙ୍କ ପରିବାର ତାଙ୍କ ସହିତ ନଥିଲେ। ସେ କହିଛନ୍ତି, “ସୁନୀତା ସହରରେ ନଥିଲେ ଏବଂ ଏକ ବିବାହରେ ଯାଇଥିଲେ। ସେ ମଧ୍ୟରାତ୍ରିରେ ମୁମ୍ବାଇରେ ପହଞ୍ଚିଥିଲେ ଏବଂ ହସ୍ପିଟାଲକୁ ଆସୁଛନ୍ତି। ତାଙ୍କ ଝିଅ ଟିନା ମଧ୍ୟ କାମ ପାଇଁ ଚଣ୍ଡିଗଡ଼ରେ ଥିଲେ। ସେ ମଧ୍ୟ ଫେରି ଆସୁଛନ୍ତି।

ଲଳିତ କହିଛନ୍ତି, “ଗତକାଲି ସେ ଦୁର୍ବଳ ଅନୁଭବ କରିଥିଲେ। ତା’ପରେ ସଂଧ୍ୟାରେ ହଠାତ ସେ କିଛି ସେକେଣ୍ଡ ପାଇଁ ଅସ୍ଥିର ଅନୁଭବ କରିଥିଲେ। ସେ ଚେତାଶୂନ୍ୟ ହୋଇଯାଇଥିଲେ। ଲଳିତ କହିଛନ୍ତି, “ତା’ପରେ ଗୋବିନ୍ଦା ମୋତେ ଘରକୁ ଡାକିଲେ। ମୁଁ ରାତି ୧୨:୧୫ ରେ ପହଞ୍ଚିଲି। ତାଙ୍କ ଡାକ୍ତର ତାଙ୍କୁ ହସ୍ପିଟାଲକୁ ନେବାକୁ ପରାମର୍ଶ ଦେଇଥିଲେ। ତାଙ୍କୁ ଜରୁରୀକାଳୀନ ୱାର୍ଡକୁ ନିଆଯାଇଥିଲା। ସେ ଡାକ୍ତରଙ୍କ ତତ୍ତ୍ୱାବଧାନରେ ଅଛନ୍ତି। ଗୋବିନ୍ଦା ବିଶ୍ରାମ ନେଉଛନ୍ତି।

Powered by Froala Editor