ନଭେମ୍ବରରେ ରାଜ୍ୟରେ କମ୍‌ ଶୀତ ଅନୁଭୂତ ହେବ । ଏ ମାସରେ ଦେଶର ଅଧିକାଂଶ ସ୍ଥାନରେ ରାତି ତାପମାତ୍ରା ସ୍ୱାଭାବିକଠାରୁ ଅଧିକ ରହିବ । କେବଳ  ଉତ୍ତର-ପଶ୍ଚିମ ଭାରତର କିଛି ସ୍ଥାନରେ ସ୍ୱାଭାବିକ ବା ସ୍ୱାଭାବିକଠାରୁ କମ୍‌ ତାପମାତ୍ରା ରହିବ  ବୋଲି ଭାରତୀୟ ପାଣିପାଗ ବିଭାଗ(ଆଇଏମ୍‌ଡି) ଆକଳନ କରିଛି । 

ଆସନ୍ତା ୨ ତାରିଖରୁ ରାଜ୍ୟରେ ପାଗ ଶୁଖିଲା ହେବ । ମେଘୁଆ ପାଗ ଦୂରେଇଯିବ । ପାଗ ଶୁଖିଲା ସହ ରାତିର ପାରଦ ବି ତଳମୁହାଁ ହେବ । ରାତି ତାପମାତ୍ରା ପ୍ରାୟ ୩ରୁ  ୪ ଡିଗ୍ରୀ କମିଯିବ । ଝାରସୁଗୁଡ଼ା, ରାଉରକେଲା,  ପାଲଲହଡ଼ା, ବାଦାମପାହାଡ଼ରେ ପାରଦ ୧୫ରୁ ୧୭  ଡିଗ୍ରୀକୁ ଖସି ଯାଇପାରେ ପୂର୍ବାନୁମାନ କରାଯାଉଛି । 

ଅକ୍ଟୋବର ମାସରେ ରାଜ୍ୟରେ ସ୍ୱାଭାବିକ ଠାରୁ  ୫୪% ଅଧିକ ବର୍ଷା ହୋଇଛି । ୮ଟି ଜିଲ୍ଲା ସୋନପୁର, ବଲାଙ୍ଗୀର, ନୂଆପଡ଼ା,  କଳାହାଣ୍ଡି, ରାୟଗଡ଼ା, କୋରାପୁଟ, ମାଲକାନଗିରି  ଓ ଗଜପତିରେ ସ୍ୱାଭାବିକ ଠାରୁ ୬୦ ପ୍ରତିଶତରୁ  ଅଧିକ ବର୍ଷା ହୋଇଛି । ୧୩ଟି ଜିଲ୍ଲା ବରଗଡ଼,  ସମ୍ବଲପୁର, ବାଲେଶ୍ୱର, ମୟୂରଭଞ୍ଜ, କେନ୍ଦୁଝର, ଢେଙ୍କାନାଳ, କଟକ୍‌, ଖୋର୍ଦ୍ଧା, ପୁରୀ, ଗଞ୍ଜାମ,  କେନ୍ଦ୍ରାପଡ଼ା, ନୟାଗଡ଼ ଓ ଓ କନ୍ଧମାଳରେ ୨୦ରୁ  ୫୯ ପ୍ରତିଶତ ଅଧିକ ବର୍ଷା ହୋଇଛି ବୋଲି  ପାଣିପାଗ ବିଭାଗ ସୂଚନା ଦେଇଛି ।

ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର  ସୁରେନ୍ଦ୍ରନାଥ ପଶୁପାଳକ ପୂର୍ବାନୁମାନ କରିଛନ୍ତି,  ରାଜ୍ୟକୁ ଉତ୍ତରା ପବନ ବହିବା ଆରମ୍ଭ କରିଛି ।  ଏବେ ଯେଉଁ ମେଘୁଆ ପାଗ ଅଛି, ତାହା ଧୀରେ  ଧୀରେ ପଳାଇବ । ପହିଲି ଶୀତ ଆରମ୍ଭ ହେବ । 

Powered by Froala Editor