ଯାତ୍ରାଜଗତର ବର୍ଷୀୟାନ କଳାକାର ଦେବୀପ୍ରସାଦ ରଥଙ୍କ ପରଲୋକ ଘଟିଛି। ୭୧ ବର୍ଷ ବୟସରେ ତାଙ୍କର ମୃତ୍ୟୁ ହୋଇଛି । ଜଗତସିଂହପୁର ଜିଲା ପାରାଦୀପଗଡ଼ସ୍ଥିତ ବାସଭବନରେ ମଙ୍ଗଳବାର ରାତିରେ ହୃଦ୍‌ଘାତରେ ଦେହାନ୍ତ ହୋଇଛି। ୪୨ ବର୍ଷର ଯାତ୍ରା କ୍ୟାରିୟରରେ ଅଭିନୟର ଏକ ସ୍ବତନ୍ତ୍ର ଛାପ ଛାଡ଼ିଯାଇଛନ୍ତି ଦେବୀପ୍ରସାଦ। ବେଶ୍‌ ଦମ୍‌ଦାର ଢଙ୍ଗରେ ସେ ତାଙ୍କର ଡାଏଲଗ୍‌ ବା ସଂଳାପ କହିଥାନ୍ତି। ଯାହା ଦର୍ଶକଙ୍କୁ ସିଟ୍‌ରେ ବସି ରହିବାକୁ ବାଧ୍ୟ କରିଥାଏ। ତାଙ୍କ ବିୟୋଗରେ ଯାତ୍ରା ଜଗତରେ ଶୋକର ଛାୟା ଖେଳିଯାଇଛି।

ଜଣେ ଉଚ୍ଚକୋଟୀର କଳାକାର ଥିଲେ ଦେବୀ ପ୍ରସାଦ । ହିରୋଇନରୁ ହିରୋ, ଆଣ୍ଟି ହିରୋ ସବୁପ୍ରକାର ଚରିତ୍ରରେ ସେ ଅଭିନୟ କରିଛନ୍ତି । ୫୦ ବର୍ଷରୁ ଅଧିକ ସମୟ ଧରି ଓଡ଼ିଆ ଯାତ୍ରା ଜଗତରେ ନିଖୁଣ ଅଭିନୟର ଛାପ ଛାଡ଼ି ଯାଇଛନ୍ତି । ଅନେକ ଅପେରା ପାର୍ଟିରେ କାମ କରିଛନ୍ତି । ତାଙ୍କର ଅଭିନୟରେ ଦର୍ଶକ କାନ୍ଦିଛନ୍ତି, ହସିଛନ୍ତି, ଭାବବିହ୍ୱଳ ହୋଇଛନ୍ତି, ପ୍ରେମରେ ପଡିଛନ୍ତି ଆଉ ଭିଜିଛନ୍ତି ଏବଂ ମଜିଛନ୍ତି ।

ମଞ୍ଚ ନାଟକରେ ଶିଶୁ କଳାକାର ଭାବରେ ସେ ତାଙ୍କର ଯାତ୍ରା ଆରମ୍ଭ କରିଥିଲେ ଏବଂ ଧିରେ ଧିରେ ଓଡ଼ିଶାର ପ୍ରଦର୍ଶନ କଳାରେ ପ୍ରମୁଖ ସ୍ଥାନ ପାଇଥିଲେ। ୪ ଦଶନ୍ଧି ଧରି ସେ ୧୦୦ରୁ ଅଧିକ ପ୍ରଯୋଜନାରେ ଅଭିନୟ କରିଥିଲେ, ନାୟକ, ଖଳନାୟକ ଭୂମିକାରେ ଅଭିନୟ କରିଛନ୍ତି। ୨୦୧୭ରେ ‘ଠକି ଦେଲା ବନ୍ଧୁ ଠିକଣା ବେଳେ’ ରେ ତାଙ୍କର ଶେଷ ଅଭିନୟ ୪୨ ବର୍ଷର କ୍ୟାରିଅରର ଶେଷ ହୋଇଥିଲା ।

ତାଙ୍କ ଦେହାନ୍ତ ଖବର ପ୍ରସାରିତ ହେବା ମାତ୍ରେ ଶହ ଶହ ଯାତ୍ରା କଳାକାର ଏବଂ ପ୍ରଶଂସକ ତାଙ୍କ ଘରେ ଶେଷ ଶ୍ରଦ୍ଧାଞ୍ଜଳି ଜଣାଇବାକୁ ପହଞ୍ଚିଥିଲେ। ତାଙ୍କ ବିୟୋଗରେ ଯାତ୍ରା ଜଗତରେ ବିରାଟ ଶୂନ୍ୟସ୍ଥାନ ସୃଷ୍ଟି ହୋଇଛି ।

Powered by Froala Editor